სამეგრელოს მთიანეთის ეროვნული პარკის შექმნის მოთხოვნით ხელმოწერების შეგროვება დაიწყო
ეგრისის, ანუ სამეგრელოს ქედისთვის ეროვნული პარკის სტატუსის მინიჭების მოთხოვნით, ხელმოწერების შეგროვება დაიწყო. კამპანიის ორგანიზატორების განცხადებით, უნიკალური ლანდშაფტი განადგურების პირასაა. ტურისტების დაუდევრობის შედეგად ტერიტორია დანაგვიანებულია, ნარჩენების გატანის მექანიზმის და სამართლებრივი ვალდებულების არარსებობის მიზეზით კი კრიტიკული ვითარება შეიქმნა.
საქართველოს სპალეოლოგთა კავშირის წარმომადგენელი რომან თოლორდავა აღნიშნავს, რომ ეროვნული პარკის სტატუსის მინიჭების შემთხვევაში, ფლორის და ფაუნის დაცვის ვალდებულება იქნება და შესაბამისი ღონისძიებებიც განხორციელდება.
"ამ ყველაფერს უფრო აკადემიური მიდგომა სჭირდება. ეგრისის ქედი ალპურ ზონაშია. იქ ხეები არ იზრდება, მაგრამ მიმდებარედ უნიკალური ჯიშები გვხვდება. არის მიკროენდემები მთლიანად ქედზე, ამიტომ ეს ძალიან დიდი და მასშტაბური საკითხია", - განუცხადა თოლორდავამ "ლაივპრესს".
მისივე თქმით, ეგრისის ქედის ეროვნული პარკის შექმნაზე უკვე დიდი ხანია მუშაობენ და შესაბამისი დოკუმენტებიც არსებობს, თუმცა ხელმოწერების შეგროვებით თემის ხელახლა წამოწევას და საზოგადოების ყურადღების კიდევ ერთხელ მიქცევას ცდილობენ. სპალეოლოგთა კავშირის წარმომადგენელი ფიქრობს, რომ ყველაზე კარგი და ობიექტური გამოსავალი სწორედ სამეგრელოს მთიანეთის დაცული ტერიტორიების შექმნაა.
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
