"ძალიან მომენატრეთ, იმედი მაქვს, ყველა კარგად ხართ" - ბერა სოციალურ ქსელში ისევ გამოჩნდა და ცოლ-შვილთან ერთად გადაღებული ვიდეო გამოაქვეყნა
"სოციალური მედიისგან შევისვენე და მართლა ძალიან მომენატრეთ, იმედი მაქვს, ყველა კარგად ხართ", - წერს "ქართული ოცნების" საპატიო თავჯდომარის, ბიძინა ივანიშვილის ყველაზე პოპულარული შვილი, ბერა და სოციალურ ქსელში ოჯახურ ვიდეოს აქვეყნებს.
ერთ დროს, აქტიური ბერა ივანიშვილი საქართველო დატოვების შემდეგ, სოციალურ მედიაში იშვიათად ჩნდებოდა, ის მხოლოდ მისთვის მნიშვნელოვანი თარიღების დროს წერდა და ცოლ-შვილის ფოტოებს ან ვიდეოებს აქვეყნებდა. ბოლო პოსტი კი 2024 წლის იანვარში გამოაქვეყნა, რომელშიც უმცროს ვაჟთან ერთად ჩანდა.
რამდენი ხნით დაბრუნდა ივანიშვილი ინტერნეტ-სივრცეში ამ დროისთვის უცნობია. შესაძლოა თუ არა მისი გააქტიურება მოახლოებულ არჩევნებს უკავშირდებოდეს, დრო გვიჩვენებს. ის წინა არჩევნებისას ხშირად ჩნდებოდა ხოლმე მმართველი გუნდის მხარდასაჭერად.
ბოლო ინფორმაციით, ბერა ივანიშვილი, ცოლთან და ორ ვაჟთან ერთად, ბრაზილიაში ცხოვრობს, თუმცა თუ ის წინასაარჩევნო პროცესში ჩაერთვება, შესაძლოა საქართველოში ჩამოვიდეს.