"ეს ისტორია ძალიან არ მომწონს... უკიდურესად შეშფოთებული ვარ ჩემი ახალი თანამებრძოლის, ძმის გაუჩინარებასთან დაკავშირებით" - სააკაშვილი გიორგი გახელაძეზე
საქართველოს მესამე პრეზიდენტი მიხეილ სააკაშვილი პროფესორ გიორგი გახელაძის გაუჩინარების ფაქტს სოციალურ ქსელში ეხმაურება:
"უკიდურესად შეშფოთებული ვარ ჩემი ახალი თანამებრძოლის, ლევან გახელაძის ძმის, გიორგი გახელაძის გაუჩინარებასთან დაკავშირებით.
ყველას ძალიან დიდი მადლობა, ვინც მისი ძებნითაა დაკავებული. ეს ისტორია ძალიან არ მომწონს და იმედია ყველაფერი კარგად დასრულდება" - წერს სააკაშვილი.
მესამე დღეა, რაც თბილისში ილიაუნისა და საპატრიარქოს უნივერსიტეტის პროფესორს გიორგი გახელაძეს ეძებენ. ამის შესახებ ინფორმაცია მისმა მეუღლემ ირმა მალაციძემ გაავრცელა.
სამძებრო საქმიანობაში სამართალდამცველებიც ჩაერთნენ, თუმცა აქამდე მის შესახებ ოჯახს არანაირი ინფორმაცია არ აქვს. როგორც გახელაძის მეუღლე ამბობს, 19 ივნისს გიორგი გახელაძე უნივერსიტეტში აპირებდა წასვლას, მანქანით გაჩერებამდე ჩაიყვანა, იქ დატოვა და მას შემდეგ არაფერი გაუგია.
როგორც AMBEBI.GE-ს შსს-ში უთხრეს, "გიორგი გახელაძის საძიებო სამუშაოები მეორე დღეა ინტენსიურ რეჟიმში მიმდინარეობს. სამძებრო სამუშაოებში დღეს დილიდან ჩაერთნენ საგანგებო სიტუაციების მართვის სამსახურის მეხანძრე- მაშველები შესაბამისი ტექნიკითა და დრონებით. ფაქტთან დაკავშირებით გამოძიება დაწყებულია 143- ე მუხლით."
წაიკითხეთ ასევე: