თბილისის ნაწილს წყალმომარაგება შეწყვეტილი აქვს - GWP სპეციალურ განცხადებას ავრცელებს

ვაკის, საბურთალოს, გლდანის, მთაწმინდისა და კრწანისის რაიონების ნაწილს წყალმომარაგება შეწყვეტილი აქვს. როგორც "ჯორჯიან უოთერ ენდ ფაუერის" სპეციალურ განცხადებაშია ნათქვამი , დღეს დილით, დაახლოებით, 06:35 საათზე, საქართველოს ელექტროენერგეტიკულ სისტემაში მომხდარი სისტემური ავარიის გამო, ელექტროენერგიის მიწოდება შეუწყდა კომპანია "ჯორჯიან უოთერ ენდ ფაუერის" არაგვის ხეობაში - საგურამოსა და ნატახტარში განთავსებულ ობიექტებსა და სატუმბო სადგურებს.

მიუხედავად იმისა, რომ სისტემური ავარიის აღმოფხვრა სწრაფად გახდა შესაძლებელი, წყალმომარაგების ძირითადი ობიექტების ფუნქციონირების აღსადგენად გარკვეული დრო არის საჭირო.

იხილეთ ვიდეო

არაგვის ხეობაში განთავსებული ობიექტებით დედაქალაქის მნიშვნელოვანი ნაწილი სასმელი წყლით მარაგდება. გარდა ამისა, სისტემური ავარიის შედეგად, ჰიდრავლიკური დარტყმა მიიღო საგურამოს სატუმბო სადგურიდან გამომავალმა 1400 მმ-იანმა მაგისტრალურმა წყალდენმა, რომელიც ავარიულად დაზიანდა, რამაც წყალმომარაგების შეწყვეტა გამოიწვია.

შექმნილი ვითარების გამო, ამ ეტაპზე წყალმომარაგება შეწყვეტილი აქვს ვაკის, საბურთალოს, გლდანის, მთაწმინდისა და კრწანისის რაიონების ნაწილს.

არსებული ვითარების სტაბილიზაციისთვის "ჯორჯიან უოთერ ენდ ფაუერი" საგანგებო რეჟიმში მუშაობს. წყალმომარაგების აღდგენა, დღეს, 15:00 საათიდან საღამოს 23:00 საათამდე ეტაპობრივად გახდება შესაძლებელი.

"ინტერპრესნიუსი"

გამოგვყევით, თუ დაინტრესებული ხართ მხოლოდ საზოგადოებრივი თემებით და არ გსურთ, მიიღოთ სხვა, თქვენთვის უინტერესო ინფორმაცია.

გამოიწერეთ საზოგადოების სიახლეები და იხილეთ ის თქვენს Newsfeed-ში!

AMBEBI.GE/საზოგადოება