სირიაში ISIS-ი სრულად განადგურებულია - სისხლისმღვრელ ბრძოლაში ისლამისტები დამარცხდნენ

სირიაში ტერორისტული დაჯგუფება "ისლამური სახელმწიფო" სრულად განადგურებულია. ისლამისტების წინააღმდეგ მიმდინარე 4 წლიანი ინტენსიური ბრძოლა დასრულდა. ერთ დროს მათ სირიისა და ერაყის ტერიტორიის მესამედი ეკავათ. სირიაში დაეშის სრულად განადგურების შესახებ ოფიციალური ინფორმაცია ამერიკის შეერთებული შტატების მხარდაჭერის მქონე სირიის დემოკრატიული ძალების წარმომადგენლებმა "ტვიტერის" მეშვეობით დღეს გაავრცელეს.

ჯერ კიდევ გუშინ სირიის დემოკრატიული ძალების მედიასთან ურთიერთობის სამსახურის უფროსის მუსტაფა ბალის მიერ "ტვიტერზე" გავრცელებული განცხადების თანახმად, "ისლამური სახელმწიფოს" უკანასკნელი ნარჩენებისგან სრულად გასათავისუფლებლად მძიმე და სისხლისმღვრელი ბრძოლა მიმდინარეობდა.

ინფორმაცია იმის შესახებ, რომ დაეშის მებრძოლები დამარცხებულები არიან და "ისლამურ სახელმწიფოს" გავლენის ქვეშ სირიაში მიწის ერთი სანტიმეტრიც კი აღარ დარჩა, ამერიკის შეერთებული შტატების თავდაცვის სამინისტრომაც დაადასტურა. თეთრი სახლის პრესსპიკერის სარა სანდერსის თქმით, აღნიშნული ინფორმაცია თეთრი სახლის ლიდერს დონალდ ტრამპს უკვე შეატყობინეს. მისი განცხადებით, ამერიკის თავდაცვის მდივნის მოვალეობის შემსრულებელმა პატრიკ შანაჰანმა ამასთან დაკავშირებით, ტრამპს One Air One-ის ბორტზე ყოფნისას, ფლორიდაში გამგზავრების დროს აცნობა.

აქვე უნდა ითქვას, რომ სირიის დემოკრატიულ ძალებს რამდენიმე კვირა დასჭირდათ იმისთვის, რომ ტერორისტული დაჯგუფებისთვის ბაღუზის სახით სირიაში უკანასკნელი დასაყრდენი გამოეცალათ ხელიდან. თავდადებული ბრძოლის უკანასკნელ დღეებში, ტერორისტული დაჯგუფების მიერ გავრცელებულ ვიდეოში კარგად ჩანს სირიის დემოკრატიულ ძალებთან მებრძოლი ბურკაში გამოწყობილი ქალი, რომელსაც ხელში AK47-ი უჭირავს. საინტერესოა ის ფაქტი, რომ ამ დრომდე ქალებს ბრძოლის წინა ხაზზე გამოჩენა ეკრძალებოდათ.

როგორც სამხედრო ექსპერტები განმარტავენ, ისლამური სახელმწიფო ყოველთვის იმ პრინციპს ეყრდნობოდა, რომ ქალებმა ძალადობრივ აქტში მონაწილეობა მხოლოდ უკიდურეს შემთხვევაში უნდა მიიღონ ანუ თუ საქმე თავდაცვით ჯიჰადს ეხება, თუ მუსლიმთა ტერიტორია თავდასხმის სამიზნეა და ქალების ჩართულობა სტრატეგიული მნიშვნელობისაა. როგორც ჩანს, ბაღუზისთვის ბრძოლა სწორედ ის კრიტიკული მომენტი აღმოჩნდა, რომელიც ქალების ჩართულობას საჭიროებდა.

"ისლამური სახელმწიფოს" მიზანი მუსლიმებით დასახლებული ტერიტორიების დამორჩილება და იქ ხალიფატის გამოცხადება იყო, რისი განხორციელებაც სირიისა და ერაყის მნიშვნელოვანი ქალაქების დაპყრობით დაიწყო. უკვე 2014 წელს თვითგამოცხადებული ხალიფატი ორი ქვეყნის ტერიტორიაზე 88 ათასი კვადრატული კილომეტრის ფართობს აკონტროლებდა.

ისლამისტებმა კონტროლის ქვეშ არსებულ ტერიტორიაზე შარიათის კანონები აამოქმედეს და ტერორი და შიში დაამყარეს. ორგანიზაცია ცნობილია ათასობით ადამიანის მოკვლითა და სიკვდილით დასჯით, რომელიც როგორც წესი ადამიანთა მორალური განადგურების მიზნით საჯაროდ ეწყობოდა.

ალბათ, გადაჭარბებული არ იქნება თუ ვიტყვით, რომ დაეშის მებრძოლებმა ერთ-ერთი ყველაზე დიდი ადამიანური ზარალი იეზიდების რელიგიურ უმცირესობას მიაყენეს. 2014 წელს "ისლამურმა სახელმწიფომ" ერაყის ჩრდილოეთ ნაწილში მდებარე სინჯარის ოლქში მცხოვრებ იეზიდებზე იერიში მიიტანეს. მაშინ დაახლოებით 50 ათასმა ადამიანმა თავი მთებს შეაფარა, თუმცა სანამ კოალიცია ამერიკის შეერთებული შტატების მეთაურობით მათ დასახმარებლად ტერორისტებზე ავიაიერშს განახორციელებდა, ათასობით იეზიდი დაიღუპა. ექსტრემისტები იეზიდ მამაკაცებს სიკვდილით სჯიდნენ, ბავშვებს ყიდნენ, ქალები კი სექსმონები ხდებოდნენ.

გაეროს ანგარიშის თანახმად, 2015 წლისთვის ისლამისტებს 3500 ადამიანი მონად ჰყავდათ აყვანილი, მათ დიდ ნაწილს იეზიდები წარმოადგენდნენ, მონათა უმეტესობა მდედრობითი სქესის წარმომადგენელი იყო, თუმცა მონათა შორის სხვა რელიგიური და ეთნიკური უმცირესობის წარმომადგენლებიც ხვდებოდნენ.

იეზიდების მიერ გაღებულ მსხვერპლზე საუბრისას არ შეიძლება არ გავიხსენოთ მათი ერთ-ერთი ყველაზე მამაცი წარმომადგენელი ნადია მურადი, რომელმაც ისლამური სახელმწიფოს სექს მონობას გაქცევით დააღწია თავი, ძალა მოიკრიბა და თავისი ოჯახის ტრაგედია, რომელიც ექსტრემისტებმა მის თვალწინ ამოხოცეს, მთელს მსოფლიოს მოუყვა, გაეროს კი იეზიდების დახმარება სთხოვა. ნადია მურადი ახლა გერმანიაში ცხოვრობს, მან გასულ წელს მშვიდობის დარგში ნობელის პრემია მიიღო.

"ისლამური სახელმწიფოს" მებრძოლები ადამიანებს არა მხოლოდ ფიზიკურად არამედ მორალურადაც ანადგურებდნენ, ისინი საუკუნეების განმავლობაში შემონახულ მონუმენტებსა და ტაძრებს ანადგურებდნენ. ექსტრემიტებმა სიირის ერთ-ერთი უძველესი და ისტორიული ქალაქი პალმირა უროების დახმარებით გაანადგურეს, ყველაზე ძვირფასი არტეფაქტები კი შავ ბაზარზე გაყიდეს.

შავ ბაზარზე გაყიდული არტეფაქტების პარალელურად მათი შემოსავლის დიდ ნაწილს ნავთობი, კონტრობანდა, მოსახლეობაზე დაწესებული გადასახადები წარმოადგენდა. შემოსავალს იღებდნენ გამოძალვისა და ადამიანთა გატაცების გზითაც.

"ისლამური სახელმწიფოს" ტერორი მხოლოდ სირიისა და ერაყის ტერიტორიაზე არ გავრცელდა, არამედ მთელი მსოფლიო მოიცვა. ისლამისტებმა ევროპის შუაგულამდეც ჩააღწიეს და ტერაქტების სერია პარიზსა და ბრიუსელშიც მოაწყვეს, სინაის ნახევარკუნძულის თავზე რუსული ვერტმფრენის ჩამოგდება მოახერხეს და აშშ-ის ღამის კლუბში ერთ-ერთი ყველაზე სისხლიანი ჟლეტის სულისჩამდგმელები აღმოჩნდნენ. დაუჯერებლია, მაგრამ მათ თითქმის მთელი მსოფლიოს და დასავლეთის წამყვანი ქვეყნის პროვოცირება გამოიწვიეს.

ჯერ კიდევ გასული წლის თებერვლის მონაცემებით, 2014 წელს ხალიფატის გამოცხადების შემდეგ, "ისლამურმა სახელმწიფომ" 29 ქვეყანაში განხორციელებული 143 ტერაქტი საკუთარ თავზე აიღო, რასაც 2000-ზე მეტი ადამიანის სიცოცხლე ემსხვერპლა.

უკეთ რომ გავიგოთ რა ზარალი მიაყენა სირიამ იმ ქვეყნებს, რომელთა ნაწილზეც კონტროლი ჰქონდა დამყარებული, გეტყვით, რომ მხოლოდ სირიას 1 ტრილიონი ამერიკული დოლარი სჭირდება იმისთვის, რომ ქვეყანა ნანგრევებიდან აღდგეს.

ფოტო: "დეილი მეილი"