თვითგამოცხადებული მკურნალის სახლში 24 თავის ქალა იპოვეს - ვარაუდობენ, რომ ისინი მსხვერპლად შესწირეს: უგანდაში მომხდარი შოკისმომგვრელი დანაშაულის დეტალები
უგანდაში, დედაქალაქის გარეუბანში მცხოვრები თვითგამოცხადებული მკურნალის სახლში 24 ადამიანის თავის ქალა აღმოაჩინეს. პოლიციის ვარაუდით, კრიმინალური ფაქტი ადამიანის მსხვერპლშეწირვასთან არის დაკავშირებული.
როგორც BBC- თან უგანდის პოლიციის სპიკერმა პატრიკ ონიანგომ განაცხადა, დაკავებულს, დამულირე გოდფრის, ბრალს “ადამიანის მსხვერპლშეწირვის პრევენციისა და აკრძალვის აქტის“ მიხედვით წაუყენებენ. მას სამუდამო პატიმრობა ემუქრება.
თავის ქალების გარდა, საცხოვრებელ სახლში ნაპოვნია ძვლები და ცხოველების ტყავი. პოლიცია ტერიტორიის შესწავლას აგრძელებს.
თავად ბრალდებული - დამულირა გოდფრი საკუთარ თავს ტრადიციულ მკურნალს და ბალახის ექიმბაშს უწოდებს. თუმცა “უგანდის ტრადიციული მკურნალთა ასოციაცია“ მას არ აღიარებს.
უგანდაში, დაახლოებით 50 მილიონი ადამიანი ცხოვრობს. მოსახლეობის გარკვეული ნაწილი ექსტრემალურ სარწმუნოებას მისდევს. მათ შორის, აქამდეც დაფიქსირებულა ადამიანის მსხვერპლშეწირვის ფაქტები.
ადამიანის მსხვერპლშეწირვა მიიჩნევა ყველაზე ძლიერ საშუალებად და გამოიყენება მაშინ, როდესაც ინდივიდს სხვა რიტუალები არ ეხმარება.
ხშირად ამ არადამიანური რიტუალის მსხვერპლი ბავშვები ხდებიან.
უგანდაში, პოლიციამ ივლისშიც იპოვა მსხვერპლშეწირვის ადგილი, სადაც 17 ადამიანის თავის ქალა იყო. ის დედაქალაქიდან სულ რაღაც 40 კილომეტრში აღმოაჩინეს.