საარჩევნო კომისიებში დასაქმებული პენსიონერები, ხელფასთან ერთად პენსიას ვეღარ მიიღებენ

კანონის თანახმად, საჯარო სამსახურში დასაქმებულ საპენსიო ასაკის ადამიანებს, რომლებიც იღებენ ხელფასს, არ აქვთ უფლება, აიღონ პენსია, - ამის შესახებ საქართველოს შრომის, ჯანმრთელობისა და სოციალური დაცვის მინისტრმა, დავით სერგეენკომ დღეს გამართულ პრესკონფერენციაზე განაცხადა.

მინისტრმა უპასუხა "ინტერპრესნიუსის" კითხვას, რომლის თანახმადაც, საარჩევნო კომისიაში დასაქმებული პენსიონერები ცენტრალურ საარჩევნო კომისიაში მუშაობის პერიოდში პენსიას ვერ მიიღებენ. მინისტრის განმარტებით, იმ შემთხვევაში, თუ სოციალურად დაუცველი პირები მიიღებენ მონაწილეობას საარჩევნო კომისიის მუშაობაში, ისინი კვლავ მიიღებენ დახმარებას, ხოლო ასეთ შემთხვევაში პენსიონერებისთვის პენსია არ გაიცემა.

"შარშან, ივლისში ჩვენ ინიცირება გავაკეთეთ და მთავრობა დაგვეთანხმა, რომ გავრცელებულიყო ერთგვარი მორატორიუმი მათზე, ვინც 2013 წლის პირველ სექტემბრამდე კანონის დარღვევით არ შეატყობინა არავის, პენსიაც აიღო და ხელფასიც, ეს გაქვითულიყო, ანუ გამოცხადებულიყო რესტრუქტურიზაცია, თუმცა კანონი მოქმედებს და ის, ვინც საჯარო სამსახურში მუშაობს და სხვაგან დაიწყებს მუშაობას, გარდა საგანმანათლებლო დაწესებულებისა, არსებული კანონებით მათ იმ პერიოდში გაუჩერდებათ პენსია", - აღნიშნა დავით სერგეენკომ.

რაც შეეხება კერძო სექტორში მომუშავე პენსიონერებს, მინისტრის განმარტებით, კერძო სექტორში მომუშავე პენსიონერებს შეუძლიათ, აიღონ როგორც პენსია, ასევე დასაქმდნენ სხვაგანაც, აიღონ ხელფასი, თუმცა თუ მათ მუშაობა დაიწყეს საარჩევნო კომისიაში, ეს უკვე საჯარო სამსახურია და ასეთ შემთხვევაში საჯარო სამსახურში მუშაობის პერიოდში მათ პენსია გაუჩერდებათ.

რაც შეეხება სოციალურად დაუცველ პირებს, დავით სერგეენკოს განმარტებით, არსებული კანონმდებლობით, რომელიც ძალაშია 2010 წლის შემდეგ, როდესაც სოციალურად დაუცველებს გაუჩნდებათ ახალი შემოსავალი, თუნდაც საარჩევნო კომისიაში დროებითი სამსახური, მათ უნდა მოხსნოდათ და ერთი წლის განმავლობაში არ უნდა აღდგენოდათ სოციალური დახმარება, თუმცა, მთავრობის დადგენილებით, როდესაც შემოსავალი სოციალურად დაუცველების შემთხვევაში დაკავშირვბულია საარჩევნო კომისიაში მუშაობასთან, მათზე ვრცელდება მორატორიუმი და აღნიშნულ პირებს არ ეხსნებათ სოციალური დახმარება.

გარდა ამისა, როგორც დავით სერგეენკომ განმარტა, წინასაარჩევნო პერიოდში კანონით რაიმე საკანონმდებლო ინიციატივა იკრძალება, რომელიც ახალი თანხების მობილიზაციასთან არის დაკავშირებული.

"ამ პერიოდში, 15 ივნისამდე ჩვენ მოკლებული ვართ კანონის შესაბამისად შესაძლებლობას რაიმე ახალი მორატორიუმის ინიცირება გავაკეთოთ", - აღნიშნა დავით სერგეენკომ.

ამასთან, 2012 წლის საპარლამენტო და 2013 წლის საპრეზიდენტო არჩევნების დროს პენსიონერებზე ზემოაღნიშნული შეზღუდვა არ მოქმედებდა და სინი საარჩევნო კომისიის ხელფასს პენსიასთან ერთად იღებდნენ.

"ინტერპრესნიუსი"