ფიზიკური დაპირისპირება და დაკავებები მელიქიშვილის გამზირზე - ერთ-ერთი საავადმყოფოშია გადაყვანილი: რა ხდება ადგილზე

მელიქიშვილის გამზირზე, პოლიციასა და აქციის მონაწილეებს შორის დაპირისპირებისას დაკავებულთა შორის რამდენიმე პირი “კოალიცია ცვლილებისთვის“ წევრია - დაშავებულია ამავე კოალიციის ერთი წარმომადგენელიც, რომელიც საავადმყოფოში გადაიყვანეს

• “კოალიცია ცვლილებისთვის“ ინფორმაციით, მელიქიშვილის გამზირზე აქციის დაშლისას სამართალდამცავებმა მათი კოალიციის რამდენიმე წევრი დააკავეს.

მათივე ინფორმაციით, დაკავებულს შორისაა კოალიციის წევრი და რუსთავის საარჩევნო შტაბის ხელმძღვანელი, მანუჩარ ჩაჩანიძე, ასევე საბა ცხვიტარიძე.

სამართალდამცავებმა დააკავეს მათი წევრი რეზი დუმბაძე.

• გარდა დაკავებულებისა, სავარაუდოდ, ე.წ. წიწაკის სპრეის გაშვების შედეგად დაშავებულია პარტია “ახალის“ პოლიტიკური საბჭოს წევრი ნიკა კვიტატიანი, რომელიც კლინიკაში გადაიყვანეს.

პოლიციასა და აქციის მონაწილეებს შორის მომხდარი დაპირისპირებისას დაკავებულთა შორის ერთ-ერთი “მთავარი არხის“ ოპერატორი, სერგი ბარამიძეა.

ბარამიძე იმ დროს დააკავეს, როცა სამსახურებრივ მოვალეობას ასრულებდა და ვიდეოკამერით მიმდინარე მოვლენებს - კონკრეტულად კი, დაპირისპირების ერთ-ერთ შემთხვევას იღებდა.

ტელეკომპანიის ინფორმაციით, სამართალდამცავებმა დაკავებისას ოპერატორზე ფიზიკურად იძალადეს.

• სავარაუდოდ, ე.წ. წიწაკის სპრეი გამოიყენეს. გამზირზე პოლიციასა და აქციის მონაწილეებს შორის დაპირისპირება ამ დრომდე გრძელდება.

• 

  ფოტო: Mo Se

დაპირისპირება მას შემდეგ დაიწყო, რაც პოლიციამ მომიტინგეებს გამზირის დატოვებისკენ მოუწოდა. ადგილზე იმყოფებიან ოპოზიციონერი ლიდერებიც.

დაკავებულია რამდენიმე პირი. დაკავებულების გარდა, დაშავდა ერთი ადამიანი, რომელიც სასწრაფო დახმარების ბრიგადით ტერიტორიიდან გაიყვანეს.

• რას აცხადებს საპატრულო პოლიციის უფროსის მოადგილე, კახა ბუხრაძე:

“112-ის საშუალებით მრავალი შეტყობინებაა შემოსული. გადაამოწმეთ. რაოდენობას ვერ გეტყვით, მაგრამ უამრავია. ჩემი აზრით, 50-100 მაინც. ხალხი ითხოვდა გზის გაწმენდას, ორი დღის განმავლობაში იყო პარალიზებული. ხალხი სამსახურში ვერ მიდიოდა. ჩვენ ყველას უფლებებს ვიცავთ, როგორც ამ ხალხის, ასევე მოქალაქეებისაც. მივედით, ავუხსენით როგორც ჩვენ, ისე მერიის წარმომადგენლებმა, მისცეს გონივრული ვადა, რომ გაეთავისუფლებინათ აღნიშნული ტერიტორია. რა თქმა უნდა, [გზა] ხელოვნურად იყო ჩაკეტილი. გზის გადასაკეტად არასაკმარისი რაოდენობა იყო ხალხის, საკმარისი არაა იმისთვის, რომ ქალაქის პარალიზება მოახდინონ“, - განაცხადა კახა ბუხრაძე “ტვ პირველთან“ საუბარში.

აქციის მონაწილეების დარბევა გამთენიისას დაიწყო. მელიქიშვილის გამზირზე მყოფი ერთ-ერთი პირი, კადრებს აქვეყნებს, სადაც ჩანს, როგორ იწყებდნენ სამართალდამცველები შეკრებილთა დაშლას.

იხილეთ ასევე:

• დაშლა: რა ხდებოდა ჭავჭავაძის გამზირზე? - ღამის ქრონიკა (ფოტო, ვიდეო)
• “კარგად მირტყეს... რატომღაც მე გავეხვიე შარში, პოლიციამ მითხრა, წესს არღვევდითო“ - რას ჰყვება აქციაზე დაკავებული “მთავარი არხის“ ოპერატორი გათავისუფლების შემდეგ