"11 წლის იყო, როცა სეპარატისტებმა გაიტაცეს" - ფალავნის რთული გზა ოლიმპიადამდე: ტყვეობა, საყვარელი მწვრთნელის დაკარგვა, ულამაზესი მეუღლე და ცრემლიანი ტოკიოს ოლიმპიადა

თავისუფალი სტილით მოჭიდავე ქართველი გენო პეტრიაშვილი პარიზის 2024 წლის ოლიმპიადის ოქროს მედლის მფლობელია. ქართველი ფალავანი ფინალში პრინციპულ მეტოქეს ირანელ ამირ ზარეს დაუპირისპირდა და 10:9 მოუგო. ნახევარფინალში კი აზერბაიჯანის სახელით მოასპარეზე გიორგი მეშვილდიშვილი დაამარცხა.

• გენო პეტრიაშვილი ოლიმპიური ვერცხლის დ ბრინჯაოს მფლობელია, ახლა კი ოქროც მის ანგარიშზეა.

ყველას ახსოვს გენოს ემოციური ვერცხლის მედალი 2021 წლის ტოკიოს ოლიმპიადაზე. ქართველი მოჭიდავესთვის მაშინ გადამწყვეტი ბოლო წამები აღმოჩნდა, რადგან მეტოქესთან სწორედ ბოლო წამში ერთი ქულით დამარცხდა.

ტიტულოვანი სპორტსმენისგან საქართველოს ოქროს მედლის მოლოდინი ჰქონდა, უმაღლეს ჯილდოს ელოდა თავად პეტრიაშვილიც, რომელიც დაჯილდოვების დროს ოლიმპიურ კვარცხლბეგზე ატირდა.

27 წლის ფალავანის ცხოვრება მარტივი არ ყოფილა. დღეს ყველა მედია იხსენებდა იმ დროს, როდესაც 11 წლის ასაკში გენო პეტრიაშვილი ტყვეობაში აღმოჩნდა. 2005 წლის 19 აგვისტოს, 11 წლის გენო, ქარელის რაიონის სოფელ ნულიდან, გამოსასყიდის მიღების მიზნით, ოსურ-ქართულმა კრიმინალურმა დაჯგუფებამ, ოკუპირებული ჯავის რაიონის მიმართულებით გაიტაცა.

ბიჭმა ტყვეობაში 99 დღე გაატარა და მისი გათავისუფლება მხოლოდ 2005 წლის 25 ნოემბერს მოხერხდა. როგორც ოჯახის ახლობელი გვიყვება ტყვეობაში ყოფნის დროს, ბიჭი საკმაოდ მძიმე პირობებში იმყოფებოდა.

გათავისუფლების შემდეგ სტრესის დაძლევა გენოსთვის მარტივი არ ყოფილა. ამბობენ, რომ ჭიდაობაზე შეყვარებულ გენოს, ურთულესი წლები მისმა გამზრდელმა მწვრთნელმა ნუგზარ სხირელმა გადაატანინა. დღეს მწვრთნელი მის გვერდით არ ყოფილა, რადგან ბატონი ნუგზარი 2021 წლის 24 იანვარს 75 წლის ასაკში გარდაიცვალა.

"ჩემი ნუგზარი მასწავლებელი... თქვენ ყოველთვის ჩვენთან იქნებით...მადლობა ყველაფრისთვის" - წერდა პეტრიაშვილი მწვრთნელის გარდაცვალების შემდეგ.

ტოკიოს ოლიმპიადის შემდეგ სოციალურ ქსელში სპორტის ქომაგები წერდნენ, რომ გენო პეტრიაშვილს ოლიმპიურ ტატამზე სწორედ გამზრდელი აკლდა. ბატონი ნუგზარი, მსოფლიოს დონის სპეციალისტი, მსოფლიოს საჭიდაო სამყაროში საყოველთაოდ აღიარებული მწვრთნელი გახლდათ. ის იყო გორში თავისუფალი ჭიდაობის სკოლის ფუძემდებელი.

პირველი სერიოზული წარმატება გენო პეტრიაშვილმა 2012 წელს, 18 წლის ასაკში მოიპოვა, როდესაც საქართველოს ჩემპიონატი მოიგო; 2014 წელს, კი მსოფლიოს ახალგაზრდული ჩემპიონატიც მიაყოლა, თუმცა, ეს ოქროს მედალი გენოს პრედუქტალის გამო ჩამოართვეს, რომელსაც პეტრიაშვილი ტყვეობის შემდეგ რეგულარულად სვამდა და რომელიც FILA-მ (ჭიდაობის საერთაშორისო ფედერაციამ) იმ წელს, აკრძალულ პრეპარატთა სიაში შეიტანა.

ჩემპიონობის ჩამორთმევის და 6 თვიანი დისკვალიფიკაციის შემდეგ პეტრიაშვილმა 2-2 ჯერ მოიგო მსოფლიოს (2013, 2015) და ევროპის ჩემპიონატების (2013, 2017) ბრინჯაო. 2016 წელს, პირველად კარიერაში ევროპის ჩემპიონი გახდა. რიოს ოლიმპიადაზე კი ბრინჯაოს მედალსაც დაეუფლა.

27 წლის სპორტსმენი, პანდემიის დროს დაოჯახდა. 2020 წლის ივნისში ქვეყანაში მიმდინარე კოვიდსიტუაციის დროს განსაკუთრებული შეზღუდვები იყო დაწესებული. გენო პეტრიაშვილის რჩეული ნინი მშვიდობაძე გახლავთ.

წყვილმა შარშან ჯვარი ურბნისის ტაძარში დაიწერა, თუმცა ისევ შეზღუდვების გამო გრანდიოზული ქორწილი არ გადაუხდიათ. პირველი შვილი, გოგონა, სოფია პეტრიაშვილი მარტში შეეძინათ.