ეროსი კიწმარიშვილის საარჩევნო შტაბის თანამშრომლის ანი ხოშტარიას ინფორმაციით, ეროსი კიწმარიშვილი იარაღს არ ატარებდა.
როგორც "ინტერპრესნიუსთან" საუბრისას ანი ხოშტარიამ აღნიშნა, ის თვითმკვლელობის ვერსიას გამორიცხავს. "მიუხედავად იმისა, რომ დამარცხდა არჩევნებში, მას დიდი გეგმები ჰქონდა, აპირებდა მოსახლეობისთვის დანაპირები მაინც შეესრულებინა. ის თავს არ მოიკლავდა და მას იარაღი არ ჰქონდა", - აღნიშნა ხოშტარიამ.
ეროსი კიწმარიშვილის გარდაცვალების ფაქტზე პროკურატურამ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს, - ამის შესახებ "ინტერპრესნიუსს" მთავარი პროკურატურის პრესსამსახურში განუცხადეს.
გარდაცვალების ადგილზე ამ წუთებში კრიმინალისტები მუშაობენ. როგორც "ინტერპრესნიუსის" კორესპონდენტი შემთხვევის ადგილიდან იუწყება, ეროსი კიწმარიშვილის სახლთან მობილიზებული არიან სამართალდამცველები; ასევე, შეკრებილია ხალხი.
მეზობლების განცხადებით, ეროსი კიწმარიშვილის ცხედარი მის ავტოფარეხში დაცვამ იპოვა. ამ დროისთვის პოლიციას მიმდებარე ტერიტორია გადაკეტილი აქვს და კორპუსში არავის უშვებენ. ტრაგედიის ადგილზე ცოტა ხნის წინ შეუშვეს ეროსი კიწმარიშვილის მეუღლე ია კიწმარიშვილი.
შემთხვევა ვაკეში, ჭავჭავაძის გამზირზე მოხდა.
"ინტერპრესნიუსი"
