"NDI-ს ნდობა არ მაქვს" - როგორ აფასებს კვლევის ხელისუფლებისთვის დრამატულ შედეგებს "20/30"-ის ეკონომიკის ექსპერტი

დღეს NDI-მ ახალი კვლევის შედეგები წარმოადგინა. კვლევის მიხედვით, "ქართული ოცნების" რეიტინგი 24, ხოლო "ნაციონალური მოძრაობის" 16%-ია.

რამ განაპირობა სამთავრობო პარტიის რეიტინგის კლება, ამის გაანალიზება Ambebi.ge-მ ბიძინა ივანიშვილის მიერ დაფუძნებული საზოგადოების, "20/30"-ის კონსულტანტს ეკონომიკურ საკითხებში, მიხეილ დუნდუას სთხოვა.

ნახეთ| NDI-ს განაჩენი: კვლევის ყველაზე საყურადღებო მაჩვენებლები

- ხელისუფლებამ ამ კვლევით უნდა გამოიტანოს დასკვნა და აუცილებლად გააქტიურდეს. როდესაც ქვეყანაში არის სავალუტო კრიზისი და მძიმე სოციალური ფონი, მოსახლეობის მხრიდან შესაძლოა, ბუნებრივი იყოს მთავარი აქცენტის გადატანა ეკონომიკური პროფილის სამინისტროების მიმართ. საჭიროა ნაკლოვანი მხარეების მაქსიმალურად აღმოფხვრა (მაგ: გაჭიანურებული ტენდერების პრობლემა, ბიუჯეტის არათანაბარი ხარჯვა, საპრივატიზაციო პოლიტიკის გააქტიურება და სხვა), რეალურად უნდა გადაიდგას ქმედითი ნაბიჯები. კვლევა მიუთითებს იმაზე, რომ ქვეყანაში სოციალური ფონი ძალიან გამწვავებულია და მოსახლეობა პასუხისმგებელ პირად მიიჩნევს ეკონომიკურ გუნდს, მაგრამ ჩემი აზრით, ამ შემთხვევაში აუცილებელია ეროვნული ბანკის როლის დანახვაც, რადგან სავალუტო კრიზისის გამწვავებაში ეროვნული ბანკის როლი ძალიან დიდია, თუმცაღა ბანკი კვლევაში საერთოდ არ ჩანს. მაშინ, როცა ცალსახად შეიძლება ითქვას, რომ ეროვნული ბანკის ბრალეულობა უფრო მნიშვნელოვანია, ვიდრე ფინანსთა ან ეკონომიკის სამინისტროსი. ზოგადად, NDI-ის კვლევისადმი მე არ მაქვს დიდი ნდობა, რადგან ჩვენ გვახსოვს ამ ორგანიზაციის მიერ ჩატარებული კვლევა, რომელიც აბსოლუტურად არ ასახავდა რეალობას და ეს არჩევნებმაც დაადასტურა.

- NDI-ის კვლევის მიხედვით, "ქართული ოცნების" ნდობის მაჩვენებლი კატასტროფულად დაბალი - 24%-ია. ესეც ეკონომიკური კრიზისის ბრალია?

- მოსახლეობა უკმაყოფილოა მწვავე სოციალური ფონის გამო და ბუნებრივია, რომ ეს უკმაყოფილება მთავრობის მიმართ გამოიხატება, ვინაიდან მთავრობაა პასუხისმგებელი ქვეყანაში არსებულ სოციალურ გარემოზე. ამიტომაც 2015-16 წელი იქნება მნიშვნელოვანი და გარდამტეხი წელი იმისათვის, რათა ხელისუფლებამ მოსახლეობა დაარწმუნოს, რომ ყველაფერი კეთდება იმისათვის, რათა ქვეყანაში კრიზისი აღმოიფხვრას. ეს ნაბიჯები აუცილებლად სწრაფად უნდა გადაიდგას, რათა მოსახლეობის კმაყოფილება იყოს მაღალი.

- წინა კვლევების მიხედვით, როდესაც "ქართულ ოცნებას" მაღალი რეიტინგი ჰქონდა, პარტიის ლიდერები ნდობას გამოხატავდნენ კვლევის მიმართ...

- შეიძლება ზოგი სანდოდ მიიჩნევდა კიდეც, მაგრამ პირადად მე ნაკლებად მაქვს ამ ორგანიზაციის კვლევებისადმი ნდობა, რადგან სულ სხვა იყო ხოლმე კვლევის შედეგი და რეალობა იყო აბსოლუტურად განსხვავებული.

- თქვენ ახსენეთ, რომ ქვეყანაში არის სავალუტო კრიზისი, რასაც ხელისუფლების უმაღლესი პირები არასოდეს აღიარებენ...

- ჩვენ ვართ რეგიონალურ სავალუტო კრიზისში, რადგან ლარის გარდა, გაუფასურებულია აზერბაიჯანული მანათი, სომხური დრამი და სხვა.

- თუმცა ეს გარემოება შვება არ არის მოსახლეობისათვის...

- ბუნებრივია, ეს არ არის მოსახლეობისთვის შვება, მაგრამ ფაქტია, რომ არსებობს რეგიონალური სავალუტო კრიზისი, რომელშიც საქრთველო მოყვა. ჩვენ რეგიონულ კრიზისს ვერ აღმოვფხვრით. შეუძლებელია, ლარი დაუბრუნდეს ძველ ნიშნულს, მაგრამ მნიშვნელოვანია მისი შემსუბუქება და კურსის დასტაბილურება. ამის ბერკეტი აქვს ეროვნულ ბანკს და აუცილებელია ამ ბერკეტების ამოქმედება. ამისთვის კი საჭიროა საზოგადოების მხრიდან ზეწოლა ეროვნულ ბანკზე და საერთაშორისო საზოგადოების დარწმუნება, რომ დიახ, ქადაგიძის ნაბიჯების გამოა სიტუაცია გამწვავებული, მის სწორ გადაწყვეტილებებს შეეძლო მნიშვნელოვნად შეემსუბუქებინა პროცესები. შეიძლება ცოტა მწვავედ ვაფასებ სიტუაციას და ვიყენებ ტერმინს - კრიზისი, შესაძლოა, ზოგმა ამას არც უწოდოს კრიზისი. სხვათა შორის, სესხების უმეტესობა რომ არ იყოს ფიქსირებული დოლარში, შეიძლება საერთოდ ვერ გვეგრძნო ლარის დევალვაციის უარყოფითი შედეგები, რადგან დოლარშია სესხების უმეტესობა, სწორედ ეს განაპირობებს სოციალური ფონის გამწვავებას.

- კვლევის მიხედვით, პოლიტიკოსების რეიტინგებში გიორგი მარგველაშვილი ლიდერობს, მას მოჰყვებიან ირაკლი ალასანია, დავით უსუფაშვილი, დავით ბაქრაძე და მხოლოდ ამის მერეა აღმასრულებელი ხელისუფლების პირველი პირი ირაკლი ღარიბაშვილი...

- კიდევ ვიტყვი, რომ ამ ორგანიზაციის კვლევებისადმი ნდობა არ მაქვს, შესაბაისად, როცა ნდობა დაბალია, რთულია დაბეჯითებით ვისაუბრო მის რეალურობაზე, ჩანაფიქრზე, პოლიტიკურ მოტივაციაზე და ასე შემდეგ. მე ვფიქრობ, რომ ეს კვლევა იყო პოლიტიკურად მოტივირებული, კითხვების ფორმულირება განზრახ იყო არასწორად ჩამოყალიბებული, იყო პოლიტიკურ კონიუნქტურას დაქვემდებარებული და ასე შემდეგ...

- კვლევის მიხედვით, საზოგადოება ლიდერად ისევ ბიძინა ივანიშვილს მიიჩნევს, ესეც საეჭვოდ მიგაჩნიათ?

- ადამიანი, რომელიც იყო პოლიტიკაში, აქვს გავლენა და ავტორიტეტი, როგორც პოლიტიკურ, ისე სამოქალაქო სექტორზე, ასეთი ავტორიტეტული პიროვნება შესაძლებელია, აღქმული იყო, როგორც ლიდერი. გააჩნია, როგორ იყო კითხვა ფორმულირებული და როგორ იყო პასუხი განმარტებული. ეს ყველაფერი დეტალებია, რომელიც კვლევისას ძალიან მნიშვნელოვანია.

ნახეთ| NDI-ს განაჩენი: კვლევის ყველაზე საყურადღებო მაჩვენებლები

ლადო გოგოლაძე

AMBEBI.GE