წარმოიდგინეთ - მიდის ადგილობრივ ტატუს სალონში წინადღეს კარგად ნაქეიფარ-"ნაგულავები" ქართველი მამაკაცი და, - ხელზე წარწერა - "ღვინო, დუდუკი, ქალები" ამომისვირინგეო, - ეუბნება ოსტატს. ძალიან სულელურად დავიწყე, არა? მსგავსი რამ აზრადაც არ მომივიდოდა, მაგრამ "ფეისბუკში" რას არ ნახავ?! მოკლედ, ახლა ერთ უცნაურ ნაძლევზე მოგიყვებით. ეს ამბავი არცთუ ისე დიდი ხნის წინ მოხდა ნორვეგიაში.
18 წლის ახალგაზრდა - სტენ იეტერდალი ერთ დღეს ტატუს სალონში მივიდა და, - "მაკდონალდსის" მენიუ ამომიტვიფრეთო, - ითხოვა. გაოცდნენ ტატუს ოსტატები, მაგრამ ბიჭმა ისინი საკუთარი ნათქვამის სერიოზულობაში დაარწმუნა და რამდენიმე საათში ტატუ მზად იყო. ეჰ, სულაც არ უნდოდა სტენს ასეთი გზით მოპოვებული პოპულარობა, მაგრამ საქმე ისაა, რომ წინადღეს მეგობრებთან ნაძლევი წააგო და იძულებული გახდა, ეს ნაბიჯი გადაედგა.
სტენი:
"დავნაძლევდით, რომ ერთ გოგოს შევაბამდი, ხოლო თუ ამას გარკვეული დროის მანძილზე ვერ მოვახერხებდი, ხელზე "მაკდონალდსის" მენიუ უნდა ამომეტვიფრა ან... თოჯინა "ბარბი" - უკანალზე. მეც, რა თქმა უნდა, პირველი ვარიანტი ვარჩიე".
სტენის ასეთ საქციელს მისი მშობლების რისხვა მოჰყვა. დედამ შვილის ტატუ გაზეთში ნახა და იქვე გული წაუვიდა. ამან მამა უფრო განარისხა და შვილს ელექტრონული ფოსტით ამცნო, გერჩივნოს, ხელმოკვეთილი დაბრუნდე სახლში, ვიდრე ასეთი სვირინგით დამშვენებულიო.
ახლა კი რაც შეეხება ტატუს ოსტატს. თავიდან, როცა სტენის სურვილი მოისმინა, ცალი წარბი ასწია, მაგრამ მერე საქმეს შეუდგა და დასასრულს, თავის ნამუშევარს ფოტო გადაუღო, რომელიც, რა თქმა უნდა, საბოლოო ჯამში, "ფეისბუკზე" მოხვდა სათაურით - "ჩემი საუკეთესო ნამუშევარი". დღეს ამ ფოტოს 10 ათასი მოწონება და დაახლოებით 230 გაზიარება აქვს, ხოლო ტატუს სალონი, სადაც ის გაკეთდა, კლიენტებს ვერ აუდის. და კიდევ ერთი რამ: ოსტატმა ერთ-ერთ გაზეთში მიცემულ ინტერვიუში განაცხადა, - ნამდვილად არ ვაპირებ მთელი ცხოვრების ტატუს სალონში გატარებას, ჰოდა, "მაკდონალდსი" ვალდებულია, უფასო პიარისთვის მომავალში ჩემი სამსახურით უზრუნველყოფაზე იზრუნოსო. ღმერთმა დაგვიფაროს, ვიღაცას ახლა აქ წაკითხული ჭკუაში დაუჯდეს, თორემ კერძების ნაირსახეობები მერე ნახეთ თქვენ!.. ისე, ქართველებმა სმა-ჭამა ლამის ქვეყნის ერთადერთ ღირსშესანიშნაობად ვაქციეთ, რადგანაც ვინც ჩვენთან სტუმრად უცხოეთიდან ჩამოდის, ეგრევე რესტორანში მიგვყავს; ვასმევთ, ვაჭმევთ, დავათრობთ და მერე ამ პროცესს ქვეყნის ყველა ტელეარხი აშუქებს.
ხუმრობა იქით იყოს და, ნამდვილად არ გვაქვს სახუმაროდ საქმე. ადრეც ვახსენე და ახლაც შეგახსენებთ, რომ არის "ფეისბუკში" ერთობ სასარგებლო გვერდი სახელად "მატყუარა კომპანიები", რომელიც შესაძლებლობისდა გვარად ცდილობს აგვარიდოს უხარისხო და ჯანმრთელობისთვის საზიანო პროდუქციის ყიდვას. ჰოდა, ფოტომ, რომელიც ამ გვერდმა გააზიარა, ნახევარი "ფეისბუკი" შოკში ჩააგდო. "ოჯახი მოდის შოპინგზე" ჰქვია და მასზე - არც მეტი, არც ნაკლები - ვირთხებია გამოსახული ერთ-ერთ ბოსტნეულით მოვაჭრის დახლზე. ლოკაცია "დელისის" მეტროა. კომენტარებიდან გამომდინარე მისახვედრია, რომ ფოტო მპოსტავებში რატომღაც, ისტერიულ სიცილს იწვევს, რომელიც ბოლოს აღშფოთებაში გადადის. სწორედ რომ ამაზეა ნათქვამი - სასაცილოა, სატირალი რომ არ იყოსო. სხვა არაფერი დაგვრჩენია, სიცილის, ტირილისა და მერე ყოველივე ამის "ფეისბუკში" გაზიარების გარდა. მღრღნელების დასახოცად არ გვცალია, რადგანაც პოპულარული თემა ჩვენში კვლავაც პოლიტიკაა.
იმავე გვერდზე ვრჩები და ჩვენს ქალაქში არსებულ კიდევ ერთ პარადოქსულ ფაქტს ვამონიტორებ.
ბელგიური ტექნოლოგიით დამზადებულ სამარხვო ძეხვეულზე თუ გაგიგონიათ რამე? მთელი "ფეისბუკი" ბჭობდა გასულ კვირას, თუ რისგან იყო დამზადებული რაკურსში მოხვედრილი პროდუქცია. ვიღაცამ იკითხა, - ხომ არ იცით, ვირთხა "სამარხვო ცხოველიაო"? ვიღაცამ უპასუხა, - რას ამბობ? ამ პროდუქციის მთავარი კომპონენტი ტუალეტის ქაღალდიაო. თუმცა აღმოჩნდნენ ისეთებიც, ვინც ამტკიცებდა, რომ ზემოხსენებული ძეხვის მთავარი ინგრედიენტი წიწიბურა იყო. ისე, მარხვა რისი მარხვაა, თუ გამოსავალი ეძებე და გემრიელი კერძები მიირთვი?!
შემდეგი გამონიტორებული პოსტი მარიხუანის ლეგალიზაციის მოსურნე ქართველ მომხმარებლებს გაახარებს. ის ერთ-ერთმა უცხოურმა საინფორმაციო პორტალმა გაავრცელა სოციალურ ქსელში და მკითხველები აახმაურა.
მსოფლიოს უმსხვილესი თამბაქოს მწარმოებელი კომპანია "ფილიპ მორისი" მარიხუანის ლეგალიზების მომხრეთა რიგს შეუერთდა და ისეთი სიგარეტის წარმოება დააანონსა, რომლის ერთ-ერთი მთავარი შემადგენელი კომპონენტი კანაბისი იქნება. მარლბორო-M ერქმევა ასეთ სიგარეტს და ძირითადად, კოლორადოსა და ვაშინგტონის შტატებში გაიყიდება, რადგანაც ეს უკანასკნელნი სენატში მარიხუანის ლეგალიზაციის კანონპროექტის დამტკიცებისთვის აქტიურად იბრძვიან. "ფილიპ მორისმა" უკვე დაიწყო პარაგვაისა და მექსიკაში უმსხვილეს ნარკობოსებთან მოლაპარაკებები ნედლეულის მოწოდებასთან დაკავშირებით. კომპანია აგრეთვე აპირებს 5 მილიონი დოლარის გამოყოფას მარლბორო-M-ის პრომოუშენისთვის და პროექტი სტარტს სავარაუდოდ, 2015 წლის დასაწყისში აიღებს.
ქეთი ნიკოლავა
ჟურნალი ”გზა”
(გამოდის ხუთშაბათობით)
