პარტნიორები:
ავტორი:

“ოპერაცია “მონანიების დღეები“ დასრულდა“ - მძიმე ღამე ირანისთვის: ისრაელმა სარაკეტო ქარხნები, სამხედრო ობიექტები და სარაკეტო სისტემები დაბომბა

“ოპერაცია “მონანიების დღეები“ დასრულდა“ - მძიმე ღამე ირანისთვის: ისრაელმა სარაკეტო ქარხნები, სამხედრო ობიექტები და სარაკეტო სისტემები დაბომბა

ისრაელის თავდაცვის ძალებიs ინფორმაციით, გამთენიისას, ისრაელმა ირანში სამხედრო ობიექტები დაბომბა. სამხედრო ძალების თქმით, მათ ირანში სამხედრო ობიექტებზე, “ზუსტი დარტყმები“ განახორციელეს. დაიბომბა სარაკეტო ქარხნები და სარაკეტო სისტემები - “მიწა-ჰაერი“.

ისრაელის საზოგადოებრივმა მაუწყებელმა განაცხადა, რომ ათობით გამანადგურებელმა იერიში ირანის სამხედრო ობიექტებზე მიიტანა.

ირანულმა საინფორმაციო სააგენტომ Fars-მა დაადასტურა, რომ თეირანის დასავლეთით და სამხრეთ-დასავლეთით მდებარე რამდენიმე სამხედრო ბაზა დაიბომბა.

“ირანის რეჟიმის მიერ ისრაელის სახელმწიფოს წინააღმდეგ თვეების განმავლობაში მიმდინარე უწყვეტი თავდასხმების საპასუხოდ, ისრაელის თავდაცვის ძალები ირანში მდებარე სამხედრო ობიექტებზე ზუსტ დარტყმებს ახორციელებენ.

  • ოპერაცია “მონანიების დღეები“ სარაკეტო დარტყმების სამი ტალღის განხორციელების შემდეგ დასრულდა. საპასუხო დარტყმა განხორციელდა და მისია შესრულდა. ჩვენი თვითმფრინავები სახლში უსაფრთხოდ დაბრუნდნენ“, - ნათქვამია ისრაელის თავდაცვის ძალების განცხადებაში.

ისრაელის თავდაცვის ძალების პრესსპიკერის, დანიელ ჰაგარის თქმით, “ირანი ისრაელს თავს ორჯერ დაესხა და ამის საფასური გადაიხადა“.

“საპასუხო დარტყმა დასრულდა, მისი მიზნები მიღწეულია. ისრაელს ახლა მოქმედების უფრო დიდი თავისუფლება აქვს. ირანი ისრაელს თავს ორჯერ დაესხა და ამის საფასური გადაიხადა“, - განაცხადა დანიელ ჰაგარიმ.

  • მისივე თქმით, ისრაელი ღაზასა და ლიბანში ომის მიზნების მიღწევაზეა ორიენტირებული.

“ჩვენ ღაზასა და ლიბანში ომის მიზნებზე ვართ ორიენტირებული. სწორედ ირანია, რომელიც ფართო რეგიონული ესკალაციისკენ სწრაფვას აგრძელებს. ვიცით, როგორ ავირჩიოთ დამატებითი სამიზნეები და საჭიროების შემთხვევაში მათ დავარტყათ. ეს მკაფიო სიგნალია: მას ვინც ისრაელს დაემუქრება, ეს ძვირი დაუჯდება“, - აღნიშნა ისრაელის თავდაცვის ძალების პრესსპიკერმა.

  • ირანი მზად არის უპასუხოს ისრაელის "აგრესიას"

ირანის საჰაერო თავდაცვის ძალებმა განაცხადეს, რომ თავდასხმები წარმატებით მოიგერიეს, მაგრამ ზოგიერთი სამხედრო პოზიცია დაზიანდა. ირანული საინფორმაციო სააგენტო Tasnim წყაროებზე დაყრდნობით იტყობინება, რომ ირანი მზად არის უპასუხოს ისრაელის "აგრესიას".

ირანის საჰაერო თავდაცვის ძალების განცხადებით, ისრაელის სამიზნე თეირანის, ხუზისტანისა და ილამის პროვინციებში მდებარე სამხედრო ობიექტები იყო როგორც Reuters ირანის დაზვერვის წარმომადგენლებზე დაყრდნობით წერს, შესაძლოა აფეთქებები “ირანის საჰაერო თავდაცვის სისტემის გააქტიურებას უკავშირდებოდეს“.

შეერთებულმა შტატებმა მოუწოდა ირანს "შეწყვიტოს თავდასხმები" ისრაელზე, რათა დაარღვიოს საომარი მოქმედებების მანკიერი წრე.

როგორც BBC წერს, ისრაელის სამხედროების პასუხი ირანზე მოსალოდნელი იყო მას შემდეგ, რაც თეირანმა 1 ოქტომბერს ისრაელზე მასიური შეტევა განახორციელა და დაახლოებით 200 ბალისტიკური რაკეტა გაისროლა.

მაშინ, ოპერაცია ირანის მიერ მხარდაჭერილი ლიბანის შიიტური ჯგუფის “ჰეზბოლას“ ლიდერის ჰასან ნასრალას მკვლელობის საპასუხოდ განხორციელდა. ნასრალა ბეირუთში, “ჰეზბოლას“ შტაბ-ბინაზე ისრაელის თავდასხმის შედეგად დაიღუპა.

იხილეთ ასევე:

ტეგები თემაზე: