"ლადანივა" - ფრანგულ-სომხური დუეტი, რომელიც "ევროვიზიაზე" სომხეთს წარადგენს: რა არის ცნობილი მუსიკოსებზე, რომლებმაც ქართველები მონუსხეს
"ევროვიზიის" სიმღერის კონკურსზე მიმდინარე წელს სომხეთს ჯგუფი სახელად LADANIVA წარადგენს. ჯგუფი ორი ადამიანისგან შედგება. ესენი არიან მომღერალი ჟაკლინ ბაღდასარიანი და ფრანგი ინსტრუმენტალისტი, ლუის ტომასი.
"ლადანივა" კონკურსზე სიმღერას სახელად Jako შეასრულებს. სიმღერაზე გადაღებული ვიდეო რგოლი უკვე გამოქვეყნდა და საზოგადოების დიდი ნაწილის მოწონება დაიმსახურა.
სიმღერა გუშინ, 14 მარტს გამოქვეყნდა და უკვე Youtube-ზე 800 000 ნახვა აქვს.
<iframe width="560" height="315" src="https://www.youtube.com/embed/_6xfmW0Fc40?si=2fUxLZGQUgrYqzJH" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>სიმღერა განსაკუთრებით საქართველოში მოეწონათ და საინტერესოა, რომ სოციალური ქსელის ქართულ სივრცეში LADANIVA განხილვის ერთ-ერთი მთავარი თემაა. წერენ როგორც დადებით შეფასებებს, ასევე კრიტიკულსაც.
ზოგიერთს ბოლივუდი გაახსენდა, ზოგსაც ენთო ელემენტები მოეწონა, სხვების აზრით კი მომღერლის ენერგეტიკა მომნუსხველია, ზოგმაც ჯგუფს სახელი დაუწუნა, რადგან ის რუსული მანქანის, ნივას შთაგონებითაა შექმნილი.
- რა არის ცნობილი "ლადანივას" შესახებ?
"ლადანივა“ ფრანგულ სომხური ჯგუფია, რომელიც 2010 წელს ქალაქ ლილში დაარსდა. მათი მუსიკალური სტილი შთაგონებულია მუსიკით მთელი მსოფლიოდან, განსაკუთრებით კი ტრადიციული ბალკანური სიმღერებით და სომხური ფოლკორით.
რაც შეეხება მის წევრებს:
1999 წელს სომხეთში დაბადებული ჟაკლინ ბაღდასარიანი ბელარუსში, მინსკში გაიზარდა, საიდანაც 2014 წელს დედასთან ერთად, ემიგრაციაში საფრანგეთში წავიდა. დამთავრებული აქვს ლილის კონსერვატორია.
ტომასი ფრანგია, ის ლილში 1987 წელს დაიბადა, მუსიკოსების ოჯახიდანაა. გატაცებულია ჯაზით, უკრავს თითქმის ყველა ინსტრუმენტზე. ჟასმინმა და ტომასმა ერთმანეთი ერთ-ერთ მუსიკალურ ბარში გაიცნეს და დამეგობრდნენ. მალევე გაჩნდა იდეა, რომ ერთობლივ მუსიკალურ პროექტებზე ემუშავათ.
"ლადანივას“ პირველი ალბომი 2023 წელს გამოვიდა. ჯგუფს "ლადანივა" რუსული ავტომობილის, ნივას გამო დაარქვეს - ნივას ყველგანმავალს უწოდებენ და ამით "ლადანივას" წევრები თავიანთ გულშემატკივარს მიანიშნებენ, რომ თვითონაც მივლენ ყველგან ეთნო მუსიკის ნიმუშების შესაგროვებლად.
რაც შეეხება საქართველოს, "ევროვიზიის" სიმღერის კონკურსზე ამჯერად ჩვენს ქვეყანას ნუცა ბუზალაძე წარადგენს სიმღერით - Firefighter. სიმღერის მუსიკისა და ტექსტის ავტორები ჩრდილოეთ მაკედონიელი კომპოზიტორი და პროდიუსერი დარკო დიმიტროვი და მუსიკოსი ადა სატკა არიან.
- წაიკითხეთ ვრცლად ნუცა ბუზალაძესთან ინტერვიუ: ნუცა ბუზალაძე "ევროვიზიაზე" ცეცხლის ჩაქრობასა და უსიყვარულობის დაძლევას შეეცდება - რას ამბობს მომღერალი საკონკურსო სიმღერის მთავარ გზავნილზე? (ვიდეო)