"თბილისი პრაიდის" მოწინააღმდეგეების აქცია დასრულდა - "არ ვაპირებთ ხელი შევუშალოთ დეოკუპაციის თემაზე პროტესტს"

პარლამენტის წინ „თბილისი პრაიდის“ მოწინააღმდეგეების აქცია დასრულდა. აქციის ორგანიზატორების თქმით, მათ მეუფისგან მიიღეს კურთხევა, რომ ამ ეტაპზე აქცია პარლამენტის წინ აღარ უნდა გაგრძელდეს.

ადგილიდან ეტაპობრივად გავიდნენ აქციის მონაწილეები, მათ გასვლაში პოლიცია დაეხმარა.

ამ ეტაპზე პარლამენტის წინ მხოლოდ ანტისაოკუპაციო აქცია მიმდინარეობს, რომელზეც შს მინისტრის გადადგომასაც მოითხოვენ.

გურამ ფალავანდიშვილმა პარლამენტის წინ მიმდინარე აქცია დატოვა. მასთან ერთად აქციას კიდევ რამდენიმე პირი გამოაკლდა. რაც შეეხება აქციის მონაწილეებს, რომლებიც ადგილზე რჩებიან, აცხადებენ, რომ ჯერ მიზანს ვერ მიაღწიეს.

ფალავანდიშვილის თქმით, ამ ეტაპზე მათი მიზანი მიღწეულია და პროტესტის აზრს ვერ ხედავს.

"ჩვენ აქ არ ვაპირებთ ხელი შევუშალოთ დეოკუპაციის თემაზე პროტესტს. ისინი 18 დღეა აქ დგანან. პატივი სცეს სიტუაციას ლგბტ დროშა არ აუწევიათ. მე მათთან პროტესტს ამ კუთხით ვერ ვგრძნობ. მე გავრილოვს და პუტინს არ ვიცავ. მთავრობის წინააღმდეგ პროტესტს გავაგრძელებ ჩემი მოთხოვნებით, მაგრამ კონტრაქციას აქ არ ვაპირებ. მე ეს არ მომწონს. გუშინ აქ უნდა ვყოფილიყავით, მაგრამ დღესაც აქ დგომა მხოლოდ იმიტომ, რომ არ შემოცვივდეს ეს ხალხი, არ მინდა",- განაცხადა ფალავანდიშვილმა.

პარლამენტის წინ ორი აქცია მიმდინარეობს. ერთზე „თბილისი პრაიდის“ მიერ „ღირსების მარშის" ჩატარების წინააღმდეგ გამოდიან, მეორე კი 20 ივნისის შემდგომი აქციაა, რომელზეც შს მინისტრის გიორგი გახარიას გადადგომას მოითხოვენ.

შეგახსენებთ, რომ ანტისაოკუპაციო აქციის მონაწილეები და "თბილისი პრაიდის“ მოწინააღმდეგეები რუსთაველის გამზირზე მთელი ღამის განმავლობაში იმყოფებოდნენ.

ანტისაოკუპაციო აქციის მონაწილეები ითხოვდნენ, მათთვის სამართალდამცველებს მიეცათ უფლება პარლამენტის მიმდებარე ტერიტორიაზე გადანაცვლების, სადაც მოშიმშილეები და აქციის ორგანიზატორების ნაწილი რჩებოდა. თუმცა მიუხედავად მოთხოვნისა, მათ ამის საშუალება მხოლოდ გამთენიისას, მას შემდეგ მიეცათ, რაც პოლიციამ ე.წ. ყვითელი ავტობუსებისგან გაკეთებული კორდონი გახსნა.