ღირს, საერთოდ, შაურმის ჭამა?

შაურმა, თურქული სიტყვაა და ნიშნავს "მოტრიალეს". ეს ზუსტად მიგნებული სახელი მგონია, რადგანაც ვინც შაურმას მიირთმევს, იმას სულ ხათაბალა უტრიალებს. თბილისს ჯერ თავისი შაურმა არ ჰქონდა მონელებული, რომ რამდენიმე დღის წინ ბათუმში შაურმით 20 ადამიანის მოწამვლის ფაქტი დადასტურდა. სურსათის ეროვნული სააგენტოს ინფორმაციით, სააგენტოს აჭარის რეგიონალური სამმართველოს წარმომადგენლებმა ბათუმში ჭავჭავაძის #7-ში მდებარე საშაურმიდან ნიმუშები ინფორმაციის მიღებისთანავე აიღეს და შესამოწმებლად აჭარის სოფლის მეურნეობის სამინისტროს "ლაბორატორიულ კვლევით ცენტრს" გადაუგზავნეს, ბიზნესოპერატორს კი საწარმოო პროცესი შეუჩერეს. ამავე დროს საშაურმე დარღვევის გამო კანონმდებლობის მიხედვით 1000 ლარით დაჯარიმდა. რა დაადგინა კვლევამ? რით იყო დაბინძურებული აჭარული შაურმა?

"ალია" კომენტარისთვის დაუკავშირდა სურსათის ეროვნული სააგენტოს საზოგადოებასთან ურთიერთობის ინფორმაციული უზრუნველყოფისა და მომსახურების დეპარტამენტის უფროსს გიგა ქურდოვანიძეს.

- აჭარაში, ბათუმის ინფექციურ საავადმყოფოს მიმართა 20-მა ადამიანმა და ყველანი აცხადებდნენ, რომ შეიძინეს შაურმა ჭავჭავაძის #7-ში მოთავსებულ ერთ-ერთ საშაურმეში. შაურმის შეძენა 24 იანვარს მოხდა და მოწამვლა უკვე 25-ში დაფიქსირდა. იმავე დღეს ჩვენმა ადგილობრივმა სამსახურებმა აიღო ნიმუშები ამ საშაურმიდან, რომელიც გადაგზავნილი იქნა შესამოწმებლად და ასევე შემოწმდა თავად საშაურმეც, სადაც აღმოჩნდა დარღვევები. ახლა კი ჩემთვის ცნობილი გახდა ლაბორატორიული კვლევის შედეგები, დადგინდა, რომ თავად შაურმაში იყო მაღალი მიკრობიოლოგიური მაჩვენებლები, კერძოდ, ნიმუშში აღმოჩნდა ნაწლავური ჩხირის ბაქტერიები, რაც მიუთითებს იმას, რომ სანიტარულ-ჰიგიენური პირობები არ იყო დაცული. ეს თვალითაც ჩანდა და, შესაბამისად, ეს საშაურმე დაჯარიმდა და შეჩერდა საწარმოო პროცესი, რაც არ განუახლდება, სანამ არ აღმოფხვრის იმ დარღვევებს, რომელიც აქვს და არ გაითვალისწინებს იმ რეკომენდაციებს, რაც ჩვენმა სპეციალისტებმა მისცეს.

- ეს ჩხირები, რაც ჩამოთვალეთ, ორგანიზმისთვის რამდენად დიდ საფრთხეს წარმოადგენს?

- ამ კოლიბაქტერიებმა სიკვდილი შეიძლება, არ გამოწვიოს, მაგრამ მოწამვლა რა დონეზე განვითარდება, ეს ყველაფერი ადამიანის ორგანიზმზეა დამოკიდებული. თავისთავად კოლიფორმების გადამეტებული არსებობა საკვებში, პირდაპირ მიანიშნებს იმას, რომ შაურმა იყო დაბინძურებული. როგორც ჩემთვის გახდა ცნობილი, ბათუმის ინფექციურ საავადმყოფოში აღებული თავად მოწამლულების ანალიზში კიდევ სხვა ბაქტერიებიც იყო გამოვლენილი. შიძლება, ის შაურმაც მათ მირთვეს, ის პარტია კიდევ სხვა რამით იყო დაბინძურებული. მაგრამ ჩვენ მეორე დღეს ავიღეთ ნიმუშები და ცხადია, წინა დღის პარტია უკვე გაყიდული იყო, მაგრამ სპეციალისტების თქმით, ხსენებული საშაურმის უპირველესი პრობლემა იყო სანჰიგიენური პირობები.

- შაურმა არის ის პროდუქტი, რომელიც ყოველი ფეხის ნაბიჯზე იყიდება და ძალიან ბევრი მომხმარებელი ჰყავს, რატომ არ ხდება მისი ხორცის შემოწმება? მაინცდამაინც ვინმე უნდა მოიწამლოს, რომ განგაში ატყდეს? ეგება და ვიღაცა მოკვდეს კიდეც შაურმით?

- კი, ძალიან ბევრია ეს საშაურმეები, მაგრამ ჩვენ ყოველ კვირას საშაურმეებში ვერ ვივლით, ჩვენ გვაქვს წლიური გეგმა შედგენილი და იგივე, საშაურმეები და სწრაფი კვების ობიექტები, რომლებიც მაღალ რისკის შემცველები არიან, ჩვენთვის პრიორიტეტული გახლავთ.

- კი, მაგრამ სანამ თქვენ ამ ობიექტებს ჩამოუვლით... პერიოდულად გვესმის ხოლმე, რომ იქ ხან ძაღლის ხორცია და ხან ვირისო.

- არა, არა... ვირის ხორცის არსებობას საშაურმეებში ნამდვილად ვერ დავადასტურებ. ამის შესახებ რომ გაჟღერდა ინფორმაცია, ჩვენ დავიწყეთ ამ ობიექტების მყისიერი შემოწმება, რამდენიმეს შევუჩერეთ წარმოების უფლება, ბევრს რეკომენდაციები მივეცით, მაგრამ არც ვირის, არც ცხენის ხორცი არ დაფიქსირებულა არსად. გარდა ამისა შევამოწმეთ მცირე მარკეტები, ხორცის წერტილები, ასევე სახინკლეები, რესტორნები, სადაც შეიძლება, რომ ეს ხორცი ფარშის სახით მოხვედრილიყო, არაფერი დადასტურდა. საშაურმეები ხმარობენ გაყინულ ღორისა და ქათმის ხორცს, დანარჩენი გამორიცხულია. როგორც კი ვირის ხორცის სასაკლაოს შესახებ გავრცელდა ინფორმაცია, იმ წამსვე მივაწოდეთ ეს ინფორმაცია შსს-ს, მათ ჩაატარეს მოკვლევა და გამოირკვა, რომ ეს იყო ერთ-ერთი მეწარმის საკუთრება, რომელსაც ხელშეკრულება ჰქონდა დადებული ზოოპარკთან და შესაბამისად, ეს ხორცი იქ მიდიოდა და არა საშაურმეებში. თუმცა, ეს არ გვაძლევს იმის საშუალებას, რომ გავჩერდეთ, მშვიდად ვიყოთ და ამ მიმართულებით კიდევ გრძელდება მუშაობა. ეს საკითხი არის უმკაცრესი კონტროლის ქვეშ აყვანილი. ისე, თავად მეწარმეზეც ბევრია დამოკიდებული და მის კეთილსინდისიერებაზე, მაგრამ, ვიმეორებ, ჩვენც ვაკონტროლებთ.

- უკვე არაერთხელ მსმენია რომ ბაზრებსა და ბაზრობებზე ძაღლის ხორცი იყიდება ცხვრისა და ხბოს ხორცის ნაცვლად. რა ხდება?

- ასეთი რამე გამორიცხულია. ძაღლის ხორცისა და საქონლის ხორცის გარჩევა ძალიან ადვილია, ძაღლს სხვაგვარი ფაქტურა და იერი აქვს, ანდა ძაღლს რამდენი ხორცი უნდა ჰქონდეს, რომ ის გამოიტანო და გაყიდო ბაზარში? ძალიან ადვილად გამოარჩევთ ცხენის ხორცს იგივე ძვლის ფორმის მიხედვით, მჟავიანობაც მეტი აქვს ცხენს. რაც შეეხება ვირის ხორცს, ის მაშინვე შავდება, როგორც კი დაკლავენ და არასასაქონლო სახე აქვს. კიდევ ერთხელ ვიმეორებ, რომ ამაზე კონტროლი ძალიან გამკაცრებულია, ჩვენი თანამშრომლები ყოველდღე დადიან ბაზარში და, პირველ რიგში, ამოწმებენ სწორედ ხორცისა და თევზის სექციებს. ასე რომ, მსგავსი გამორიცხეთ, არ არსებობს ასეთი რამ ბაზარში.

თამარ ოქრუაშვილი

გაზეთი "ალია"