21
აპრილიდღის ზოგადი ასტროლოგიური პროგნოზი
ბევრს შეიძლება გაუკვირდეს, როდესაც ცნობილი სახე ხარ, რატომ უნდა პოზირებდე ფოტოკამერების წინაშე მაკიაჟის გარეშე. ქალბატონებზე მაქვს საუბარი, რა თქმა უნდა. იმის მიუხედავად, რომ შესაძლოა, მაკიაჟის გარეშეც არ გამოიყურებოდე ცუდად, როდესაც სამ ადამიანზე მეტი გცნობს და მგონი, ისედაც, აუცილებელია, საკუთარი ფორმის შესანარჩუნებლად ყოველდღიურად იზრუნო. მით უმეტეს, ქალს სჭირდება თავის მოვლა, თმის დავარცხნა და ცოტაოდენი მაკიაჟი იმისთვის, რომ საკუთარი თავი საუკეთესო კუთხით წარუდგინოს საზოგადოებას. ბუკლიკომ გადახედა ფოტოარქივს და აღმოაჩინა, რომ ზოგჯერ ქართველ ვარსკვლავებს ძალიან ეზარებათ მაკიაჟის გაკეთება და ფოტოობიექტივში მათი "წაშლილი" სახეები ფიქსირდება.
პირველი ჩვენს სიაში ანი ტყებუჩავაა. მსახიობი სასიამოვნო გარეგნობით გამოირჩევა, თუმცა საინტერესოა, რას ერჩიან მას "ჩემი ცოლის დაქალების" "მეგარდერობეები". სავარაუდოდ, მას სტილს პროექტის მხატვარი ურჩევს, მაგრამ ისეთი საოცარი კაბები აცვია, ფუშფუშასახელოებიანი და ძირითადად, უფორმო, რომ მის შემხედვარეს, ალბათ, აღარ გაგიკვირდება, რატომ გაუწია გულმა მეოჯახე დათოს არამეოჯახური საქციელისკენ და ნინო მუმლაძის პერსონაჟის დეკოლტესკენ. ანის ამ ფოტოზე, რომელიც ჩვენმა ჟურნალმა გადაუღო, მხოლოდ ტონალური უსვია, თვალები არ შეუღებავს და არც პომადა წაუსვამს, არადა, კარგი იქნებოდა. მაკიაჟი ყველა ქალს ალამაზებს, მსახიობი კი ყოველთვის ფორმაში უნდა იყოს.
ეკა ნიჟარაძე ასევე აღმოჩნდა ფოტოზე მაკიაჟის გარეშე. მსახიობს მწვანე თვალები აქვს და ძალიან უხდება თვალის დახატვა, ზაფხულობით, როდესაც მას რუჯი აქვს, ძირითადად, მაკიაჟის გარეშე დადის, თუმცა შეიძლება ითქვას, რომ უმაკიაჟობა მის გარეგნობას არაფერს აკლებს. ეკა ყოველთვის კარგად გამოიყურება.
ია სუხიტაშვილის გარეგნობა "ცეკვავენ ვარსკვლავებში" მისი მონაწილეობის შემდეგ განსაკუთრებული გარჩევის საგანი გახდა. მსახიობის სიგამხდრეზე ლამის მთელი საქართველო დარდობდა. ია კი ამ ყველაფერს ღიმილით პასუხობდა და ამბობდა, რომ ძალიან გადატვირთული გრაფიკის გამო კარგად ჭამას ვერ ახერხებდა და შესაბამისად, ეს მის წონაზეც აისახა, თუმცა ია არც ადრე გამოირჩეოდა სიმსუქნით. შეიძლება ითქვას, რომ ის დღესდღეობით ყველაზე გამხდარი მსახიობია საქართველოში. ჩაცმის სტილი იას ძირითადად სპორტული აქვს, ყოველდღიურ ცხოვრებაში მაკიაჟის კეთებით არ გამოირჩევა და ამ ფოტოზე უმაკიჟოდ არის ასახული.
თქვენ წინაშეა ირინა ონაშვილის ძველი ფოტო, მაშინდელი, როდესაც ჯერ კიდევ სამოდელო სააგენტო "ამსას" მოდელი გახლდათ და "მის საქართველოში" მონაწილეობის კონტურები არ იყო გამოკვეთილი. მას შემდეგ, რაც ეს ტიტული მიიღო, ბევრი წელი გავიდა. ირინას გარეგნობა შეიცვალა, მოდელი მეტ-ნაკლებად ყოველთვის ფორმაშია, თუმცა ყოველდღიურ ცხოვრებაში მსუბუქ მაკიაჟს იყენებს.
ეს ნინუცა მაყაშვილის ადრინდელი ფოტოა. თავადაც ამბობს, რომ რაც "მაესტროში" დაიწყო მუშაობა, მას მერე უფრო მეტად დაიწყო საკუთარ სტილსა და გარეგნობაზე ზრუნვა. ნინუცასთვის ადრე პრობლემა არ იყო ფოტოკამერის წინ უმაკიაჟოდ პოზირება, ახლა კი ყოველთვის ფორმაშია, ვინაიდან ყოველდღიური ეთერისთვის ვარცხნილობისა და მაკიაჟის გაკეთება უწევს.
ნანკა კალატოზიშვილის ფოტოების გადასაღებად, შეიძლება ითქვას, რომ მსახიობთან ნამდვილი "ომია" საჭირო. ნანკა ყოველდღიურ ცხოვრებაში იმდენად სხვანაირია, რომ შეიძლება, ვერც იცნოთ. მისი სპორტული სტილი, დახეული ჯინსი და მაისური, თავის ნებაზე მიშვებული გრძელი თმა და კეპი ძალიან განასხვავებს მას იმ ნანკასგან, რომელიც ტელევიზიის ეთერში თუ თეატრალურ სცენაზე გინახავთ. ნანკას ძალიან არ უყვარს სილამაზის სალონებში მისვლა-მოსვლა და მაკიაჟის კეთება. უნდა აღვნიშნოთ, რომ ნანკას სტილისტის მიერ გაკეთებული ვარცხნილობა და გემოვნებიანი მაკიაჟი ისე უხდება, რომ თვალს ვერ მოსწყვეტთ.
თამუნა გაბრიელაშვილი ერთ-ერთი პირველი იყო იმ მოდელების სიაში, რომლებმაც სახელი ამ სფეროში მუშაობით გაითქვეს. თამუნამ სალომე ღვინიაშვილთან, კრისტი ყიფშიძესთან, ნათია მაქაცარიასა და სხვა რამდენიმე ცნობილ სახესთან ერთად ქართულ პოდიუმზე თავდაჯერებულად შეაბიჯა და უამრავი მამაკაცის გული დაიპყრო. თამუნას სილამაზე "ვაკის პარკმა" თავის ერთ-ერთ კლიპში ასახა. დღეს ის ჟურნალისტ ვახო მამალაძის მეუღლე და ორი შვილის დედაა და აქტიურად აღარ ჩანს. თამუნა ისეთი ლამაზი გახლდათ, რომ შეიძლება ითქვას, მაკიაჟი არც სჭირდებოდა, მაგრამ ამ ფოტოზე, უმაკიაჟოდ, არცთუ კარგად გამოიყურება.
თიკო სადუნიშვილის გარეგნობაზე ზრუნავდნენ სრულიად დიზაინერები, სტილისტები და სილამაზის სალონები, როდესაც ის "თბილისი ლაივის" წამყვანი იყო. მის გარეგნობას ერთი უცნაურობა ახასიათებს - მას ისეთი სახე აქვს, რომელიც მაკიაჟის სპეციალისტებისთვის ნამდვილი მისწრებაა, ანუ მასზე ყველაფრის დახატვა შეიძლება და თითქმის ყველა ექსპერიმენტის შემთხვევაში წარმატება გარანტირებულია. თიკოს ჩაცმულობასა და ვარცხნილობას თბილისში ხშირად განიხილავდნენ. მას ბევრი იმიჯის მორგება შეუძლია, რასაც, ვთქვათ, ძალიან ეგზოტიკური ან გამორჩეული გარეგნობის მქონე ქალბატონი ვერ მოირგებს. თიკოც, შესაბამისად, არასდროს მორიდებია ექსპერიმენტებს. ეს კი თიკოს მაკიაჟისგან სრულიად თავისუფალი სახეა, რომელიც ისე გამოიყურება, როგორიც ამ ფოტოზე ჩანს.
რუსკა მაყაშვილი კი ერთ-ერთია იმ ცნობილი სახეებიდან, რომელიც საკუთარ გარეგნობას "ფუჭად ხარჯავს". რუსკას ისეთი ფეხები აქვს, ბევრ ქალს რომ შეშურდება, თუმცა ყოველდღიურ ცხოვრებაში სულაც არ იპრანჭება და როდესაც კამერა უღებს ან ფოტოგრაფს მისკენ აქვს მიშვერილი აპარატი, შეუძლია, თმადაუვარცხნელი იყოს და მაკიაჟი არ გაიკეთოს. რუსკას დამახასიათებელი სახის ნაკვთები აქვს, რომელიც მის გარეგნობას ორიგინალურ ელფერს ანიჭებს. დასანანია, რომ რუსკა უფრო იშვიათად გვინახავს ფორმაში მყოფი, ვიდრე საზოგადოებაში მის სტატუსსა და ცნობადობას ეკადრება.
dj ბუკლე
(გამოდის ორშაბათობით)
