21
აპრილიდღის ზოგადი ასტროლოგიური პროგნოზი
საქართველოში ახალი პოლიტიკური მოდა დამკვიდრდა - თავდაცვისა და შს ყოფილი მინისტრები თავისი ფეხით მიდიან გლდანის ციხეში. აგერ, ბაჩო ახალაიამ გლდანის ციხეს სტამბულიდან "მიაკითხა", ირაკლი ოქრუაშვილმა კი პარიზიდან. აღარ დავსვამთ ქართულ მედიაში ბოლო დროს ყველაზე პოპულარულ კითხვას - ვინ იქნება შემდეგი? - რათა ვანოს გულმა ცუდი არ უგრძნოს. ალბათ, მალე მოგვიწევს ცალკე ციხის აშენება ძალოვანი უწყებების ყოფილი მაღალჩინოსნებისთვის. ყოველ შემთხვევაში, ხუმრობა იქით იყოს და ახალი ხელისუფლების წარმომადგენლები ხაზს უსვამენ, რომ ირაკლი ოქრუაშვილის საქართველოში დაბრუნება მათთვის მოულოდნელი იყო. თუმცა მაგალითად, "ნაციონალები" ეჭვობენ, რომ თავდაცვის ყოფილ მინისტრს "ქართული ოცნებიდან" გარკვეული გარანტიები ჰქონდა.
ერთი მხრივ, "ქართული ოცნებისა" და ოქრუაშვილის "თანამშრომლობა" ძნელი წარმოსადგენი იყო. შეგახსენებთ, რომ 2012 წლის თებერვალში ბიძინა ივანიშვილმა ოქრუაშვილს "ხელისუფლების ტიპიური სახე უწოდა". ამას ოქრუაშვილის უსტარი მოჰყვა, რომელშიც ივანიშვილი გააკრიტიკა და სოზარ სუბარის "თამარ ქალივით მოტაცებაში" დაადანაშაულა (სუბარი 2012 წლის დასაწყისში ოქრუაშვილის "ქართული პარტიიდან" "ქართულ ოცნებაში" გადავიდა). მერე კი, ოქრუაშვილმა ისიც გაიხსენა, თუ როგორ დააკავეს მისი შს მინისტრობისას ნარკოტიკებთან დაკავშირებით მაია ფანჯიკიძის ძმა.
თუმცა პოლიტიკაში მეგობრობა და მტრობა მუდმივი არ არის და არ არის გამორიცხული, ოქრუაშვილმა სამშობლოში დაბრუნებასთან დაკავშირებით თბილისიდან მწვანე შუქი მართლაც მიიღო. მით უმეტეს, რომ ოქრუაშვილის სახით სამართალდამცავებმა ოქროს მოწმე მიიღეს. თან თავდაცვის ყოფილი მინისტრი უფრო დიდი კალიბრის "ჩიტია", ვიდრე იგივე ბაჩო ახალაია.
2012 წლის 1-ელ ოქტომბრამდე ქვეყანას "დიდი ოთხეული" მართავდა - მიხეილ სააკაშვილი, ვანო მერაბიშვილი, ზურაბ ადეიშვილი და გიგა ბოკერია. 2007 წლამდე კი საკვანძო გადაწყვეტილებებს "ხუთეული იღებდა" - ზემოხსენებულ ფიგურებს გვერდს ოქრუაშვილიც უმშვენებდა.
ოქრუაშვილი სააკაშვილის გარემოცვაში ერთ-ერთი მთავარი ფიგურა იყო ჯერ კიდევ იმ დროიდან, როდესაც მომავალი პრეზიდენტი იუსტიციის მინისტრი იყო. სწორედ მაშინ გაეხვია ის პირველად სკანდალში - ოქრუაშვილმა შევარდნაძის ესკორტისთვის გზის დათმობაზე უარი განაცხადა და პოლიციელი შემოელახა.
შესაბამისად, ოქრუაშვილმა იცის 2007 წლამდე, სანამ ხელისუფლებას ჩამოაშორებდნენ, კონკრეტულ საკითხებზე ვინ იღებდა გადაწყვეტილებებს, ვის უკვეთავდნენ და ვინ ასრულებდა. რაც მთავარია, "დიდი ხუთეულის" ყოფილ წევრს, სავარაუდოდ, ისიც კარგად ეცოდინება, თუ სად უნდა ეძებოს გამოძიებამ შესაბამისი მტკიცებულებები. მისი ჩვენებები საინტერესო იქნება გამოძიებისთვის დაწყებული "ჟვანიას საქმით" და პატარკაციშვილის გარშემო განვითარებული მოვლენებით დამთავრებული, რომლის მკვლელობის შეკვეთაში ოქრუაშვილმა სააკაშვილი ჯერ კიდევ 2007 წელს დაადანაშაულა.
მოკლედ, არ არის გამორიცხული, ოქრუაშვილის ჩვენებების შემდეგ გამოძიება "დიდი ოთხეულითაც" დაინტერესდეს. ერთი "მაგრამ" მაინც არის - თუ თავდაცვის ყოფილმა მინისტრმა წარსული ამბებისთვის ფარდის ახდა გადაწყვიტა, ძალიან გაუჭირდება, რომ პასუხისმგებლობა თავიდან აიცილოს.
გიორგი კვიტაშვილი
