15
აპრილიდღის ზოგადი ასტროლოგიური პროგნოზი
რატი დურგლიშვილი თბილისში ერთ-ერთი პოპულარული ბიჭია. სიმპათიური მამაკაცი თითქმის ყველა გოგოს ხიბლავს, მაგრამ ის კვლავ მარტოა და ოჯახის შექმნას არ ჩქარობს. დუეტმა "ჯორჯიამ" საქართველო არაერთხელ ასახელა საერთაშორისო ასპარეზზე, მათ მეზობელ რუსეთშიც უამრავი თაყვანისმცემელი ჰყავთ. ცოტა ხნის წინ გავრცელებული ინფორმაციის თანახმად, დუეტი თითქოს რუსეთში აპირებს კარიერის გაგრძელებას, მაგრამ რატიმ ეს ამბავი ჩვენთან საუბარში უარყო.
- რატი, გავრცელდა ინფორმაცია, რომ დუეტი "ჯორჯია" რუსეთში აპირებს კარიერის გაგრძელებას, უფრო კონკრეტულად გვიამბე ამის შესახებ...
- ეს არასწორი ინფორმაციაა, ჩვენ არ გვითქვამს, რომ რუსეთში მივდივართ. ჟურნალისტებმა გვკითხეს, წახვალთ თუ არა რუსეთში კარიერის ასაწყობადო, რაზეც ვუპასუხეთ, რომ თუ შემოთავაზებას მივიღებდით, დავფიქრდებოდით. ხალხმა ეს პასუხი სხვანაირად გაიგო.
- რა შემთხვევაში დათანხმდები რუსეთში კარიერის გაგრძელებას?
- პირობები უნდა იყოს კარგი. იყო შემოთავაზებები რუსეთიდან, მაგრამ ჩვენთვის საინტერესო წინადადება არ მიგვიღია და უარი ვთქვით.
- ჩვენს ქვეყნებს შორის არსებული დაპირისპირება ხომ არ არის მთავარი ფაქტორი, რის გამოც უარს ეუბნებით რუს პროდიუსერებს?
- არ ვიცი, ვინ მისცა თავს უფლება, ხელოვნება გასვაროს და პოლიტიკას დაუკავშიროს. ჩვენ ჩვენი ენა გვაქვს. პოლიტიკა ხელოვნებამდე ვერც მივა, პოლიტიკოსები მიდიან და მოდიან, ქვეყნები შორდებიან და რიგდებიან, ხელოვნება კი რჩება. ასე რომ, ხელოვნება და პოლიტიკა ერთმანეთთან არაფერ კავშირშია. ხელოვნება თითზე დასახვევი არ არის. ერთხელ მკითხეს, რუსეთმა საქართველოს ომი გამოუცხადა და მაინც თანახმა ხარ იქ სიმღერაზეო? რაზეც ვუპასუხე "თუ ჩემით გადარჩება ქვეყანა, მომკალით, კი ბატონო"! (იცინის).
- ბევრი მომღერალი ჩივის ე.წ. "შავი სიების" შესახებ, თქვენ რა ინფორმაცია გაქვთ, დუეტი "ჯორჯია" ხომ არ ყოფილა მსგავს სიებში?
- არ ვიცი, ვინ შეადგინა ეს სიები, "შავი სიები" არ მაღელვებს. ოღონდ კონცერტი იყოს, ტელევიზორში გამოვჩნდე და ეგ აღარ მაინტერესებს. ასე რომ, შემიყვანეთ "შავ სიაში", რა პრობლემაა (იცინის). საერთოდ არ მაინტერესებს "შავი სია" არსებობს თუ თეთრი. მე და მაკა ვქმნით ჩვენს შემოქმედებას, ვცხოვრობთ ჩვენი მსმენელებისთვის. ვაკეთებთ იმას, რაც მოგვწონს და მოსწონს ხალხს.
- გავრცელდა ინფორმაცია, რომ ცოლი მოგყავს, ვინ არის შენი რჩეული?
- ერთ-ერთ კლუბში ჩემმა მეგობრებმა მოატყუეს ერთ-ერთი ჟურნალისტი, რატის ცოლი მოჰყავსო და მანაც დაიჯერა. აქედან გავრცელდა ეს ჭორი (იცინის). გარშემო იმდენად აწეწილია ყველაფერი, პირად ცხოვრებაში ვერაფერს დაალაგებ. ჯობია, ჯერ ქვეყანა დალაგდეს, როცა სიწყნარე იქნება, დავიწყებ ფიქრს ოჯახზე. ვერ ვიწყებ პირადი ცხოვრების დალაგებას, რადგან არ მაქვს სტაბილურობის განცდა, არ იცი, ხვალ რა იქნება. ოჯახი ყველაზე დიდი პასუხისმგებლობაა ამქვეყნად და დაფიქრებაა საჭირო, სანამ შექმნი.
- როგორი გოგონები მოგწონს?
- მაქვს რაღაც კრიტერიუმები, რითაც ვაფასებ ადამიანებს, ყურადღებას ვაქცევ ინტელექტს, ზრდილობას და ა.შ. ყოფილა შემთხვევა, როცა მეგონა, რომ ვიპოვე ისეთი, როგორიც მომწონს, მაგრამ მერე მივხვდი, რომ შევცდი. უკვე იმდენჯერ მქონდა ამის პრაქტიკა, რომ მსგავსი შეცდომები აღარ მომდის. თავშეკავებულად ვურთიერთობ გოგონებთან, ზედმეტის იმედი რომ არ მისცენ საკუთარ თავს.
- ცნობილია, რომ უფროსი ასაკის მანდილოსნებში გყავს განსაკუთრებით ბევრი თაყვანისმცემელი...
- არ ვიცი, ვერაფერს ვიტყვი. არ მომწონს, როცა კაცი მსგავს თემებზე საუბრობს. არ იქნება ჩემგან ლამაზი თაყვანისმცემლებზე საუბარი.
- გყვარებია?
- მყვარებია, თან ძალიან მაგრად, ისე მიყვარდა, სიცოცხლეს მივცემდი, ორჯერ მქონდა ასეთი სიყვარული. მას შემდეგ სიყვარული აღარც მწვევია, იმდენი წელი გავიდა, აღარც ვიცი, სიყვარული რა არის. ალბათ გამოჩნდება ადამიანი, ვინც იმ სიყვარულს დამავიწყებს.
- რატომ დაშორდი, ასე თუ გიყვარდა?
- ცოტა უცნაური და დაულაგებელი ადამიანი ვარ. არ ვარ მყარი პიროვნება, ჩემი სამყარო და ჩემი ხედვა მაქვს. სულ მგონია, ვერ გამიგებენ. ყველას აქვს თავისი პატარა ოჯახი შიგნით, მე ასე ვცხოვრობ. ადამიანებში ყოველთვის კარგი უნდა ეძებო. ცუდი ყველას აქვს, მაგრამ კარგი მუდამ წონის. ყველა ადამიანს თავისებური მიდგომა სჭირდება, ყველას თავისებური სილამაზე აქვს. თითოეული ადამიანი საინტერესოა ჩემთვის.
- ოჯახში არ გეუბნებიან, რომ უკვე ოჯახის შექმნის ასაკი გაქვს?
- უფლის წყალობით, ყველაზე კარგი და კომფორტული ოჯახი მყავს, ერთმანეთის გადაწყვეტილებებს პატივს ვცემთ. ცოლს მაშინ მოვიყვან, როცა მე მომინდება, მარიონეტები არ ვართ, სხვისი მითითებებით რომ მოვიქცეთ. ჩემი მშობლებისთვის მთავარია, მე და ჩემი ძმა ვიყოთ კარგად.
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
