რეპორტაჟი ემზარ კვიციანის სასამართლო პროცესიდან
კოდორის ხეობის ყოფილი რწმუნებულის ემზარ კვიციანის საქმის არსებითი განხილვა ზუგდიდის რაიონული სასამართლოში 6 საათს მიმდინარეობდა. პროცესზე ბრალდების მხარის ის მოწმეები დაკითხეს, რომლებიც 2006 წელს კოდორის სპეცოპერაციაში მონაწილეობდნენ. ემზარ კვიციანს პროკურატურა სახელმწიფოს წინააღმდეგ ამბოხებასა და შეიარაღებული დაჯგუფების შექმნაში ადანაშაულებს.
დღევანდელ სხდომაზე მოსამართლეს ბრალდების მხარის არცერთი შუამდგომლობა არ დაუკმაყოფილებია. თავდაპირველად კვიციანის ადვოკატმა კობა კობახიძემ სასამართლოს შუამდგომლობით მიმართა, საქმის მასალებში შესულიყო ვინმე პეტრე დევიშაძის გამოკითხვის ოქმი, სადაც ის აცხადებს, რომ ემზარ კვიციანის ლიკვიდაცია ყოფილი ხელისუფლების პერიოდში აჭარის კონსტიტუციური უსაფრთხოების დაცვის დეპარტამენტის მაშინდელი ხელმძღვანელის, თეიმურაზ პატარიძის ბრძანებით უნდა მოეხდინა. დევიშაძის მიერ დაწერილ ჩვენებაში ნათქვამია, რომ ბრძანების გაცემის შემდეგ აჭარის კუდის უფროსმა განუმარტა რომ "დავალება ზემოდან, ვანო მერაბიშვილისგან მოდიოდა." ლიკვიდაციის სანაცვლოდ კი დევიშაძე დამკვეთებისგან 100 ათას დოლარს მიიღებდა. დევიშაძეს კვიციანი მოსკოვში უნდა მოეკლა. როგორც ბრალდებულის ადვოკატები ყვებიან დევიშაძე მათ თავად დაუკავშირდა და მზადაა, სასამართლოს გამოკითხვის ოქმში დაწერილი პირადად მოახსენოს.
ამ მასლის საქმეში შეტანის უფლება მოსამართლე შოთა ბიჭიამ ადვოკატებს არ მისცა და განაცხადა, რომ შუამდგომლობის წარდგენა პროცედურების დარღვევით მოხდა.
მოწმის სახით დაკითხული შინაგან საქმეთა სამინისტროს თანამშრომლები აცხადებენ, რომ კვიციანის შეიარაღებული დაჯგუფებისგან მორალური ზიანი მიადგათ. მოწმე გიორგი გაფრინდაშვილმა სასამართლოს განუცხადა, რომ მისთვის ყველაზე დიდი ზიანი ის იყო, რომ კოდორში ქართველი ქართველს ესროდა. კვიციანის ინტერესების დამცველის კითხვაზე, რა კავშირი ქონდა ემზარ კვიციანს ამ ყველაფერთან და რა ზიანი მიიღო პირადად კვიციანისგან, გაფრინდაშვილმა ვერ უპასუხა. მოწმემ ვერ გაიხსენა, რამდენი სამართალდამცავი, რამდენი ავტომანქანით ავიდა კოდორის სპეცოპერაციის ჩასატარებლად, კითხვების უმეტესობაზე მოწმე პასუხობდა, რომ ფაქტებს ვერ იხსენებდა.
გიორგი გაფრინდაშვილისგან განსხვავებით, მოწმე ორენჩი მარზოევი მისთვის მიყენებულს ზიანს ასაბუთებს და აცხადებს, რომ 2006 წლის კოდორის სპეცოპერაციის დროს ხეობაში განვითარებული მოვლენების გამო ნერვიულობის ფონზე ორსულ მეუღლეს მუცელი მოეშალა და ჩვილი დაეღუპა. კვიციანმა ამ ბრალდებას აბსურდული უწოდა და მარზოევს ურჩია, არა მისთვის, არამედ ამ სპეცოპერაციის დამგეგმავებისთვის ეჩივლა.
კვიციანის პროცესს დღეს ხმაურის გარეშე არ ჩაუვლია. მოწმე მირზოევის დაკითხვის დროს დარბაზში მყოფმა ირაკლი ბათიაშვილმა განაცხადა, რომ "მირზოევი კრიმინალურ ბანდას ემსახურებოდა, სააკაშვილს, ოქრუაშვილს და მერაბიშვილს." ამ წამოძახილის შემდეგ ბათიაშვილმა თავდაცვის ყოფილ მინისტრ დავით თევზაძესთან და რამდენიმე დამსწრესთან ერთად დარბაზი დატოვა.
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
