1
აპრილიდღის ზოგადი ასტროლოგიური პროგნოზი
სულ რაღაც ერთი კვირის წინ მარი არღუთაშვილს ასე მასობრივად, როგორც დღეს, არავინ იცნობდა, თუმცა გვარ-სახელით არც ახლაა დიდად ცნობილი, სამაგიეროდ, მისი ზეპოპულარული ვიდეო - "როგორ ხაართ?" - ყველამ იცის. მარი ვიდეოში ყველას გვეკითხება, - როგორ ვართ, რაც მაყურებელში სიცილს და კარგ განწყობას იწვევს.
ამჟამად სწორედ მისით დავინტერესდით, გვინდოდა გაგვეგო, ვინ არის, რატომ გაუჩნდა სურვილი, ასეთი ვიდეო გადაეღო და ბოლოს და ბოლოს, გაპოპულარულების შემდეგ, მისთვის გვეკითხა - როგორ ხაარ?
მარი თეატრის მსახიობია, ეკრანზე ნაკლებად გამოჩენილა, მხოლოდ ჩცდ-ში სხვადასხვა სეზონში ექთნის როლი აქვს შესრულებული. თამაშობს გორის ერისთავის სახელობის თეატრში, ასევე თბილისის მუნიციპალურ თეატრში - "რუსთაველის 19". არის რეჟისორ სანდრო მრევლიშვილის ნამოწაფარი.
- ერთი, თითქოს უწყინარი ვიდეოთი ელვისებურად ინტერნეტვარსკვლავი გახდი. როგორ ხაარ? და როგორ მოხდა ეს ყველაფერი?
- ის, რაც მოხდა, მას სრული გაუგებრობა დავარქვი. ბოლო დროს ბატონი შოთას ვიდეო მქონდა აკვიატებული, მეგობრებთან ერთად, სარფში ვისვენებდი და იქ ყოველი დილა ასე - როგორ ხაართ? - იწყებოდა.
- ბატონ შოთას იცნობ?
- არა, მხოლოდ მისი ვიდეოები ვიცი, მაგრამ მათგან ეს მქონდა ამოჩემებული. ვაშარჟებდი და პაროდიას ვაკეთებდი, მაგრამ სოციალურ ქსელში, საჯაროდ არაფერი ამიტვირთავს. მხოლოდ მეგობრების წრეში წარმოვადგენდი პაროდიებს, არამარტო ბატონი შოთასი, მყავს გამოგონილი პერსონაჟებიც. რა თქმა უნდა, ამაზე ვხალისობდით. თუმცა ისე მოხდა, რომ ვიდეოც ჩავწერე და მეგობრებს მესენჯერში გავუგზავნე, ძირითადად მათ, ვინც შოთას ვიდეო იცოდნენ. ყველამ ერთად ვიხალისეთ, მაგრამ ერთ-ერთმა თავის "ფეისბუქ-გვერდზე" ატვირთა და ძალიან მალე, წუთებში, ის ბევრმა ადამიანმა გააზიარა. ჩემი მეგობარი ამას არ ელოდა, იმიტომ, რომ თვითონ დღის განმავლობაში ძალიან ბევრ რამეს დებს თავის გვერდზე - სახუმარო პოსტებს, შარჟებს და ასეთი რამ სხვა დროს არ მომხდარა. მოკლედ, ამ შედეგს არ ელოდა და მალევე აიღო, მაგრამ უკვე უამრავ ადამიანს ჰქონდა გაზიარებული, ატვირთული იყო რაღაც გვერდებზეც - კატასტროფული სისწრაფით გავრცელდა. თავიდან ჩემი მისამართით დიდი აგრესია წამოვიდა, ცუდი კომენტარები დაიწერა, ძალიან გაუჭირდათ იმის მიღება, რომ ხუმრობა იყო, ცოტა მიხვდა ამას. ჩემი მეგობარი ძალიან უხერხულ მდგომარეობაში ჩავარდა...
- ეს ალბათ იმის ბრალია, რომ დამაჯერებელი იყავი?..
- ... როცა უკვე გაიგეს, რომ ხუმრობა იყო, ძალიან ბევრი გამართლება მოჰყვა, წერდნენ, რომ მსახიობი ვარ და ამიტომ ვაკეთებ... ყველგან ვიტყვი, ეს მსახიობობის გამო არ გამიკეთებია, ასე ბევრი ერთობა, მსგავს ვიდეოებს ყველა იღებს და დებს, განურჩევლად სქესისა და ასაკისა. მსახიობობა კი ცოტა სხვა რამ არის. ეს ვინც იცის, მიხვდება, რასაც ვამბობ... მოკლედ, არ ველოდით ამ შედეგს, პირველი ორი დღე ძალიან მძიმე იყო. ჩემი რამდენიმე მეგობარი აქტიურობდა, ხალხს პასუხობდნენ, რომ ხუმრობაა, რადგანაც ხომ გეუბნებით, საშინელი კომენტარები მოდიოდა - რომ დაბოლილია, მთვრალია, ავადმყოფია, მახინჯია, რას ჰგავს? ასე გინდათ, პოპულარობის მოპოვება?! ვიმეორებ, არავის არაფერი სდომებია, მათ შორის არც პოპულარობა და მით უფრო, ასე მოპოვებული. ასე გიჟურად თავის გაცნობა, რატომ უნდა მინდოდეს?! მაგრამ მერე და მერე უკვე სხვა რაღაც ხდება ჩემს თავს, მომდის კომენტარები, მესიჯები, უამრავ ადამიანს უნდა ჩემთან დამეგობრება. დამოკიდებულება უკვე რადიკალურად შეცვლილია. თავიდან თუ აგრესია იყო, ახლა პირიქით, დიდ სიყვარულს ვგრძნობ. სამწუხაროდ, ახლა მთაში ვარ და ყველას ვერ ვპასუხობ, აქ ყველგან ინტერნეტი არ იჭერს...
თუმცა არ მინდა, იფიქრონ, რომ არ ვპასუხობ...
- მოკლედ, 5-6 დღეში მოხდა ეს ყველაფერი - გაგიცნეს, გაგლანძღეს და შეგიყვარეს. არადა, ყველაფერი ერთმა უწყინარმა ვიდეომ გამოიწვია.
- იბეჭდება მაისურებზე, "ქოუბები" გაჩნდა, საოცრება ხდება. ზოგჯერ მინდა, რომ ამ ყველაფერს სხვა თვალით შევხედო, რომ ჩემს თავს არ ხდება...
- მორიგ ვიდეოს ხომ არ გეგმავ?
- საერთოდ, გეგმებს არ ვცნობ, რადგანაც არაფერი გამოდის, როდესაც რაიმეს დავგეგმავ, ამიტომ ბევრი რამ სპონტანურად გადამიწყვეტია, ყოველთვის ასე ამართლებს, ელემენტარულად დასვენებასაც ვერ ვგეგმავ წინასწარ იმიტომ, რომ ყოველთვის არის ხელისშემშლელი ფაქტორები. საკმაოდ დაკავებული ვარ თეატრში, მაქვს როლები, რეპეტიციები, სპექტაკლები. მეტი ამის გარდა ჩემს თავს რეალურად არაფერი ხდება. მორიგ ვიდეოს როდის იღებ? - ეს ბევრმა მკითხა. ხალხი ითხოვს შემდეგს, მაგრამ აღარ ვაპირებ. ამასაც არ ვაპირებდი, ასეთი "გასროლა", თუ რა დავარქვა, არც ვიცი, შემთხვევით მოხდა. ვიმეორებ, ეს უბრალოდ, ჩემი გართობაა, რისი მასობრივად ტირაჟირების სურვილიც არ მაქვს. არ ვარ ამით დაკავებული და მგონი, არც გავაგრძელებ. ამ სახით პოპულარობა, პირდაპირ რომ ვთქვათ, ცუდია. მომავალში არ ვიცი, რა იქნება, მაგრამ ახლა ასე ვფიქრობ.
