ზურიკომ "აიწყვიტა" - "სენტ-ეტიენმა“ დავითაშვილის ჰეთ-თრიკით გაიმარჯვა: რა შეფასება მიიღო ჩვენებურმა და რას წერს ძმაკაცზე "კვარა"?
ლიგა 1-ის მეშვიდე ტურში "სენტ-ეტიენმა“ სახლში "ოსერი“ ზურიკო დავითაშვილის ჰეთ-თრიკით 3:1 დაამარცხა.
მასპინძლები გასაკვირად აქტიურები იყვნენ, მათ რიგებში განსაკუთრებით ზურიკო დავითაშვილი გამოირჩეოდა, რომელმაც პირველი ლამაზი დრიბლინგი ვერ დააგვირგვინა, თუმცა შემდეგ ისევ შეიჭრა მეტოქის საჯარიმოში და თავისი გუნდი ლამაზი გოლით დააწინაურა. პირველი ტაიმის დასარულს ზურიკომ პარტნიორი მეკარესთან პირისპირ გაიყვანა, მაგრამ მან შანსი ხელიდან გაუშვა.
მეორე ტაიმში ქართველმა კიდევ ორჯერ დალაშქრა მეტოქის კარი და ჰეთ-თრიკით თავის გუნდს გამარჯვება მოუპოვა.
მის ანგარიშზე მიმდინარე ჩემპიონატზე აგრეთვე ორი საგოლე გადაცემაა. დავითაშვილი "სენტ-ეტიენის" მესამე ფეხბურთელია, რომელმაც ლიგა 1-ში ჰეთ-თრიკი შეასრულა.
მატჩის შემდგომ ზურიკოს ვიდეო კომენტარი გამოქვეყნდა კლუბის ოფიციალურ "ფეისბუქგვერდზე", რომელსაც ასეთი წარწერა აქვს, "გზავნილი ბიჭისგან, რომელიც მაშინაც კი მადლობას ამბობს, როდესაც წესით ჩვენ უნდა გადავუხადოთ მადლობა".
ხვიჩა კვარაცხელია მეგობრის კარგ თამაშს გამოეხმაურა და ზურიკოს ფოტო გამოაქვეყნა წარწერით: "ჩემი ბიჭი".
სამ გატანილ გოლს რომ სულაც თავი დავანებოთ, დავითაშვილი უბრალოდ შესანიშნავი იყო, დაფრინავდა მოედანზე და რა გასაკვირია, რომ ანალიტიკური საიტებისგან უმაღლესი შეფასებები დაიმსახურა: whoscored 10.0, sofascore 9.3, flashscore 9.1.