შსს-ს 15 წუთიანი ვადის ამოწურვის შემდეგ აქციის დაშლა დაიწყო - რა ხდებოდა მელიქიშვილის გამზირზე ბოლო საათებში: "სკამები და ხელოვნურად გზის გადაკეტვა არის კანონდარღვევა"
სამართალდამცველებმა დილის 06:00 საათიდან მელიქიშვილის გამზირზე აქციის მონაწილეების დაშლა დაიწყეს.
- მანამდე შსს-მ აქციის მონაწილეებს დასაშლელად 15 წუთის ვადა მისცა. ასევე, "ერთიანობა ნაციონალური მოძრაობის" ლიდერმა გიორგი ვაშაძემ აქციის მონაწილეებს მოუწოდა, მელიქიშვილის გამზირზე გადასულიყვნენ და ერთად დამდგარიყვნენ.
აქციის მონაწილეები სამართალდამცავებს სტვენითა და ტაშით დახვდნენ. ასევე, ისინი სკანდირებენ: საქართველო, საქართველო! მომიტინგეები უკან იხევენ ფილარმონიის მიმდებარე ტერიტორიისკენ.
- ამ წუთებში მელიქიშვილის გამზირზე საპატრულო პოლიციის მხოლოდ რამდენიმე ათეული თანამშრომელი რჩება, რომელთაც მელიქიშვილის გამზირის დასაწყისში ცოცხალი ჯაჭვი აქვთ გაკეთებული და აქციის მონაწილეებს ვარაზისხევისა და ჭავჭავაძის გამზირის მიმართულებით გადასვლის საშუალებას არ აძლევენ.
პოლიციელებმა აქციის მონაწილეები თსუ-ს პირველი კორპუსის მიმდებარე ტერიტორიიდან მელიქიშვილის გამზირზე ცოტა ხნის წინ გადმოიყვანეს. მომიტინგეები ჯერჯერობით სწორედ მელიქიშვილის გამზირზე რჩებიან.
- ცოტა ხნის წინ ჭავჭავაძის გამზირზე გამოჩნდა საპატრულო პოლიციის უფროსი ვაჟა სირაძე. მან ჟურნალისტებს განუმარტა, რომ პროტესტის გამოხატვას აქვს თავისი ფორმა და დაუშვებელია ის თავის ჩარჩოებს გასცდეს.
"გზის სავალ ნაწილზე ბარიკადები, სკამები, ხელოვნურად გზის გადაკეტვა არის კანონდარღვევა. მოვუწოდეთ, რომ გაესუფთავებინათ სავალი ნაწილი, მივეცით გონივრული ვადა, შეგიძლიათ მიატრიალოთ თქვენი კამერა და ანახოთ საზოგადოებას, რომ გზის სავალ ნაწილზე არის ხალხი. კამათში აღარ შემოვდივარ თქვენთან. კანონი მოქმედებს საქართველოს მასშტაბით, ჩვენ ვასრულებთ კანონით მონიჭებულ უფლებას. შეგვიძლია წავიკითხოთ კანონი და ვნახოთ, რისი უფლება აქვთ მათ და რისი - არა. პროტესტის გამოხატვის უფლება, რა თქმა უნდა, აქვთ, გამოხატავენ კიდეც, მაგრამ არსებობს ამ პროცესში გარკვეული შეზღუდვები. ხალხის რაოდენობიდან გამომდინარე, შეფასებითია, კონკრეტულ მომენტში რა მოქმედებებს განახორციელებს სამართალდამცველი უწყება", - განუცხადა ვაჟა სირაძემ ჟურნალისტებს.
- მანამდე შსს-მ განცხადება გაავრცელა და მანიფესტაციის ორგანიზატორებსა და მონაწილეებს მოუწოდა, დაემორჩილონ პოლიციის კანონიერ მოთხოვნას და გახსნან ტრანსპორტის სავალი ნაწილი ჭავჭავაძის გამზირზე.
"შეკრებებისა და მანიფესტაციების შესახებ“ საქართველოს კანონის მე-11 პრიმა მუხლის თანახმად, დაუშვებელია ტრანსპორტის სავალი ნაწილის ნაწილობრივ ან სრულად გადაკეტვა, თუ აღნიშნულის საჭიროებას არ განაპირობებს მონაწილეთა რაოდენობა.
ამჟამად ჭავჭავაძის გამზირზე აქციაზე მყოფ პირთა რაოდენობა არ მოითხოვს გზის სავალი ნაწილის გადაკეტვას. აქციის ორგანიზატორებსა და მონაწილეებს მოვუწოდებთ გაათავისუფლონ გზა და შეწყვიტონ ტრანსპორტის სავალ ნაწილზე შეკრება/მანიფესტაცია და პროტესტი გამოხატონ კანონით დადგენილ ფარგლებში.
"შეკრებებისა და მანიფესტაციების შესახებ“ საქართველოს კანონის მე-13 მუხლის თანახმად შეკრება/მანიფესტაციების ორგანიზატორებსა და მონაწილეებს ეძლევათ 15 წუთიანი ვადა, რათა მიმართონ ყველა შესაბამის ზომას ტრანსპორტის სავალი ნაწილის გახსნისა და ტრანსპორტის მოძრაობის აღსადგენად. წინააღმდეგ შემთხვევაში, 15 წუთიანი ვადის გასვლის შემდეგ, თუ არ გაიხსნება ტრანსპორტის სავალი ნაწილი, შინაგან საქმეთა სამინისტრო კანონით მისთვის მინიჭებული მანდატის ფარგლებში იმოქმედებს და მიიღებს საქართველოს კანონმდებლობით გათვალისწინებულ ზომებს. შეკრება/მანიფესტაციის ორგანიზატორებსა და მონაწილეებს მოვუწოდებთ დაემორჩილონ პოლიციის კანონიერ მოთხოვნას”, - ნათქვამია განცხადებაში.
ნახეთ ასევე: