9 სახანძრო - რეგიონებში, 4 ახალი ვერტმფრენი და პირველი კრიმინალისტიკური ლაბორატორია - რა ინფრასტრუქტურულ სიახლეებს გეგმავს შსს

წელს საქართველოში პირველად შეიქმნება კრიმინალისტიკური ლაბორატორია, რომელიც ამიერკავკასიაში ყველაზე მძლავრი და განვითარებული იქნება, - ამის შესახებ პარლამენტის პლენარულ სხდომაზე ვიცე-პრემიერმა, შინაგან საქმეთა მინისტრმა გიორგი გახარიამ განაცხადა.

მან ისაუბრა ინფრასტრუქტურისა და ტექნოლოგიების საკითხზე და აღნიშნა, რომ 2018 წლის განმავლობაში შსს-მ ინფრასტრუქტურაში ძირითადი კაპიტალის ხარჯებში დაახლოებით 96-97 მილიონი დახარჯა - ახალი ტრანსპორტის, დროებითი მოთავსების იზოლატორების, პოლიციელების დაცვის, ინფრასტრუქტურის, ტექნოლოგიური აღჭურვილობის და სხვა მიმართულებებით.

„წელს საქართველოში პირველად შეიქმნება კრიმინალისტიკური ლაბორატორია, რომელიც ამიერკავკასიაში ყველაზე მძლავრი და განვითარებული იქნება. ჩვენ უახლოეს პერიოდში ამ შენობას თბილისში, გულუას ქუჩაზე გავხსნით. ეს კრიმინალისტიკური ლაბორტორია შეძლებს, სრულფასოვნად მოემსახუროს შსს-სა და სხვა საგამოძიებო უწყებებს. მაგალითად, დღემდე შსს-ში არ არსებობდა ბალისტიკური შემოწმების ავტომატიზირებული სისტემა, რაც ნიშნავს, რომ როდესაც დანაშაულის ადგილიდან გამომძიებელი ამოიღებდა ან მასრას, ან ტყვიას, მას ტყვიის დაახლოებით 400 000 ეგზემპლარი ხელით უნდა შეედარებინა, ვინაიდან ელექტრონული ბაზა არ არსებობდა. შეიძლება, ეს შედარება დაწყებულიყო დღეს და დამთავრებულიყო ათი წლის შემდეგ. დღეს რასაც ვაკეთებთ, არის ის, რომ ეს პროცედურები დაგვყავს დაახლოებით 1 დღის ფარგლებში. ასევე, შსს-ს კრიმინალისტიკურ ლაბორატორიაში იქნება დნმ ლაბორატორია, რომელიც მოგვცემს საშუალებას, სწრაფად გამოვიძიოთ ის საქმეები, რომელთაც დიდი მნიშვნელობა აქვს როგორც ჩვენთვის, ისე თითოეული ჩვენი მოქალაქისთვის“, - აღნიშნა შს მინისტრმა.

გარდა ამისა, რეგიონებში საგანგებო სიტუაციების მართვის 9 სახანძრო ობიექტი შენდება. როგორც შს მინისტრმა განაცხადა, პროცესი საგანგებო სიტუაციების მართვის სამსახურის მუშაობის ეფექტიანობას გაზრდის.

„საგანგებო სიტუაციების მართვის ნაწილი შსს-ს წელს დაუბრუნდა. მიმდინარე პერიოდში რამდენიმე ქალაქში მსხვილი საგანგებო სიტუაციების მართვის სახანძრო ობიექტების მშენებლობა მიმდინარეობს.ზუგდიდში, ანაკლიაში და ა.შ. ცხრა ობიექტი შენდება და ხდება ავტოპარკის განახლება იმისთვის, რომ სახანძროებს ჰქოდეთ საშუალება სრულფასოვნად და ეფექტურად მოემსახურონ ჩვენ მოქალაქეებს“, - განაცხადა გიორგი გახარიამ.

ამასთან, გიორგი გახარიას განცხადებით, წლის ბოლომდე შინაგან საქმეთა სამინისტროს ოთხი ვერტმფრენი ეყოლება.

როგორც მინისტრმა პარლამენტში განაცხადა, აღნიშნული ვერტმფრენები კაპიტალურად გარემონტებული იქნება.

„შინაგან საქმეთა სამინისტროს კრიმინალისტიკურ ლაბორატორიას ექნება თავისი დნმ ლაბორატორია, რომელიც ემსახურება სწრაფად გამოვიძიოთ ის საქმეები, რომლებსაც აქვს დიდი მნიშვნელობა ჩვენთვისაც და თითოეული ჩვენი მოქალაქისთვისაც. მარტივი მაგალითი მინდა გითხრათ, სასაზღვრო პოლიციის ინფრასტრუქტურაში, დღეს არსებობს მხოლოდ და მხოლოდ ერთი ვერტმფრენი, რომელიც ემსახურება როტაციას სასაზღვრო პოლიციის, რომელიც ემსახურება მაგალითად თუშეთში რიგითი მოქალაქეების გადაყვანას, რომელიც ემსახურება საგანგებო სიტუაციების მართვის სამსახურს, როდესაც ადამიანი მთაში ზამთრის პერიოდში ზიანდება. ჩვენ მოვახერხეთ და წლის ბოლომდე, შინაგან საქმეთა სამინისტროს ეყოლება ოთხი ვერტმფრენი. რა თქმა უნდა, არა ახალი, მაგრამ კაპიტალურად გარემონტებული ვერტმფრენები იქნება“, - აღნიშნა მინისტრმა.

შს მინისტრის მოსმენა პარლამენტში „მინისტრის საათის“ ფორმატში მიმდინარეობს.