"აუდიტორია 115"-ის წევრი დაკითხვაზე დაიბარეს

"აუდიტორია 115-ის" წევრი, გიორგი სოფრომაძე თბილისის პოლიციის სამმართველოში გამოკითხვაზე დაიბარეს. საქმე ეხება 9 თებერვალს "საზოგადოებრივი მაუწყებლის" შენობის წინ მიმდინარე აქციის მონაწილეების ნაწილის შეჭრას მაუწყებლის შენობაში. როგორც AMBEBI.GE- ის შს სამინისტროში განუცხადეს, ფაქტზე გამოძიება 239-ე მუხლით მიმდინარეობს, რაც ხულიგნობას გულისხმობს.

დაკითხვის პროცედურის დასრულების შემდეგ, შევეცადეთ საქმეზე გიორგი სოფრომაძისგან მიგვეღო ინფორმაცია, თუმცა სტუდენტური მოძრაობის წევრმა აღნიშნულთან დაკავშირებით კომენტარის გაკეთება არ ისურვა AMBEBI.GE-სთან.

სოფრომაძე და მისი ადვოკატი, სხვა მედიასაშუალებებთან საუბრისას აცხადებენ, რომ ჩვენებას მხოლოდ სასამართლო პროცესზე მისცემს, რომლის თარიღიც ჯერჯერობით უცნობია. ამასთან, სოფრომაძე არ გამორიცხავს, რომ შესაძლოა "აუდიტორია 115"-ის სხვა წევრებიც დაიბარონ გამოკითხვაზე თბილისის პოლიციის სამმართველოში.

ნიკა საჯაია

AMBEBI.GE