ექრემ იმამოღლუ - ოპოზიციონერი მერი, რომელმაც სტამბოლში ერდოღანის ფავორიტი დაამარცხა

თურქეთში, ოპოზიციური "რესპუბლიკური სახალხო პარტიის" კანდიდატი, ექრემ იმამოღლუ სტამბოლის მერი ოფიციალურად გახდა.

საარჩევნო კომისიის საბოლოო მონაცემებით, ოპოზიციური პარტიის კანდიდატმა ყოფილ პრემიერ-მინისტრს ბინალი ილდირიმს, რომელიც ასევე მერის პოსტზე იყრიდა კენჭს, 13 729 ხმით გაუსწრო.

თურქეთში ადგილობრივი თვითმმართველობის არჩევნებში, ხმათა რაოდენობით პრეზიდენტ ერდოღანის პარტია პირველია, თუმცა, მან დედალაქ ანკარასა და კიდევ რამდენიმე ქალაქზე, მათ შორის თურქეთის “ეკონომიკურ ცენტრად” წოდებულ სტამბოლზე, კონტროლი დაკარგა.

"სტამბოლში ახალი ეპოქა იწყება" - წერს vestiturkey.com. გამოცემის ცნობით, სტამბოლში ოპოზიციონერი პარტიის ლიდერის გამარჯვება ადგილობრივმა ცესკომ აღიარა, არჩევნების შედეგებმა კი გააბრაზა რეჯეფ ტაიპ ერდოღანი და მისი ფავორიტი - ბინალი ილდიმირი. “სამართლიანობისა განვითარების პარტია შოკშია” - წერს გამოცემა.

BBC-ის თურქული სამსახურის ცნობით, "ეს არის კანდიდატი, რომელმაც უთანასწორო ბრძოლაში გაიმარჯვა, ერდოღანისა და მისი ფავორიტის აგრესიული პიარ-კამპანიისა და ყოველ ნაბიჯზე გაკრული ორი რადიკალი ლიდერის უზარმაზარი პლაკატების ფონზე... იმამოღლუ სტამბოლის ერთ-ერთ პროვინციას 5 წლის განმავლობაში მართავდა და ამ დროში თავის გუნდთან ერთად ბევრის გაკეთება შეძლო" - წერს ადგილობრივი კორესპოდენტი ილგილ კონულარი.

გამოცემის ცნობით, მას არც ისე ცუდი პოლიტიკური გამოცდილება აქვს, იმისათვის, რათა მეგაპოლისი მართოს. ერთ დროს, ის თურქეთის პრეზიდენტის “ტაქტიკური მხარდამჭერების” ლიდერი იყო.

“ნეონაციონალისტური მოძრაობის” ლიდერმა დავლეთ ბაქჩელიმ პოლიტიკოსი უკვე გააკრტიკა იმისთვის, რომ 13 აპრილს, სტამბოლის ორ საფეხბურთო კლუბს - “ბეშიკტაშსა” და “ისტამბულ ბაშაქჰეშირს” შორის გამართულ თამაშს დაესწრო, რითაც ფეხბურთის პოლიტიზაცია მოახდინა, რადგან მოსახლეობის წინაშე გამოსვლისას, პოლიტიკური განცხადებები გააკეთა და თამაშისას, მაყურებლები მის სახელს “სკანდირებდნენ".

aljazeera.com-თან საუბარში, თურქი ანალიტიკოსის, მუსტაფა აკოლას ცნობით, ასეთ შედეგი გამოიწვია მმართველი პარტიის მხრიდან უკიდეგანო დემონსტრირებამ, რომ ხელისუფლების სათავეში მუდმივად იქნებოდნენ.

“არავინ იცის რა მოხდებოდა მმართველ პარტიას რომ არ დაეთმო... თუმცა, მეორე მხრივ - ის ფაქტი, რომ თურქეთში სასამართლო სისტემა ჯერ კიდევ მუშაობს და კანონი ჯერაც უზენაესია, კარგია. ადამიანები, რომლებიც კანონზე მუშაობენ, პარტიების მიღმა აღმოჩდნენ," - ამბობს ექსპერტი, რომლის თქმითაც, არჩევნები თურქეთში, შენელებული ეკონომიკური ზრდის, ინფლაციის, გაზრდილი უმუშევრობის და ეროვნული ვალუტის დევალვაციის ფონზე ჩატარდა.

ექრემ იმამოღლუ 1970 წელს ქალაქ ტრაპზონში, კონსერვატიულ ოჯახში დაიბადა. სკოლის დამთავრების შემდეგ, სტამბოლის უნივერსიტეტში ადმინისტრაციული საქმიანობის ფაკულტეტი დაამთავრა.

კარიერა 1992 წელს დაიწყო საოჯახო კომპანიაში, რომელიც სამშენებლო სამუშაოებს აწარმოებს. კომპანიაში იმამოღლუ დირექტორთა საბჭოს თავმჯდომარეობდა.

ოლიტიკური კარიერა კი 48 წლის ოპოზიციონერმა სტამბოლში დაიწყო - 2014 წელს, აღმოსავლეთით მდებარე რაიონის ხელმძღვანელად აირჩიეს და მარტის არჩევნებამდე, ამ თანამდებობას იკავებდა.

"არჩევნებამდე სამი თვით ადრე, იმამოღლუ გახდა ფიგურა, რომელიც მთელმა თურქეთმა გაიცნო. ის თავს არიდებდა კრიტიკას და თავის მთავარ ოპონენტზე, ბინალი ილდიმირზე პატივისცემით საუბრობდა. მშვიდობისმყოფელი ტონი თურქულ პოლიტიკას არ ახასიათებს, თუმცა ეს მიმართულება ძალიან სწორი აღმოჩნდა ექრემ იმამოღლუსთვის და კარგი შედეგიც მოუტანა” - ამბობს rbc.ru-სთან საუბარში თანამედროვე თურქეთის შემსწავლელი ცენტრის ექსპერტი იური მავაშევი.

echo.msk.ru-მ იმამოღლუს მომავალში კიდევ უფრო წარმატებული პოლიტიკური კარიერა “უწინასწარმეტყველა”, რადგან წლების წინ, რეჯეპ ტაიპ ერდოღანმაც სტამბოლის მერობით დაიწყო და ქვეყნის პრემიერ-მინისტრი, შემდეგ კი პრეზიდენტი გახდა...

“ექრემ იმამოღლუმ ამის მიღწევა, ერღოღანის მასობრივი წნეხის ფონზე შეძლო" - ამბობს გამოცემა TACC-ის გენერალური დირექტორის პირველი მოადგილე მიხეილ გუსმანი. მისივე თქმით, მთავარია, ახლა მან 11-მილიონიან ქალაქში პოსტი შეინარჩუნოს...

რაც შეეხება ახლადარჩეული მერის ოჯახურ ცხოვრებას - მას მეუღლე და სამი შვილი ყავს. ექრემ და დილეკ იმამოღლუები 23 წელია ქორწინებაში არიან და ორი ვაჟი და ერთი ქალიშვილი ჰყავთ. მერის მეუღლე საზოგადოებასთან ურთიერთობის სპეციალისტია და ამჟამად ამ მიმართულებით დოქტურანტურაში სწავლობს.