რუსული "ხაფანგი" ემიგრანტებისთვის - როგორ მიიტყუეს აფრიკელი ქალები უპილოტო საფრენი აპარატების შემქმნელ ქარხანაში?

"სოციალური მედიის რეკლამები ახალგაზრდა აფრიკელ ქალებს თვითმფრინავის უფასო ბილეთს, ფულს და ევროპაში შორეულ თავგადასავალს ჰპირდებოდა.

თუმცა სამუშაო სასწავლო პროგრამის ნაცვლად, ზოგიერთმა მათგანმა მხოლოდ რუსეთის თათარსტანის რეგიონის სტეპებზე ჩასვლის შემდეგ შეიტყო, რომ ისინი ქარხანაში საბრძოლო იარაღის დასამზადებლად ჩაიყვანეს, რომლებიც უკრაინაში გამოიყენება" - ამის შესახებ Associated Press მოგვითხრობს, რომელმაც მოტყუებული ემიგრანტები ჩაწერა, თუმცა მათ ვინაობას არ აკონკრეტებს.

• მედიის ინფორმაციით, ქალები ჩივიან, რომ ისინი მუდმივი მეთვალყურეობის ქვეშ იმყოფებოდნენ. დაპირებული სწავლისა და ხელფასის ნაცვლად კი ქიმიკატებთან მუშაობა უწევდათ, რაც მათ ჯანმრთელობაზეც ახდენდა გავლენას.

Associated Press -ის ინფორმაციით, ომის წარმოების პირობებში, რუსეთში მუშახელის დეფიციტის შესავსებად, კრემლი უგანდადან, რუანდიდან, კენიიდან, სამხრეთ სუდანიდან, სიერა ლეონედან და ნიგერიიდან, ასევე შრი - ლანკიდან სამუშაოდ იწვევდა 18-22 წლის ქალებს და მათ საუცხოო პირობებს სთავაზობდა.

სწორედ ამ დაპირებებს გაჰყვა 200-მდე აფრიკელი ქალი, რომლებიც თათარსტანის, და ალაბუგას სპეციალურ ეკონომიკურ ზონაში, ქარხანაში 16 წლის რუს პროფესიული სასწავლებლის სტუდენტებთან მუშაობდნენ.

• AP ესაუბრა აფრიკელ ქალებს, რომლებიც იქ რეკრუტირების პროგრამის - "Alabuga Start"-ის საშუალებით აღმოჩნდნენ.

“ქალი, რომელიც რუსეთში მუშაობას დათანხმდა, აღფრთოვანებული იყო შემოთავაზებით. თუმცა, როდესაც ის ალაბუგაში ჩავიდა, მალევე გაიგო, სინამდვილეში რისი გაკეთება მოუწევდა და მიხვდა, რომ ეს იყო "ხაფანგი",“ - წერს გამოცემა.

"ვნანობ და ვწყევლი იმ დღეს, როცა ამ ყველაფრის კეთება დავიწყე" - აცხადებს მოტყუებული მიგრანტი.

მეთვალყურეობის ქვეშ მყოფ მუშებს ნაკლები ანაზღაურება და გრძელი სამუშაო საათები დახვდათ. ქარხნის მენეჯმენტი კი ქალებს ხელს უშლის, რომ სამსახურიდან წავიდნენ.

• თათარსტანში დრონების ქარხანა იზრდება

რუსეთმა და ირანმა 2022 წელს ხელი მოაწერეს 1,7 მილიარდი დოლარის შეთანხმებას. თათარსტანში, ალაბუგას სპეციალური ეკონომიკური ზონა 2006 წელს ბიზნესისა და ინვესტიციების მოსაზიდად შეიქმნა. უკრაინაში დაწყებული ომის შემდეგ, ის სწრაფად გაფართოვდა და ქარხნები სამხედრო წარმოებაზე გადავიდნენ.

ალაბუგა ახლა “კამიკაძე“ დრონების დასამზადებლად, რუსეთის მთავარ ქარხანად მიიჩნევა.

გაჟონილი დოკუმენტების თანახმად, აღნიშნულ ლოკაციაზე 2025 წლისთვის წელიწადში 6000 დრონის წარმოება იგეგმება.