ადვოკატი ირმა ჭკადუა იური ვაზაგაშვილთან ბოლო შეხვედრას იხსენებს

ზურაბ ვაზაგაშვილის ოჯახის ადვოკატი ირმა ჭკადუა იური ვაზაგაშვილთან ბოლო შეხვედრას იხსენებს. როგორც "ინტერპრესნიუსს" ირმა ჭკადუამ განუცხადა, იგი იური ვაზაგაშვილს ერთი კვირის წინ შეხვდა.მისივე ინფორმაციით, იური ვაზაგაშვილი შემართებით იყო და როგორც ყოველთვის, ბრძოლისუნარიანობით გამოირჩეოდა. ადვოკატის ცნობით, შეხვედრაზე მათ ზურაბ ვაზაგაშვილის საქმესთან დაკავშირებულ გამოძიებაზე და ახალ დეტალებზე ისაუბრეს. ადვოკატს არ ჯერა, რომ იური ვაზაგაშვილი თავს მოიკლავდა. "მსგავს არაფერს გეგმავდა", - აღნიშნა ირმა ჭკადუამ.

"ინტერპრესნიუსის" შეკითხვაზე, ხომ არ ემუქრებოდა ვინმე იური ვაზაგაშვილს, ადვოკატმა უპასუხა, რომ ვაზაგაშვილსა და მის ადვოკატებს წინა ხელისუფლების დროს ემუქრებოდნენ. კასპის რაიონში, სოფელ ყარაფილაში, საკუთარი შვილის სასაფლაოსთან მომხდარი აფეთქებისას ზურაბ ვაზაგაშვილის მამა, იური ვაზაგაშვილი გარდაიცვალა, შემთხვევა დღეს მოხდა. აფეთქების შესახებ ორი ვერსია ვრცელდება. ადგილობრივების ინფორმაციით, ვაზაგაშვილმა თავი აიფეთქა. ასევე ვრცელდება ინფორმაცია, რომ ტერიტორია დანაღმული იყო და აფეთქება ამის შედეგად მოხდა.

"ინტერპრესნიუსი"