რას ნიშნავს "ყველა თვალი რაფაზეა"? - ვირუსული პოსტი, რომელიც "ინსტაგრამზე" 47 მილიონზე მეტმა ადამიანმა გააზიარა, მათ შორის ცნობილმა სახეებმა

ხელოვნური ინტელექტის მიერ შექმნილმა ფოტომ, სადაც ასახულია დევნილ პალესტინელთა კარვების ბანაკები, სოციალური მედია წალეკა.

BBC Arabic-ის ინფორმაციით, პოსტი ინსტაგრამზე 47 მილიონზე მეტმა ადამიანმა გააზიარა, მათ შორის ინდოეთში, პაკისტანში და პუერტო რიკოში. გამზიარებლებს შორის იყვნენ ცნობილი ადამიანები. პოსტი თავდაპირველად მალაიზიაში გამოქვეყნდა.

სლოგანი და თავად სურათი მას შემდეგ გავრცელდა, რაც პალესტინელთა ბანაკზე ისრაელის საჰაერო თავდასხმის შემდეგ ხანძარი გაჩნდა. შემთხვევა ქალაქ რაფაში, ღაზას სექტორის სამხრეთ ნაწილში მოხდა.

ღაზას ჯანდაცვის სამინისტროს ცნობით, რომელსაც ჰამასი აკონტროლებს, ინციდენტს სულ მცირე 45 ადამიანი ემსხვერპლა. ასობით ადამიანს მძიმე დამწვრობა, მოტეხილობები და ჭრილობები აღენიშნებოდა.

მომხდარი მსოფლიოს არაერთმა ლიდერმა, სახელმწიფოს მეთაურმა და საერთაშორისო ორგანიზაციამ დაგმო. ისრაელის პრემიერ-მინისტრმა ბენიამინ ნეთანიაჰუმ ინციდენტს "ტრაგიკული შეცდომა" უწოდა და დაადასტურა, რომ მომხდარზე გამოძიება დაიწყო.

საიდან გაჩნდა სლოგანი "ყველა თვალი რაფაზეა"?

რაფაში კარვების ბანაკზე დარტყმის შემდეგ ბევრმა გაიხსენა ჯანმო-ს წარმომადგენლის პეპერკონის მიერ ოკუპირებულ პალესტინის ტერიტორიების მისამართით ნათქვამი ფრაზა: „ყველა თვალი რაფაზეა მიპყრობილი“, - განუცხადა მან ჟურნალისტებს ჯერ კიდევ თებერვალში.

მას შემდეგ ოფიციალური პირები და აქტივისტები იმეორებდნენ პეპერკორნის ფრაზას, რითაც შეშფოთებას გამოხატავდნენ ისრაელის სამხედრო ოპერაციის მიმართ.

მომდევნო თვეებში სლოგანი გამოიყენებოდა მიტინგებზე მთელს მსოფლიოში და ასევე სოციალურ მედიაში.

როგორ გავრცელდა ფოტო სოციალურ ქსელში ბოლო დღეებში?

მომიტინგეებმა სხვადასხვა ქალაქში სოლიდარობის დემონსტრაციები გამართეს და ბანერებზე ლოზუნგი „ყველა თვალი რაფაზეა მიპყრობილი“ დააწერეს.

მალაიზიაში გამოქვეყნებული ფოტო ცნობილმა სახეებმა გააზიარეს, მათ შორის იყვნენ მომღერალი რიკი მარტინი, თურქი მსახიობი ტუბა ბუიუკუსტუნი, ინდოელი მსახიობი პრიანკა ჩოპრა და სირიელი მსახიობი კინდა ალოუში.

მაჰერ ნამარმა, ელექტრონული ფოსტის მარკეტინგისა და ხელოვნური ინტელექტის კონსულტანტმა, BBC Arabic-ს განუცხადა, რომ მთავარი მიზეზი, რის გამოც თვლის, რომ სურათი ხელოვნური ინტელექტის მიერ იყო შექმნილი, არის ის, რომ ფოტო არ გამოიყურება რეალისტურად. სურათი არ აჩვენებს რაფაჰის რეალურ მდებარეობას.

მასზე გამოსახულია უზარმაზარი უდაბნო და კარვების ბანაკი, პლუს სიტყვები "ყველა თვალი რაფაზეა მიპყრობილი".

სპეციალისტის თქმით, როდესაც ფოტო გამოქვეყნდა, მასზე დატანილი იყო Instagram-ის ფუნქცია, რომლის საშუალებითაც ორი დაწკაპუნებით მილიონობით ადამიანს გაუადვილდა სურათის გაზიარება. მათ არ სჭირდებოდა გადმოწერა და შემდეგ თავიდან ატვირთვა.

მაგრამ ნამარი აღნიშნავს, რომ ფოტოს შინაარსმა და ცნობილი სახეების ჩართულობამ, ხელი შეუწყო მის ფართოდ გავრცელებას.

ექსპერტები ხაზს უსვამენ, რომ სოციალურ ქსელში სურათის ასეთი ფართო გავრცელების კიდევ ერთი მიზეზი არის ის, რომ არ შეიცავს სისხლიან სცენებს, რეალურ ადამიანებს, სახელებს და სხვა ყველაფერს, რაც შეიძლება შეზღუდული იყოს ინსტაგრამის წესებით.