მნიშვნელოვანი ინფორმაცია
16
აპრილიდღის ზოგადი ასტროლოგიური პროგნოზი
ოთხშაბათი, მთვარის მეთვრამეტე დღე, მთვარე მშვილდოსანში გადავა 06:36-ზე
არ წამოიწყოთ ახალი საქმეები, სასამართლო პროცესები. არ გირჩევთ ვაჭრობას, უძრავ ქონებასთან დაკავშირებული საკითხების მოგვარებას. კარგი დღეა შემოქმედებითი საქმიანობისთვის. ურთიერთობისას აკონტროლეთ ემოციები. კამათი დაუშვებელია. კარგი დღეა მოგზაურობისთვის, ხანგრძლივი მგზავრობისთვის. დაისვენეთ, მაგრამ ნაკლები იძინეთ. მოერიდეთ ქორწინებასა და ჯვრისწერას. გაამდიდრეთ თქვენი რაციონი თხილითა და მცენარეული ზეთით. სიგარეტის რაოდენობა და ალკოჰოლის დოზა შეამცირეთ. გაუფრთხილდით ღვიძლს. მოერიდეთ ღვიძლისა და ნაღვლის ბუშტის ოპერაციას.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
"რადგან ქართულ სიმღერებს ხშირად ვუსმენ, ეს ენა უკვე მშობლიურივით არის ჩემთვის" - ვინ არის ჩერქეზი ახალგაზრდა, რომლის ქართულად ნამღერს ჩვენში დიდი გამოხმაურება მოჰყვა?
11:26 / 05-03-2024
ორი დღის წინ, სოციალურ ქსელში გავრცელდა ადიღელი მომღერლის, ასტემირ აპანასოვის ვიდეო, რომელშიც არაჩვეულებრივად მღერის კომპოზიტორ ეთერ ჭელიძის ცნობილ ქართულ ჰიტს "მაღლა მაღლა რომ დაფრინავ...“
ვიდეოს აღწერაში ვკითხულობთ, - ყაბარდო-ბალყარეთის, ყარაჩაი-ჩერქეზეთის დამსახურებულმა არტისტმა, ადიღელმა ასტემირ აპანასოვმა ამჯერად მსმენელი ქართული სიმღერის ცოდნით გააოცაო.
უცხოელების არ ვიცით და ქართველებისთვის კი ნამდვილად მოულოდნელი იყო ადიღელი ბიჭის მიერ უაქცენტო ქართულით შესრულებული სიმღერა. რუსეთში მცხოვრები ქართული წარმოშობის მომღერალი, ეთერ ბერიაშვილი, ასტემირს კომენტარებში უწერს:
"რა ნიჭიერი ადამიანი უნდა იყო, რომ უნაკლოდ იმღერო ქართულად, ისე რომ არ იყო ქართველი! ჩემო ძვირფასო, შენ ბრწყინვალე ხარ! ვინც ბოლომდე არ მოუსმენს, დიდ სულიერ სილამაზეს დაკარგავს! მიყვარხარ, ვამაყობ შენით, მადლობა რომ მღერი ჩემს მშობლიურ ენაზე.“
თუმცა ეს ასტემირისთვის პირველი ქართული სიმღერა არ ყოფილა. როგორც მოვიძიეთ, 2022 წლის სექტემბერში ეთერ ბერიაშვილის სოლო კონცერტზე დუეტში "ანგელოზად მოხვალ“ იმღერა.
- ვინ არის ასტემირ აპანასოვი
ასტემირი 1989 წლის 21 სექტემბერს ნალჩიკში დაიბადა და გაიზარდა და-ძმასთან, ალბინასთან და ალიმთან ერთად, ხელოვანების ოჯახში. ის ეროვნებით ჩერქეზია და ბავშვობაში დიდ დროს ატარებდა დედის ნათესავებთან ადიღეის დედაქალაქ მაიკოპში.
აპანასოვების მშობლები ახალგაზრდობაში მღეროდნენ ანსამბლ "ყაბარდინკაში“, შინაც ხშირად აწყობდნენ მუსიკალურ საღამოებს, რომელშიც შვილებიც მონაწილეობდნენ. ამ დროს ასტემირი თურმე ყველაზე ხმამაღლა მღეროდა.
სკოლის დამთავრების შემდეგ ნალჩიკის ჩრდილო კავკასიის ხელოვნების ინსტიტუტში ჩაბარება გადაწყვიტა, მაგრამ ამისთვის ჩასარიცხად ქრთამი მოსთხოვეს. რის შემდეგაც მამასთან ერთად, მოსკოვში გადავიდა საცხოვრებლად.
- მუსიკა და შემოქმედება
ასტემირმა სცენაზე გამოსვლა ექვსი წლის ასაკიდან დაიწყო. ბიჭი ჯერ ძმასთან ალიმთან ერთად გამოდიოდა, შემდეგ მარტო დარჩა. მისი პროდიუსერის ფუნქციებს კი მამა ითავსებდა. ხანდახან სცენაზე ბავშვთან ერთად დედაც იდგა და მღეროდა. მშობლებმა სპეციალურად შეიძინეს დიდი მანქანა სპექტაკლებზე აღჭურვილობისა და კოსტიუმების გადასატანად და გზაზე კი შვილებს სკოლისთვის ამეცადინებდნენ, რადგან ხშირად უწევდათ გაცდენა.
მოგვიანებით მოსკოვში გადასული ასტემირი წლების განმავლობაში თამაშობდა სპექტაკლებში, გამოდიოდა კონცერტებზე, მაგრამ რამდენიმე წელში გადაწყვიტა სოლო კარიერა დაეწყო.
დაწერა ორიგინალური ლექსები, მელოდიები და თავდაპირველად კერძო ღონისძიებებზე გამოდიოდა. ასე რომ, მას მეტი დრო და ენერგია ჰქონდა შემოქმედებისთვის. მომღერალი საკუთარ ნამუშევრებში ხშირად ჰყვებოდა პირადი ცხოვრების დეტალებს: მაგალითად, მის რეპერტუარშია კომპოზიცია, რომლებიც ეძღვნება ყოფილ შეყვარებულს ლიანას და მის ქალიშვილ საფინას. თავის მელოდიებში აერთიანებს პოპულარულ და ეთნო მუსიკას.
ის რეგულარულად გამოდის კავკასიური და რუსული დიასპორების წინაშე საფრანგეთში, ყაზახეთში, ბელგიაში, ავსტრიაში, აშშ-სა და ჩინეთში. აპანასოვი სცენაზე გამოდის ჰიტების ქავერ ვერსიით და ორიგინალური კომპოზიციებითაც.
არტისტის დისკოგრაფიაში შედის სიმღერები 13 ენაზე. ის ცდილობს უცხო სიტყვები სრულყოფილად გამოთქვას, როგორც ეს ქართული სიმღერის შემთხვევაშია. ამბობს, რომ ყურადღებით სწავლობს ტექსტს, შემდეგ კონსულტაციებს გადის იმ ქვეყნის წარმომადგენლებთან, რა ენაზეც უნდა იმღეროს. არტისტი დარწმუნებულია, რომ კარგ მუსიკას ეროვნება არ აქვს.
პირადი ცხოვრება
მიუხედავად იმისა, რომ ასტემირი ხშირად მღერის პირად გამოცდილებაზე, იგი უხამსად მიიჩნევს რომანტიკული ურთიერთობების განხილვას ინტერვიუებში. მომღერალი დიდი ხნის წინ დაშორდა მეუღლეს, ეროვნებით ჩეჩენ ზალინა ამაგოვას. აღიარებს, რომ ოჯახის შესაქმნელად ეძებს გულწრფელ და ხალისიან გოგონას, რომელიც მიიღებს საკუთარ შემოქმედებასთან ერთად.
ინტერვიუს ჩასაწერად ambebi.ge ასტემირს დაუკავშირდა. გვინდოდა იმ უამრავი ადამიანის ცნობისმოყვარეობა დაგვეკმაყოფილებინა, ვინც მომღერლის უაქცენტოდ შესრულებული ნამღერი მოისმინა, გაიზიარა და დაინტერესდა, რა აკავშირებდა ადიღეელ ბიჭს საქართველოსთან...
- ასტემირ, რა იცით საქართველოს შესახებ, როგორ შეარჩიეთ ეს სიმღერა?
- სამწუხაროდ, საქართველოში არასდროს ვყოფილვარ, მაგრამ ბავშვობიდან მიყვარდა ქართული კულტურა და მუსიკა. მოსკოვში ყოფნისას დავდიოდი ქართული ანსამბლების, "ერისიონის,“ "მგზავრების“ და სხვა ქართველი შემსრულებლების კონცერტებზე. ჩერქეზებსა და ქართველებს ბევრი რამ აქვთ საერთო, მაგალითად, მდიდარი ისტორია. ეს სიმღერა შემთხვევით მოვისმინე ინტერნეტში ჯგუფ "გორდელას“ შესრულებით და პირველივე ნოტიდან შემიყვარდა. რამდენიმე წელი ყურსასმენებით ვუსმენდი. ამას წინათ, უბრალოდ, ვიჯექი და ვიმღერე... მაგრამ საქართველოსგან ასეთ თბილ რეაქციას არ ველოდი, ეს კიდევ უფრო აძლიერებს ჩემს სიყვარულს საქართველოს მიმართ.
- იცნობთ ქართველ მომღერლებს, ვინც რუსეთში მღერიან?
- ვიცნობ და ვმეგობრობ ეთერი ბერიაშვილთან, ის ქვეყნის ერთ-ერთი საუკეთესო ხმაა. დანარჩენი ბევრი არაფერი ვიცი ქართველი მომღერლების შესახებ. მაგრამ ბევრს "ვაფოლოვებ“ სოციალურ ქსელში, მაგალითად, მარიამ ელიაშვილს...
- ასტემირ, როგორ მღერი ასეთი კარგად ქართულად, როდესაც ენა არ გესმით. იცით, რომ ძალიან ბევრი ქართველი აზიარებს თქვენს სიმღერას?
- ჩერქეზული ენა ერთ-ერთი ყველაზე რთული ენაა და მის შემდეგ, ზოგადად, ნებისმიერი ბგერის წარმოთქმა შეგიძლიათ და რადგან ქართულ სიმღერებს ხშირად ვუსმენ, ეს ენა უკვე მშობლიურივით არის ჩემთვის. ალბათ ამიტომ არ გამიჭირდა.
რაც შეეხება ქართველების შეფასებებს, დიახ, შოკირებული ვარ. ჯერ ვერ შევაფასებ ამ სიმღერის გაზიარებების მასშტაბებს, მაგრამ წარმოუდგენლად სასიამოვნოა, ყოველი თბილი სიტყვა და გამოხმაურება ქართველი ხალხისგან.
00:00 / 00:00
მკითხველის კომენტარები /
39 /
თარიღის მიხედვით
მოწონების მიხედვით
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
რუსეთი ოკუპირებულ სოხუმში სანქცირებული ავიაკომპანიების ფრენებს იწყებს
კვირის კითხვადი სტატიები
მნიშვნელოვანი ინფორმაცია
მკითხველის რჩევით
საუკეთესო ხარ.გაიხარე
ჩრდილო კავკასიელები თითქმის ყველა ქართველების მონათესავე ერებია,ოღონდ რამდენიმე ათასი წელი იზოლიორებულად ცხოვრებამ, ენათა შორის სხვაობა წარმოშვა...