16
აპრილიდღის ზოგადი ასტროლოგიური პროგნოზი
თბილისში, რამდენიმე ლოკაციაზე საპროტესტო აქცია და მსვლელობა იმართება.
მომღერლები და მუსიკალური ინდუსტრიის წარმომადგენლები არიან შეკრებილი ფილარმონიის დიდ საკონცერტო დარბაზთან. ისინი აქციებზე დაკავებული ახალგაზრდების გათავისუფლებას და ახალი არჩევნების დანიშვნას ითხოვენ.
მომღერალი ეკა მამალაძე აცხადებს, რომ მისი ოჯახის უდიდესი თხოვნაა, გათავისუფლდნენ უკანონო პატიმრები.
“სადაც ჩემი ხალხია, დღეს მეც იქ უნდა ვიყო და არ შემეძლო არ მოვსულიყავი. ეს არის ჩემი და ჩემო ოჯახის უდიდესი თხოვნა, რომ ისინი გათავისუფლდნენ. არ გვინდა დაძაბულობა, ისედაც ირევა ყველაფერი, უნდა დავმშვიდდეთ“, - განაცხადა ეკა მამალაძემ.
თბილისის მერიის წინ საჯარო მოხელეების მიმართ სოლიდარობის აქცია მიმდინარეობს
როგორც ადგილზე შეკრებილები აცხადებენ, თბილისის მერიიდან და სხვადასხვა საჯარო სამსახურიდან მოქალაქეებს პოლიტიკური ნიშნით ათავისუფლებენ და ევროინტეგრაციის მხარდამჭერი საჯარო მოხელეების მიმართ მიმდინარეობს ფსიქოლოგიური ზეწოლა და მუქარა.
აქციაზე იმყოფებიან საჯარო სექტორში დასაქმებული მოქალაქეები, პროფკავშირების წარმომადგენლები, სამოქალაქო აქტივისტები და აქციის მხარდამჭერები.
აქციის მონაწილეები თბილისის მერიის წინ აქციის გამართვის შემდეგ მსვლელობით საზოგადოებრივი მაუწყებლისკენ გაემართებიან.
საქართველოში გერმანიის საელჩოსთან შეიკრიბნენ გერმანიაში კურსდამთავრებულები
პროტესტის რეჟიმში გადასულ საქართველოს მოქალაქეებთან შესახვედრად გავიდა გერმანიის ელჩი პიტერ ფიშერი.
შეკრებილები მალე მსვლელობას დაიწყებენ და პარლამენტის გამზირამდე მივლენ.
ფოტო: გიორგი ჟამერაშვილი/ IPN
