30
მარტიდღის ზოგადი ასტროლოგიური პროგნოზი
"მიმაჩნია, რომ საქართველო ჯერარნახული ეპიდემიის წინაშე დგას, ისეთი, რომლის მსგავსი მსოფლიოშიც არ ყოფილა. ამ ფაქტით საოცრად აღშფოთებული ვარ, ეს პროცესი თუ არ შენელდა, დამიჯერეთ, ყველაფერს წალეკავს. მაგრამ გადავწყვიტე, რომ ამის შესახებ მეტი აღარაფერი ვთქვა," - აღნიშნავს ფსიქოლოგი გია ჯაჯანიძე, რომელმაც საკუთარი უკმაყოფილება ჯერ "ფეისბუქის" გვერდზე გამოხატა, შემდეგ კი - ჩვენთან.
- გია, ასე რამ გაგაღიზიანა?
- იმ ფარისევლებმა გამაბრაზეს, მართლმადიდებლების სახელით საკუთარ თავს ბევრი ცუდი რამის უფლებას რომ აძლევენ: საჯაროდ და თავლთმაქცურად პირჯვარს იწერენ, მძიმე მარხვის პერიოდში სამარხვო ტორტებს აგემოვნებენ, ტატუს გასაკეთებლად სასულიერო პირისგან კურთხევას იღებენ... "ფეისბუქზე" სტატუსად დებენ და აშიარებენ გვერდს - "მე მიყვარს ჩემი პატრიარქი" და ამის საპირისპიროდ, არაქრისტიანულად იქცევიან, ერთმანეთს ცილს სწამებენ, ილანძღებიან, სიკეთის სახელით ბოროტებას სჩადიან... ამ ყველაფერზე დიდხანს რომ ვფიქრობ, გეფიცებით, ლამის გული გამიჩერდეს და ამ ყველაფრის ძალიან მეშინია...
- როგორც მართლმადიდებლობა ქადაგებს, არ განიკითხო და არ განიკითხებიო...
- ვიცი, მაგრამ მე კონკრეტულად ვინმეს ხომ არ ვასახელებ? უბრალოდ ზოგადად სიტუაციას ვაფასებ, რომელიც საოცრად მთრგუნავს. მართლმადიდებლობა იმას კი ღაღადებს, რომ არ განიკითხოო, მაგრამ იმასაც ქადაგებს, რომ ბოროტი ამხილეო... მე უფრო ამის მომხრე ვარ და ამიტომაც ვლაპარაკობ... შეუძლებელია მართლმადიდებლობა ნაძირალასთვის თავშესაფარი იყოს! რა ამის პასუხია და რატომღაც ნინი ბადურაშვილი გამახსენდა, რა უყო ხალხმა, რა დღეში ჩააგდეს ორსული გოგო... რამდენი შხამითა და გესლით აავსეს... და კიდევ არაერთი ადამიანი... სხვების პირად ცხოვრებაში ისე ჩაერევიან, თვალსაც არ დაახამხამებენ... ასე აპირებს ერის გარკვეული ნაწილი (ყველას არ ვგულისხმობ), ვინც ასე ფარისევლურად ცხოვრობს, დემოკრატიის აშენებას და ევროინტერგრაციას?! მენტალიტეტში სერიოზული გარღვევაა, სანამ ეს არ გამოსწორდება, არც ეკონომიკის აყვავება გვიშველის და არც არანაირი ინვესტორის შემოყვანა.
- იცი, რომ ამის შემდეგ ბევრი ადამინი გაგიბრაზდება და გაგაკრიტიკებს?
- ვიცი, მაგრამ მე ჩემი სათქმელი რომ არ ვთქვა, გული გამისკდება. ძალიან მაწუხებს... რაღაც ისეთი შთაბეჭდილება მექმნება, რომ ზოგიერთ ადამიანს სირცხვილის შეგრძნება არ აქვს, - საბოლოოდ ასეთ დასკვნამდე მივედი.
მაგრამ ალბათ ფარ-ხმალი მაინც არ უნდა დავყარო არც მე და არც მათ, ვინც ჩემნაირად ფიქრობს. ადამიანს გონება იმისთვის მისცა ღმერთმა, რომ ემოციებს არ აჰყვეს, საღად და მშვიდად შეაფასოს ყველაფერი... უნდა ვივარაუდო, რომ ამ სატკივარს მაინც ეშველება.
ლალი ფაცია
