30
მარტიდღის ზოგადი ასტროლოგიური პროგნოზი
საქალაქო სასამართლომ ზურაბ ჟვანიას გარდაცვალების საქმეზე დაკავებული ექსპერტის, ლევან ჩაჩუას სასამართლო პროცესზე, ჟვანიასთან ერთად გარდაცვლილი, რაულ უსუპოვის მამა დაკითხა.
უსუპოვის მამამ, იაშა უსუპოვმა განაცხადა, რომ ჟვანია და მისი შვილი მოკლეს. იგი უბედურ შემთხვევას გამორიცხავს. პროცესის შემდეგ ჟურნალისტებთან საუბრისას უსუპოვმა აღნიშნა, რომ მისმა თანასოფლელმა მოლებმა, რომლებმაც გარდაცვლილი უსუპოვი განბანეს, მის სხეულზე მკერდის არეში ორი ნაჩხვლეტი შენიშნეს. სწორედ აქედან გამომდინარე, გარდაცვლილის მამა მიიჩნევს, რომ აღნიშნული ნაჩხვლეტებიდან, რომელიც ლევან ჩაჩუას საკუთარ საექსპერტო დასკვნაში არ აუსახავს, შეშვებულია შხამი.
"მკერდის თავებზე მას ჰქონდა ნაჩხვლეტები, რაც იმას მოწმობს, რომ აქედან სხეულში შეუშვეს შხამი და მოკლეს", - განაცხადა იაშარ უსუპოვმა.
პროცესის მიმდინარეობისას, სადაც უსუპოვის მამა იკითხებოდა, რამდენჯერმე მოხდა ექსპერტ ლევან ჩაჩუასა და გარდაცვლილის მამას შორის შელაპარაკება. კერძოდ, უსუპოვმა ლევან ჩაჩუას მისამართით განაცხადა, რომ ექსპერტმა უნდა თქვას სიმართლე, რომ მან საექსპერტო დასკვნის მომზადებისას შეასრულა მაშინდელი პროკურატურის დაკვეთა და დაზიანებები არ ასახა დასკვნაში.
აღნიშნულ განცხადებას უპასუხა ბრალდებულმა ჩაჩუამ. როგორც მან აღნიშნა, გულწრფელად უსამძიმრებს 10 წლის შემდეგაც უსუპოვის მამას. ამასთან ექსპერტის თქმით, იგი ნებისმიერ დროს მზად არის უპასუხოს ნებისმიერ შეკითხვას, რომელსაც გარდაცვლილის ოჯახის წევრების მხრიდან ექნება ადგილი.
"ჩემს მტერს ის უბედურება, რაც თქვენ დაგემართათ. გულწრფელად გისამძიმრებთ. ჩემი პროფესიის ფარგლებში ხშირად მხვდებოდნენ თქვენს მდგომარეობაში მყოფი ადამიანები და უმრავლეს შემთხვევაში ვაკმაყოფილებდი მათ ინტერესებს. როდესაც სასამართლო ჩემი დაკითხვის ეტაპზე გადავა, თქვენ შეგიძლიათ დამისვათ ნებისმიერ შეკითხვა და თუ ამის საშუალება მაინც არ გექნებათ, როდესაც გამოვალ ციხიდან, თუ ცოცხალი ვიქნები, შემიძლია შეგხვდეთ და ნებისმიერ თქვენს შეკითხვას ვუპასუხო. გეტყვით სიმართლეს, გინდათ ჩემს ქრისტესთან დავიფიცებ, გინდათ - თქვენს ალაჰთან", - განაცხადა ლევან ჩაჩუამ.
გარდაცვლილის მამამ ექსპერტის მისამართით კიდევ ერთი შეკითხვა დასვა - თუკი სოფლის მოლებმა, რომლებმაც გარდაცვალების მეორე დღეს განბანეს მიცვალებული და შეამჩნიეს მკერდის არეში დაზიანებები, რატომ ვერ შეამჩნია ეს ექსპერტმა.
ამის შემდეგ დაცვის მხარემ გარდაცვლილის მამას ჰკითხა, რა აძლევს მას იმის თქმის საფუძველს, რომ მისი შვილი არის მოკლული. საპასუხოდ იაშა უსუპოვმა განაცხადა, რომ მისი შვილი, რომელიც სისუფთავით გამოირჩეოდა, პრემიერთან გასვრილი ტანსაცმლით არ წავიდოდა. იაშა უსუპოვის თქმით, ტანსაცმელი, რომელიც მის შვილს გარდაცვალების მომენტში ეცვა, ტალახით იყო დასვრილი. ამასთან, როგორც მან აღნიშნა, აქვს სხვა არგუმენტებიც, რომლის საფუძველზეც ფიქრობს, რომ მისი შვილი მოკლულია და უბედური შემთხვევა არ არსებობს.
ექსპერტმა ლევან ჩაჩუამ გარდაცვლილის მამის ამ განცხადების საპასუხოდ განმარტა, რომ საექსპერტო დასკვნაში ასახა სიკვდილის მიზეზი – გაზი, ჩO. თუმცა ექსპერტის თქმით, ეს არ გამორიცხავს სხვა შემთხვევბსაც.
"ჩO-თი შესაძლებელია მოხდეს უბედური შემთხვევაც, თვითმკვლელობაც და მკვლელობაც. თუმცა ამას ამ შემთხვევაში პროკურატურამ უნდა უპასუხოს. მე ჩემს დასკვნაში აღვწერე სიკვდილის მიზეზი", - განაცხადა ლევან ჩაჩუამ.
გარდა უსუპოვის მამისა, დღევანდელ პროცესზე დაიკითხნენ იმ სოფლის მოლები, საიდანაც რაულ უსუპოვი იყო წარმოშობით. კერძოდ მათ განაცხადეს, რომ გარდაცვლილი თბილისადნ გადასვენების შემდეგ მათ განბანეს და განბანვისას სხეულზე მკერდის არეში შენიშნეს ორი ნაჩხვლეტი, ასევე ყელის არესთან შენიშნეს მუქი ფერის ზოლი.
