ტრამპის ცრუ მინიშნება, თითქოს ტეილორ სვიფტი მას უჭერს მხარს - მომღერლის ფანებმა ექსპრეზიდენტი დეზინფორმაციის გავრცელებაში დაადანაშაულეს
დონალდ ტრამპმა, როგორც ჩანს, ცრუ მინიშნება გააკეთა, თითქოს აშშ-ის წლევანდელ საპრეზიდენტო არჩევნებზე ტეილორ სვიფტის მხარდაჭერა ექნება. ყოფილმა პრეზიდენტმა სოციალურ მედიაში ყალბი სურათები გააზიარა, სადაც მომღერალი და მისი ფანები თითქოს, მას გულშემატკივრობენ.
- რესპუბლიკელმა საპრეზიდენტო კანდიდატმა გამოაქვეყნა შეტყობინება "ამას ვიღებ!", სურათებთან ერთად, რომლებიც სხვა სოციალური მედია ანგარიშებიდან იყო აღებული. ბევრი მათგანი, როგორც ჩანს, ხელოვნური ინტელექტის გამოყენებით შეიქმნა.
პოსტმა უკურეაქცია გამოიწვია სვიფტის ფანებს შორის, მათ ტრამპი დეზინფორმაციის გავრცელებაში დაადანაშაულეს.
მომღერალს არ გამოუხატავს მხარდაჭერა არც ერთი კანდიდატისთვის 2024 წლის არჩევნებში, მაგრამ 2020 წელს დემოკრატებს უჭერდა მხარს და პრეზიდენტობის დროს ტრამპს აკრიტიკებდა.
ერთ-ერთ ფოტოზე, რომელიც ტრამპმა გააზიარა, გამოსახული იყვნენ სვიფტის ფანები მაისურებით, რომლებზეც ეწერა: "სვიფტები ტრამპისთვის".
პოსტს, როგორც ჩანს, ჰქონდა ეტიკეტი "სატირა" სათაურით: "სვიფტები ტრამპისკენ იხრებიან მას შემდეგ, რაც ISIS-მა ტეილორ სვიფტის კონცერტი ჩაშალა".
შესაძლო საფრთხის გამო სვიფტმა ცოტა ხნის წინ ვენაში სამი კონცერტი გააუქმა. პოლიციამ ისლამური სახელმწიფოს ჯგუფის მიერ შთაგონებული თავდასხმების დაგეგმვის ეჭვით ორი ადამიანი დააკავა.
კიდევ ერთი გაზიარებული ფოტო პირველ მსოფლიო ომში აშშ-ს არმიის გაწვევის პოსტერის მსგავსი იყო, სადაც Uncol Sam-ის სახე სვიფტის სახით იყო ჩანაცვლებული და ეწერა: "ტეილორს სურს, რომ ხმა მისცეთ დონალდ ტრამპს".
NBC News-ის ცნობით, ტრამპის მიერ გაზიარებული ორი სურათი ასახავს რეალურ ქალებს, რომლებიც ტრამპის მხარდამჭერები არიან.
სვიფტი მხარს უჭერდა დემოკრატიულ პარტიას 2020 წლის არჩევნებში და აკრიტიკებდა ტრამპს პოლიციის მიერ ჯორჯ ფლოიდის მკვლელობის გამო გამართული საერთო-ეროვნული პროტესტის დროს.
"მას შემდეგ, რაც მთელი თქვენი პრეზიდენტობის განმავლობაში აღვივებდით თეთრკანიანთა უზენაესობისა და რასიზმის ცეცხლს, გაქვთ თავხედობა, რომ ძალადობით მუქარამდე ისე წარმოაჩინოთ, თითქოს მორალური უპირატესობა გაქვთ?," - დაწერა მან Twitter/X-ზე, - "ნოემბერში ხმას არ მოგცემთ."
ამ წლის დასაწყისში BBC-მ აღმოაჩინა ათობით deepfake ვიდეო, რომლებიც ასახავდნენ შავკანიან ადამიანებს, რომლებიც ტრამპს უჭერდნენ მხარს. არ არსებობდა მტკიცებულება, რომელიც ამ სურათებს ტრამპის კამპანიასთან დააკავშირებდა.