"ძალიან დიდი მუსიკოსი დააკლდა სამყაროს" - გარდაიცვალა მევიოლინე ლიანა ისაკაძე
ცნობილი მევიოლინე ლიანა ისაკაძე 78 წლის ასაკში გარდაიცვალა. ინფორმაციას ოჯახის წევრები სოციალურ ქსელში ავრცელებენ.
"ღმერთმა ნათელში ამყოფოს, ჩემო უფროსო მეგობარო, შენი სული. ძალიან დიდი მუსიკოსი დააკლდა სამყაროს...შეხვედრამდე ჩემო ლიანა", - წერს კულტურის პალატის თავმჯდომარე დათო ოქიტაშვილი.
ლიანა ისაკაძემ 1970 წელს დაამთავრა პეტრე ჩაიკოვსკის სახელობის მოსკოვის კონსერვატორია. 1970-1992 წლებში იყო მოსკოვის ფილარმონიის სოლისტი; 1981–1995 წლებში საქართველოს სახელმწიფო კამერული ორკესტრის მხატვრული ხელმძღვანელი.
ლიანა ისაკაძე ვუნდერკინდებს ეკუთვნოდა - 3 წლის ასაკში გახდა მუსიკოსი. ლიანა ისაკაძე მსოფლიოს ყველა გამოცემაშია შეყვანილი, სადაც საუკუნის საუკეთესო მევიოლინეების შემოქმედება განიხილება.
ის თბილისისა და ბათუმის საპატიო მოქალაქე იყო. დაჯილდოებულია საპატიო ნიშნის ორდენით.