რიჩარდ ნორლანდი - ხურვალეთში ვითარება ტრაგიკულია

ვითარება, რასაც ჩვენ ვხედავთ ტრაგიკულია, - ამის შესახებ საქართველოში ამერიკის შეერთებული შტატების ელჩმა რიჩარდ ნორლანდმა სოფელ ხურვალეთში დიპლომატებისა და საგარეო საქმეთა სამინისტროს წარმომადგენლების სტუმრობისას განაცხადა, როდესაც მავთულხლართებთან სიახლოვეს იმყოფებოდა.

რიჩარდ ნორლანდის განცხადებით, ამ ვიზიტის მიზანია დიპლომატებს მისცემოდათ შესაძლებობა ადგილზე პირადად გაცნობოდნენ და ენახათ რა ვითარება არის შექმნილი ადმინისტრაციულ საზღვარზე.

"ვითარება, რასაც ჩვენ ვხედავთ, ტრაგიკულია. მე ეს მაგონებს ბერლინის კედელს, როდესაც ხელოვნურად აღმართული ბარიერებით ხდება ხელის შეშლა, ადამიანები ვერ ახერხებენ თავის მინდვერებზე და თავის წინაპრების საფლავებზე გასვლას. მიუხედავად იმისა, რომ მიმდინარეობს მოლაპარაკებები ჟენევაში, ეს უფრო არის ჰუმანიტარული, ადამიანური ასპექტი, რაც უკავშირდება ადამიანების ცხოვრებას, რომლის გადაწყვეტა შეიძლება ასეთ ადამიანურ დონეზე", - განაცხადა რიჩარდ ნორლანდმა.

დიპლომატებისა და საგარეო საქმეთა სამინისტროს წარმომადგენლების გარდა ხურვალეთში ასევე იმყოფებიან რეგიონული განვითარებისა და ინფრასტრუქტურის მინისტრი დავით ნარმანია და რეინტეგრაციის საკითხებში სახელმწიფო მინისტრის მოადგილე ქეთევან ციხელაშვილი.

"ინტერპრესნიუსი"