ზაზა ხუციშვილი ახალ ამპლუაში

ცოტა ხნის წინ მუსიკოსი ზაზა ხუციშვილი სერიოზული პოლიტიკური გადაცემის წამყვანის ამპლუაში მოგვევლინა, შემდეგ - როგორც წამყვანმა, საქმიანობა რადიოში განაგრძო, ახლა კი სატელევიზიო პროექტისთვის - "მუსიკალური რეალური შოუ" ემზადება. საინტერესო სიახლეების გარდა, ზაზა ჩაცმის სტილზე, ცხოვრების წესზე, ნადირობასა და ოჯახზე გვესაუბრება.

სოლიდური თუ უბრალო იმიჯი

- სიმართლე გითხრათ, ჩაცმულობა ნაკლებად მაინტერესებს. ვაღიარებ, შოუბიზნესში ჩართული ადამიანისთვის წამგებიანია, როცა სცენაზე გასულს, სოლიდურად არ აცვია, მაგრამ რა ვქნა, ასეთი გახლავართ - ერთი ჩვეულებრივი მოქალაქის იმიჯი მაქვს. ბევრ ადამიანს ვიცნობ, ვისთვისაც ძვირად ღირებული სათვალე, საუკეთესო ფეხსაცმელი, ბრენდული სამოსი მნიშვნელოვანია, მაგრამ ჩემთვის ეს ყველაფერი ბევრს არაფერს ნიშნავს. ბევრჯერ უკითხავთ, თუ როგორ მოვახერხე და მოვირგე კლასიკური სამოსი ეკრანზე, მაგრამ ეს პრობლემა ნამდვილად არ არის, კოსტიუმი ყოველთვის აქტუალურია და ვფიქრობ, მამაკაცების უმეტესობას უხდება, თუ, რა თქმა უნდა, გემოვნებით არის შერჩეული. სერიოზული გადაცემის წაყვანისას, სოლიდური იმიჯის მორგება ჩემთვის სასიამოვნოც კი აღმოჩნდა... კარგია, რომ თანამედროვე ჩაცმის სტილი თითქმის ყველაფერს ითავსებს. მაგალითად, შესაძლოა გეცვას პიჯაკი, რომელსაც შეუხამებ ჯინსის შარვალს და სპორტულ ფეხსაცმელს.

კომფორტული სამოსი და საყვარელი ცხოველები

- ცხოვრების რეჟიმისა და დინამიკიდან გამომდინარე, ჩემთვის სპორტული სტილი უფრო მისაღებია. მოგეხსენებათ, ნადირობის, ბუნების მოყვარული ვარ და თავისუფალ დროს ძირითადად, ტყეში ვატარებ. ორი ძაღლი მყავს და როცა მათთან მივდივარ, მაშინაც ვცდილობ, თავისუფლად ჩავიცვა. აბა, ძაღლებთან "გამოწკეპილი" ხომ ვერ მივალ?! მათ ვათამაშებ ხოლმე, ჰოდა, შემომახტებიან, მსვრიან. ყოველდღიურ ცხოვრებაში ჩემს ჩაცმის სტილს სიტყვა - "ქეჟუალი" შეესაბამება.

ნადირობა - ყველაზე ჯანსაღი "სპორტი"

- ნადირობა ჩემი ცხოვრების წესია. ადრეც მომწონდა, მაგრამ ამ საქმით ბოლო 6-7 წელია, ძალიან დავინტერესდი. მე და ჩემი მეგობარი მონადირეები ბუნებაში სიარულისგან უდიდეს სიამოვნებას ვიღებთ და ნაკლებად გვაინტერესებს, რას და რამდენს მოვინადირებთ. ძაღლის გარეშე, სანადიროდ არ გავდივარ. მათ თავად ვწვრთნი და ვცდილობ, კარგად დავგეშო. ეს ყველაფერი სიამოვნებას მანიჭებს. ყოველთვის ვამბობთ, რომ ყველაფერი საინტერესო მანამდე ხდება, ვიდრე თოფს გავისვრით. ნადირობის ეშხი ის არის, თუ როგორ გეგმავ, მიდიხარ, საინტერესო ამბებს ჰყვები...

ჰობი და ოჯახი

- დროის კომპიუტერთან გატარებას ბევრად მირჩევნია, კალათბურთი, ფეხბურთი, ბილიარდი ვითამაშო. ოჯახში გატარებული დრო ნამდვილად, ყველაზე ძვირფასია, რადგან იქ ჩემთვის სასიამოვნო და კომფორტული გარემოა შექმნილი. კარიერა, წარმატება კარგია, მაგრამ ადამიანისთვის ოჯახზე მნიშვნელოვანი არაფერია. ჩემთვის სახლი ის ადგილია, სადაც ბედნიერი ვარ და ყოველთვის მიმიხარია... ზოგჯერ ძაღლების გასასეირნებლად შვილიც მიმყავს. ის 7 წლისაა და საკმაოდ დაკავებულია - სკოლაში დადის, რუსულსა და ინგლისურ ენაში ემზადება და ა.შ.

თავის მოვლა

- თავის მოვლას ბევრ დროს არ ვუთმობ. დილით შხაპს ვიღებ, ვსაუზმობ, ვიცვამ და სახლიდან გავდივარ. რა უნდა ჩავიცვა, ამაზე ბევრს არ ვფიქრობ.

ვარჯიში და სტაბილური წონა

- ნადირობა, ძაღლების ბუნებაში გაყვანა და გაწვრთნა ერთგვარი ვარჯიშია. ასეთ დროს ფეხით დაახლოებით, 5-10 კილომეტრს გავდივარ, ფიზიკური აქტივობა კი სტაბილური წონის შენარჩუნებაში მიწყობს ხელს. "ნაზი" მჭამელი ნამდვილად არ გახლავართ და უძრავი ცხოვრების წესი რომ მქონდეს, გამუდმებით კომპიუტერთან რომ ვიჯდე, წონაში სერიოზულად მოვიმატებდი.

იარაღი

- კარგი თოფების ქონას, ბევრი ფული უნდა. მაგალითად, საკოლექციო - ინგლისური, ბელგიური თოფები ძალიან ძვირად ღირებული სიამოვნებაა. სიმართლე გითხრათ, როცა ნადირობა დავიწყე, კარგი თოფის შეძენის მუღამიც მქონდა, მერე გამიარა. ახლა ორი თოფი მაქვს, რომლებიც ჩემს მოთხოვნებს სავსებით აკმაყოფილებს.

მუსიკალური ინსტრუმენტი

- ჩემი გიტარის ერთგული ვარ, რომელიც უნივერსალურია, მასზე ყველა ჟანრის ნაწარმოების დაკვრა შეიძლება. კიდევ, ერთი ელექტრონული და ერთიც - აკუსტიკური გიტარა მაქვს.

"ანდერგრაუნდი" და კარიერული სიახლეები

- იმედი მაქვს, რომ ის დიდი პაუზა, რაც "ვაკის პარკს" "ანდერგრაუნდამდე" გაუჩნდა, აღარ განმეორდება. იდეები არის, რაღაცებს ვწერ და ზაფხულისთვის ალბათ სტუდიაშიც შევალთ. გაზაფხულზე კონცერტის გაკეთება მინდოდა, მაგრამ ახალი პროექტის გამო ალბათ, ამას ვერ მოვახერხებთ. მოგეხსენებათ, "მაესტროს" ბევრი სერიოზული გეგმა აქვს. პირადად მე, ახალგახსნილი რადიოს - "ვინილის" დირექტორი გახლავართ. ამბობენ, - ეს არხი გემოვნებიანი მუსიკით გამოირჩევაო, გემოვნება კი ყველას თავისებური აქვს... გარდა ამისა, მუსიკოსებს ტელევიზიაშიც სიურპრიზი ელით, რადგანაც თავიანთი პროდუქციის წარმოსაჩენად დიდი ასპარეზი ექნებათ. მიმაჩნია, რომ 1990-იანი წლები შოუბიზნესისთვის წარმატებული იყო და იმედი მაქვს, რომ ის აღმავლობა კვლავ განმეორდება.

ახალი რეალური შოუ მუსიკოსებისთვის

- ხელმძღვანელობამ ამ პროექტის დირექტორობაც მე შემომთავაზა, - სიამოვნებით დავთანხმდი. მთავარი იდეა ის არის, რომ გვინდა, ამ ყველაფერს სერიოზული გაგრძელება მოჰყვეს და ყველაზე წარმატებული მომღერლები ზაფხულის სეზონზე, საქართველოს სხვადასხვა ქალაქში ვამღეროთ. გვინდა, მათი კარიერა პროექტის შემდეგ უფრო განვითარდეს.

- ვინ იქნებიან ჟიურის წევრები?

- ჟიურის ვინაობას ჯერ ვერ გაგიმხელთ, მაგრამ მერწმუნეთ, საინტერესო ადამიანები იქნებიან. ვეცდები, მათ მიმართ მაქსიმალურად მომთხოვნი ვიყო, რა თქმა უნდა, ჩემი უფლება-მოვალეობების ფარგლებში. ასეთი პროექტების მთელი ეშხი იმაშია, რომ ორი თვის შემდეგ, მომღერალი აბსოლუტურად განსხვავებული უნდა იყოს იმისგან, როგორიც პროექტში შესვლამდე იყო, ამისთვის კი აუცილებელია, მას მიანიშნო, რა მიმართულება უნდა აირჩიოს, რა ნიშა შეიძლება დაიკავოს, მის ხმაში რა არის საინტერესო, როგორი უნდა იყოს ტექნიკური პასაჟები, თხრობის ფორმა და ა.შ. ყველა უცხოელ მომღერალს თავისი სტილი აქვს და მათ სწორედ ეს გამოარჩევს სხვებისგან, საქართველოში კი ფაქტობრივად, თაობები რომელიმე ერთი ქალბატონის ან მამაკაცის მიბაძვით იზრდებიან. ვეცდებით, ეს ყველაფერი სტუდენტებს დავანახვოთ და მათი ნიჭი განვავითაროთ.

- შოუს მონაწილეები ერთად იცხოვრებენ?

- ვაჟები ცალკე იქნებიან, გოგონები - ცალკე, შემდეგ კი ექნებათ შეკრებები, რეპეტიციები, განხილვები და ა.შ. ჩვენი უპირატესობა ის არის, რომ კონცერტები "მაესტროში" ჩატარდება: საკონცერტო დარბაზი უკვე აშენებულია, კარგი ხარისხის გახმოვანების აპარატურა გვექნება, ეს კი სტუდენტებს საშუალებას მისცემს, სარეპეტიციო ოთახებსა და სცენაზე მეტი დრო გაატარონ და იქ პირდაპირ კონცერტის დღეს არ მოხვდნენ.

- ალბათ შოუს მონაწილეებს გარკვეულ რჩევებს თქვენც მისცემთ, არა?

- რა თქმა უნდა! მათთან ხშირი ურთიერთობა მექნება, როგორც დისციპლინის, ისე სასწავლო პროცესის თვალსაზრისით. პროექტი ეთერში აპრილის პირველ რიცხვებში გავა.

თამთა დადეშელი

ჟურნალი ”გზა”

(გამოდის ხუთშაბათობით)