„პალიტრა მედია ჰოლდინგმა“ კოალიციას „აუტიზმისათვის“ 500-მდე წიგნი გადასცა

აუტიზმის სპექტრის მქონე ბავშვებისთვის „პალიტრა მედია ჰოლდინგმა“ კოალიციას „აუტიზმისათვის“ 24 დასახელების 500-მდე წიგნი გადასცა.

„პალიტრა მედია ჰოლდინგის“ წარმომადგენლები „ნეიროგანვითარების ცენტრის“ ოფისში იმყოფებოდნენ, სადაც კოალიციაში „აუტიზმისათვის“ შემავალი ცენტრების წარმომადგენლებს შეხვდნენ და საჩუქრები გადასცეს.

„პალიტრა მედია ჰოლდინგის“ გენერალური დირექტორის მოადგილემ ნინო ფეიქრიშვილმა შეხვედრაზე პროექტის „დაუმეგობრდი ფერებს“ მნიშვნელობაზე ისაუბრა.

როგორც „ინტერპრესნიუსს“ ნინო ფეიქრიშვილმა განუცხადა, „პალიტრა მედია ჰოლდინგმა“ კოალიციასთან „აუტიზმისთვის“ ახლახანს მემორანდუმი გააფორმა, რომელიც კოალიციაში შემავალი ექვსივე ცენტრის ერთი წლის განმავლობაში წიგნებით დახმარებას ითვალისწინებს.

„მემორანდუმიდან გამომდინარე, კოალიციაში შემავალ ცენტრებს მივაწვდით წიგნებს, რომლებიც კოალიციის სპეციალისტებთან ერთად შეირჩა. კერძოდ, ეს არის ის წიგნები, რომელებიც კარგი სასწავლო მასალა იქნება ბავშვებისთვის, რომლებიც ამ ცენტრებში დადიან. „პალიტრა მედია ჰოლდინგი“ თავისი ღირებულებებიდან გამომდინარე ყოველთვის ცდილობს, ხელმისაწვდომი გავხადოთ წიგნი ყველასთვის და ხელი შევუწყოთ წიგნიერების ამაღლებას. შესაბამისად, ეს პროექტი „დაუმეგობრდი ფერებს“ შეიქმნა სწორედ იმისთვის, რომ წიგნი ხელმისაწვდომი გაგვეხადა აუტიზმის სპექტრის დარღვევის მქონე ბავშვებისთვის. ვფიქრობ, ერთი წლის განმავლობაში თითოეულ ცენტრში კარგი ბიბლიოთეკა შეიქმნება. პირველი ეტაპისთვის 500-მდე წიგნი გადავეცით ცენტრებს და ეს მომავალშიც ასე გაგრძელდება“, – განაცხადა ფეიქრიშვილმა.

„ნეიროგანვითარების ცენტრის“ დირექტორის, მედიცინის დოქტორის ეკატერინე არველაძის თქმით, ისინი მსგავსი საქველმოქმედო აქციების გამართვას მიესალმებიან საუბრისას აღნიშნა, რომ წიგნებს სპეციალისტები ბავშვებთან ურთიერთობაში გამოიყენებენ.

„ამ დღეს ჩვენ სულმოუთქმელად ველოდით, რადგანაც წინასწარ ავარჩიეთ წიგნები, რომელიც ჩვენ აუტისტური სპექტრის მქონე ბავშვებთან მუშაობაში გვჭირდება. ჩვენი ცენტრი მუშაობს ბავშვებთან, რომლებსაც აღენიშნებათ მენტალური, გონებრივი, ფიზიკური თუ ქცევითი აშლილობები და ეს წიგნები, რომელიც „პალიტრა მედია ჰოლდინგმა“ გადმოგვცა, ძალიან დაგვეხმარება“, – განაცხადა „ნეიროგანვითარების ცენტრის“ დირექტორმა, მედიცინის დოქტორმა ეკატერინე არველაძემ.