რუსეთში, მორგში ქალი "გაცოცხლდა"

მორგში 62 წლის ქალი „გაცოცხლდა“ და ის სასწრაფოდ რეანიმაციულ განყოფილებაში გადაიყვანეს, ინფორმაციას Yahoo7 News ავრცელებს. ქალის გადარჩენა ვერ მოხერხდა, რადგან მას მორგში ძალიან დაბალ ტემპერატურაზე ყოფნის გამო ჰიპოთერმია აღენიშნებოდა.

შემთხვევა რუსეთში, ამურის რეგიონში მოხდა.

ყველაფერი კი წვეულებაზე დაიწყო - ქალი ნათესავებთან ერთად სოფელ ვასილიევკაში ალკოჰოლს მიირთმევდა, როდესაც გონება დაკარგა და „გარდაიცვალა“. გარდაცვალება პოლიციამაც დაადასტურა და ქალი მორგში გადაასვენეს. როდესაც მორგის თანამშრომელი „მიცვალებულს“ ფეხის თითზე სანიშნეს ამაგრებდა, ქალმა მოძრაობა დაიწყო და ის სასწრაფოდ კლინიკაში გადაიყვანეს.

ექიმები 40 წუთის განმავლობაში ცდილობდნენ ქალის გადარჩენას, რომლის სხეული მორგის ტემპერატურის გამო ძალიან იყო გაციებული. ის ბელოგორსკის საავადმყოფოში ჰიპოთერმიისგან გარდაიცვალა.

ექიმები ამბობენ, რომ გონების დაკარგვის შემდეგ შესაბამისი სამედიცინო ჩარევის შედეგად მისი გადარჩენა შესაძლებელი იქნებოდა.

საქმესთან დაკავშირებით მოკვლევა უკვე დაწყებულია. ჯანდაცვის უწყების წარმომადგენლის თქმით, პოლიციელმა დაარღვია კანონი, როდესაც სასწრაფო სამედიცინო დახმარების გარეშე თავად დაადგინა გარდაცვალება.