რა საკადრო ცვლილებებია ფინანსთა სამინისტროს საგამოძიებო სამსახურში

ფინანსთა სამინისტროს საგამოძიებო სამსახურის საგამოძიებო დეპარტამენტის უფროსს ახალი მოადგილეები ჰყავს.

აღნიშნულ თანამდებობაზე კახაბერ ხურცილავა და სერგო გიორგაძე დაინიშნენ.

ამასთან, უწყებაში კიდევ ერთი საკადრო ცვლილება განხორციელდა. თანამდებობა მთავარი სამმართველოს უფროსმა ზურაბ სიჭინავამაც დატოვა, რა პოსტსაც გიორგი ელგანდაშვილი დაიკავებს.

საკადრო ცვლილებების საკითხზე ფინანსთა სამინისტროში კომენტარს ჯერჯერობით არ აკეთებენ, თუმცა არსებული ინფორმაციით, ხურცილავაც, გიორგაძეც და ელგანდაშვილიც ახალ თანამდებობაზე დანიშვნამდეც უწყებაში საქმიანობდნენ.

8 ივნისს, ფინანსთა სამინისტროს საგამოძიებო სამსახურის ახალ უფროსად ლევან გამყრელიძე დაინიშნა. მან ამ თანამდებობაზე გიორგი ბადაშვილი შეცვალა, რომელმაც მთავარი პროკურორის მოადგილის თანამდებობა დაიკავა.