"რა მაგარი ქალები გყოლიათ ქვეყანაში..." - ორბანის პასუხი ჟურნალისტის კითხვის შემდეგ: ფოტო და ვიდეოკადრები მთავრობის ადმინისტრაციიდან
ორ ქვეყანას შორის ურთიერთობები ურთიერთსახარბიელო და პოზიტიურია - ალბათ, ამის მიზეზი ისტორიაა, რადგან თქვენ თავისუფლებისთვის მებრძოლი ხართ და ჩვენც ასეთივე ნატურის ხალხი ვართ, - ამის შესახებ უნგრეთის პრემიერ-მინისტრმა ვიქტორ ორბანმა საქართველოს პრემიერ-მინისტრთან შეხვედრის შემდეგ გამართულ ერთობლივ ბრიფინგზე განაცხადა.
- ორბანმა ირაკლი კობახიძეს არჩევნებში გამარჯვება მიულოცა და განაცხადა, რომ საქართველოში ვიზიტისთვის არჩევნების შედეგებს დაელოდა, რადგან საარჩევნო კამპანიის დროს მისი ჩამოსვლა ჩარევად არ აღქმულიყო.
"არ მინდოდა საარჩევნო კამპანიის დროს საქართველოში ჩამოსვლა იმიტომ, რომ ეს იქნებოდა ჩვენი ჩარევის მცდელობად აღქმული. ჩვენ დაველოდეთ შედეგებს და მერე გადავწყვიტეთ თბილისში ჩამოვსულიყავით, ამიტომ მადლობა მოწვევისთვის არჩევნების შემდეგ.
ორ ქვეყანას შორის ურთიერთობები ურთიერთსახარბიელო და პოზიტიურია. არ ვიცი, რის გამო ხდება - ალბათ, ამის მიზეზი ისტორიაა, რადგან თქვენ ხართ თავისუფლებისთვის მებრძოლი ხალხი, ჩვენც ასეთივე ნატურის ხალხი ვართ. ჩვენს ირგვლივ დიდი ძალაუფლების მქონე სახელმწიფოები არიან და ჩვენ ყოველთვის ვიბრძვით სუვერენიტეტისთვის, თავისუფლებისთვის. ეს ისტორიული ფაქტია, რაც აშკარად მეტყველებს იმაზე, რომ ჩვენს ურთიერთობებს პოზიტიური სახე აქვს. ხალხი ერთმანეთს აკვირდება და ეს განსაკუთრებული სიხარულის მომცემია. ამიტომ, მინდა მივულოცო საქართველოს პრემიერ-მინისტრს არჩევნებში გამარჯვება“,- განაცხადა ორბანმა.
როგორც ორბანმა აღნიშნა, საპარლამენტო არჩევნებს საქართველოში დააკვირდნენ უნგრელი დამკვირვებლები, რომლებმაც არჩევნები შეაფასეს, როგორც "პოზიტიური, თავისუფალი და დემოკრატიული".
'ვაკვირდები იმ კამათს, რაც არჩევნების შედეგების გამოცხადების შემდეგ არის. საერთაშორისო გამოხმაურებასაც ვეცნობი. შემიძლია ვთქვა, არავის გაუბედავს იმის თქმა, რომ ეს არჩევნები ან მისი შედეგები რაიმე სახით დემოკრატიული არ ყოფილა, იმ კრიტიკული აზრის გარდა რაც გამოითქვა. ეს ასეა. ჩვენ, უნგრელები, ასევე, ვაგზავნით ხოლმე ჩვენს დამკვირვებლებს და საქართველოშიც ასე იყო. შევისწავლე ის ანგარიში, რომელიც უნგრელმა დამკვირვებლებმა წარმოადგინეს. ყველა ასპექტით იყო პოზიტიური, თავისუფალი და დემოკრატიული. ამიტომ, მინდა საქართველოს პრემიერ-მინისტრს მივულოცო“,- განაცხადა ვიქტორ ორბანმა.
"ბედნიერი ვარ და დიდი სიამოვნებით მოგიწვევთ ბუდაპეშტში..." - ამ სიტყვებით მიმართა უნგრეთის პრემიერმა ჟურნალისტებს, რომლებიც პრესკონფერენციის დასრულების შემდეგ მას კვლავ კითხვებს უსვამდნენ.
"თქვენს განკარგულებაში მიგულეთ, რა მაგარი ქალები ჰყოლიათ ქვეყანაში" - თქვა ორბანმა.
ნახეთ ვიდეოკადრები მთავრობის ადმინისტრაციიდან