პროტესტი ფოტოებში - რა ხდება თსუ- სთან, სადაც 24-საათიანი აქცია მიმდინარეობს: გაშლილია სამი კარავი, ადგილზე მიტანილია პლედები და პარალონები
ჭავჭავაძის გამზირზე, თსუ-ს პირველ კორპუსთან 24 საათიანი საპროტესტო აქცია მიმდინარეობს, რომელშიც მონაწილეობას აქტივისტები, რიგითი მოქალაქეები და ოპოზიციის წარმომადგენლები იღებენ.
ადგილზე გაშლილია სამი კარავი, მიტანილია პლედები პარალონები და სხვა ნივთები. აქციის ორგანიზატორები მომიტინგეებს ამარაგებენ საკვებით, ცხელი ჩაით და ყავით.
“ერთიანობა - ნაციონალური მოძრაობის“ ერთ-ერთი ლიდერის, გიორგი ვაშაძის განცხადებით, “წამზომი ჩაირთო და მომდევნო 24 საათი საღამოს 8 საათამდე ისინი ჭავჭავაძის გამზირზე იქნებიან“.
თბილისის სახელმწიფო უნივერსიტეტის პირველ კორპუსთან კარვების გაშლის შედეგად, სატრანსპორტო მოძრაობა რამდენიმე მიმართულებით არის პარალიზებული.
კერძოდ, საავტომობილო მოძრაობა გადაკეტილია ადგილზე არსებული გზაჯვარედინის ყველა მხარეს - ავტომანქანები ვეღარ გადაადგილდებიან ვერც ვარაზისხევზე, ვერც მელიქიშვილის გამზირზე და ვერც ვარაზისხევიდან კეკელიძის ქუჩისა და ჭავჭავაძის გამზირის მიმართულებით.
ადგილზე მობილიზებული არიან სამართალდამცავები.
გავრცელებული ინფორმაციით, ჭავჭავაძის გამზირის გადაკეტვის/სატრანსპორტო მოძრაობის შეზღუდვის გამო, 18 ნოემბერს ვაკის ტერიტორიაზე მდებარე სასწავლო კორპუსებში დაგეგმილი სააუდიტორიო ან სხვა ტიპის მეცადინეობები შეჩერდება 1 დღით.
ფოტოები: ახალი • Ahali/ ფეისბუქ ჯგუფი “დიტოვე“.
იხილეთ ასევე:
- ქალაქში პირველი კარავი გაიშალა - 24 საათიანი გამაფრთხილებელი პროტესტი და გადაკეტილი მაგისტრალი: რას გეგმავს ოპოზიცია? (ფოტო/ვიდეო)
- “არ შევეგუები და ვიბრძოლებ!.. საკითხი ასე დგას - ან ევროპა, თავისუფლება და განვითარება, ან ჯურღმულში დაბრუნება“ - ოპოზიციის წარმომადგენლები აქციას “დაიბრუნე ხმა” შეუერთდნენ