3
აპრილიდღის ზოგადი ასტროლოგიური პროგნოზი
საპარლამენტო უმცირესობის, "ნაციონალური მოძრაობის" ერთ-ერთი ლიდერი, გივი თარგამაძე Facebook-ის პირად გვერდზე ჩანაწერს აქვეყნებს, სახელწოდებით "თვალთმაქცობის ქრონიკები". ტექსტში ის ირაკლი ღარიბაშვილის განცხადებას აქილიკებს, რომელშიც პრემიერი ამბობს, რომ ასოცირების ხელშეკრულებას ხელს თავად მოაწერს.
ამავე ჩანაწერში თარგმაძე პრემიერის ბიზნესმენებთან შეხვედრასაც ეხმაურება.
Facebook/ გივი თარგამაძე, "ნაციონალური მოძრაობა":
"თვალთმაქცობის ქრონიკები:
1. ოცნების მეგობრულ გუნდში საბოლოოდ გაირკვა ასოცირების ხელშეკრულებაზე ხელმომწერი - პრეზიდენტს ჩუმად ამოკვნესილზე, რომ წესით ის უნდა აწერდეს, რიხიანად დასძახეს, რომ არც კი იფიქროს, ვინაიდან, სულ ფეხები რომ გააფიჩინოს, მას მთავრობა არ მისცემს აუცილებელ თანხმობას. არ უთქვამთ, მაგრამ სახეზე ეტყობოდათ, რომ კიდევ რამეს თუ იტყვის მარგველაშვილი, სახალხოდ დაალეწავენ თავპირს. ჭეშმარიტად, მეგობრული, გუნდური გადაწყვეტილებაა. ხელმომწერი კი, რა თქმა უნდა, იქნება ღარიბაშვილი, რამეთუ ბიძინი ერთია და ჰაკიმი - ფაშა მისი!
2. ბიზნესმენებთან შეხვედრაზე ჰაკიმმა თქვა, აი თქვენ ბიზნესომბუცმენი გიორგი გახარია და მხოლოდ ის ერთია ხიდი ჩემთანო. არადა, დარბაზში იჯდა უჩა მამაცაშვილი და იქ მჯდომმა თითოეულმა ბიზნესმენმა იცოდა, რომ მხოლოდ ის არის ხიდი ბიძინთან და ჰაკიმი მხოლოდ ფაშაა ბიძინისი და აბა რა აზრი აქვს გახარიას, რომელსაც, თანაც, უჩა იქვე ერთი საათი მოძღვრავდა და დავალებებს აძლევდა. რა თქმა უნდა, მიუხედავად გახარიას მიკნავებული მცდელობისა, აეხსნა, რომ ის დამოუკიდებელი ფიგურაა, ასეთი სისულელე არავის აზრადაც არ მოსვლია;
3. დარბაისელი, რომელმაც მერაბიშვილი საკნიდან გაიყვანა და ჯილდოდ ბევრი ფულებით გამოივსო ჯიბეები, გადადგა და ამისთვის ჰაკიმისგან ქების კასკადები დაიმსახურა, პატრიოტიაო, გმირიაო, ზესამუშაო შეასრულაო - აკი თქვა კიდეც ბიძინმა, გაიყვანა და რა, ხომ არ გააუპატიურაო!
4. მოროშკინამ ერთ გამოსვლაში შსს მამლის ყივილამდე სამჯერ მოიხსენია ზედელაშვილის უწყებად. აბა ბუნჩულა? რა იქნა ჭიკაიძე? დარიალშია. სერზე დგას პიპინია ერისთავივით და ცდილობს, მარცხენა ფეხის ნეკით გადაჭრას პრობლემა. როცა კითხავენ, პიპინია, შენ ვინ გკითხავდა სამხედრო სტრატეგიასო, იტყვის, მაგ სფეროში მე არაკომპეტენტური ვარო. ვცხოვრობთ, რა", - წერს თარგამაძე.
