31
მარტიდღის ზოგადი ასტროლოგიური პროგნოზი
"მე მინდა გავხდე ქრისტე", - ასე ჟღერდა ლიტერატურული პრემია "საბა 2014"-ის პრიზიორის, ვახო მოსიაშვილის, იგივე Toresa mossy-ს პასუხი ჩემი ინტერვიუს დასასრულს. თუ რატომ მიპასუხა ასე და რა არის მისი ქრისტედ გახდომის მოტივაცია, მკითხველს ამ საინტერესო ადამიანის ლიტერატურული პორტრეტით მოვუთხრობ.
Toresa mossy-მ ლიტერატურული პრემია საბა, 2014 წლის საუკეთესო ლიტერატურული დებიუტისთვის მიიღო. მისი სადებიუტო რომანის სახელწოდებაა "სიბრძნე სიცრუისა" (გამომცემლობა "პალიტრა L"), რომელიც პირველივე ფრაზებიდან გაიძულებთ, ბოლომდე მიჰყვეთ თხრობას.
შეუძლებელია "პორტრეტის" შექმნა მწერალზე ისე, თუ მის ნაწარმოებს გვერდს აუვლი. შემოქმედებითი პროცესისთვის დამახასიათებელი გულწრფელობა უზრუნველყოფს შემოქმედის გარკვეული დამოკიდებულებების, ღირებულებების, მრწამსის საჯაროდ გამოტანას. მაგრამ მიუხედავად ამისა, მისი ბუნება არასოდეს არის გამჭვირვალე და მარტივად გასაგები საზოგადოებისთვის, ისევე როგორც მწერლის შინაგანი სამყაროს ამოცნობა - მკითხველისთვის.
იგივე ხდება Toresa Mossy-ს შემთხვევაშიც. მივდივარ ინტერვიუს ჩასაწერად, ვიცი, ყველა კითხვაზე მიპასუხებს, მაგრამ ეს პასუხები არ იქნება საკმარისი მისი სრულყოფილი პორტრეტის შესაქმნელად. თვითონაც უჭირს საკუთარ თავზე საუბარი, როცა ვთხოვ "ავტოპორტრეტის" შექმნას. თუმცა როდესაც ცდილობს დაახასიათოს საკუთარი თავი, იკვეთება მისი სიძლიერე, პრინციპულობა, მიზანდასახულობა...როგორც თვითონ ამბობს, ის ძალიან "ბევრნაირია", მაგრამ ადეკვატური. გააჩნია სიტუაციებს და კონტექსტებს. ადეკვატური იყო "საბას" დაჯილდოების ცერემონიალზეც მისი დაბნეულობა, რადგან, მისივე თქმით, იქ არსებულმა მუსიკამ, კარგად ორგანიზებულმა საღამომ, მნიშვნელობის დიდი განცდა შექმნა. ამ უკანასკნელმა კი გაამძაფრა ემოციური ფონი. მისთვის ეს ჯილდო იმ შრომის დაფასებას ნიშნავს, რომელიც ამ ნაწარმოების შექმნისას გასწია.
ის ყველაფერს შრომით აღწევს. არ სჯერა ბედისწერის და არანაირი წინასწარგანსაზღვრულობის. "ადამიანები, ხანდახან გაუცნობიერებლად, მაგრამ ყოველთვის თვითონ ქმნიან საკუთარ ბედს, საკუთარ ცხოვრებას, საკუთარ დღევანდელობას და მომავალს. როდესაც მომხდარ ფაქტებს ვაანალიზებ, ვხვდები, რომ ყველაფერი ჩემი გადაწყვეტილებიდან გამომდინარე მოხდა", - მეუბნება ინტერვიუს მსვლელობისას ისეთი დამაჯერებელი ტონით, ბედისწერასთან დაკავშირებით საკუთარი შეხედულებების გადაფასებას ვიწყებ გონებაში. და მიუხედავად იმისა, რომ მის აზრს არ ვეთანხმები, მისი თავდაჯერებულობა პოლემიკაში შესვლის სურვილს მიკარგავს.
მის სადებიუტო რომანში მთავარი მუსიკაა. მუსიკალური ნოტები კრავენ ერთ ოქტავად ნაწარმოების მთელ დრამატურგიულ ხაზს. თითქოს ნაწარმოები 7 მცირე ნაწილისგან შედგება, რომელსაც საკუთარი სიუჟეტური განვითარების ეტაპები აქვს, მაგრამ თითოეულ ნაწილს მთავარ ხაზთან ნაწარმოების მთავარი გმირი, ნოტი აკავშირებს, რომელიც საკუთარ ცხოვრებაზე, საკუთარ განცდებზე უყვება მკითხველს. ნოტი, ეს ყველაზე სახასიათო პერსონაჟია - ის კონკრეტულ ნოტებს (დო, რე,მი, ფა, სოლ, ლა, სი) შორის ყველაზე ზოგადია, მაგრამ ყველაზე მთავარი. ნოტი ხომ ამოსავალი წერტილია. ნოტები ქმნიან მუსიკას, მთავარი ნოტების არსებობაა. მაგრამ, როდესაც მათ სახელებს არქმევ, უკვე კონკრეტული მელოდია იქმნება. ეს არის წიგნის მთავარი გმირის ცხოვრება მუსიკაში, სადაც მუსიკის შემქმნელიც, დირიჟორიც და თავად მუსიკალური საკრავის ნაწილიც მთავარი პერსონა - ნოტია. ნოტი ცენტრია. მის მიერ შექმნილი სამყაროს ცენტრი და აქ ყველა მელოდია მის გარშემო იქმნება. ნოტი თან შემოქმედია, თან მაყურებელი. ის პერსონაჟიცაა და ავტორიც. ის თითქოს საკუთარი თავიდან გამოდის, და აკვირდება უკვე მკითხველის თვალით მის მიერ შექმნილ სამყაროს.
ავტორი ამჟამად უკვე ახალ რომანზე მუშაობს, რომელშიც მოქმედება, პირველი რომანის მსგავსად, თელავში განვითარდება. თუმცა, მისივე თქმით, ამ შემთხვევაში არ იქნება აქცენტი გაკეთებული სივრცეზე. ახალ რომანში ავტორი წინა პლანზე შურისძიების სურვილით დამძიმებული ადამიანების თემას წამოწევს. ასვე მნიშვნელოვანი იქნება კონფლიქტის თემა. კონფლიქტი, რომელიც ჩნდება ადამიანის შინაგან სამყაროსა და მის მიერ მიღებულ გადაწყვეტილებებს შორის. ავტორის თქმით, ადამიანი შინაგანად მრავალფეროვანი არსებაა, რომლის არსიც არ განისაზღვრება კონკრეტული ქმედების, ან კონკრეტული ფიქრის მიხედვით.
ქმნის პროზას, ქმნის მუსიკას. მისთვის მუსიკა მთელი ცხოვრებაა. "მე ვერ ვიხსენებ პერიოდს, როდესაც ჩემს ცხოვრებაში არ იყო მუსიკა, მე მუსიკაში ვცხოვრობ. ჩემთვის ყველაფერს აქვს თავისი ხმა, მე ამ ხმას ვაძლევ კონკრეტულ ფორმას და იქმნება რაღაცა ტიპის კომპოზიცია", - ამბობს Mossy.
პირველი ბენდი 1998 წელს შექმნა. დაახლოებით 5 წლის შემდეგ ბენდიდან წამოვიდა. მას შემდეგ, სხვადსახვა მეგობრების დახმარებით, წერს სიმღერებს და მართავს "ლაივებს".
ამ ეტაპზე ახალ მუსიკალურ პროექტზე მუშაობს - " ახალი პროექტი გვაქვს, ეს არის "ტექნო", რომელსაც მალე შევთავაზებთ საზოგადოებას. ამ პროექტს ვახორციელებ ორ მეგობართან - დავით ადამაშვილთან და ანრი ლომიასთან ერთად. პროექტის სახელწოდებაა "გათვლა". ახლა გამოვაქვეყნებთ "თრექებს" და სავარაუდოდ, ნოემბრისთვის მზად ვიქნებით ცოცხალი შესრულებისთვის", - აანონსებს Toresa mossy და საკმაოდ უცნაურ პასუხს მცემს ბოლო შეკითხვაზე, რომელიც მისთვის ყველაზე მთავარ ღირებულებას ეხება:
"მე ძალიან მინდა გავხდე ქრისტე, ანუ მივიდე იქამდე, სადაც იყო ქრისტე. ჩემთვის ქრისტიანობის იდეა ძალიან მნიშვნელოვანია. მინდა გავხდე ისეთი, როგორიც იყო ქრისტე. არ ვიცი, რამდენად შესაძლებელია, მაგრამ მცდელობაა მთავარი"...
თამარ კორკოტაშვილი, AMBEBI.GE
