უამინდობის გამო, პანამის სანაპიროსთან მიგრანტებით სავსე ნავი ჩაიძირა - დაიღუპა ოთხი ადამიანი

პანამის სანაპიროსთან ნავის ჩაძირვის შედეგად 4 მიგრანტი დაიღუპა, - ამის შესახებ ინფორმაციას ადგილობრივი მედია ავრცელებს.

პანამის სასაზღვრო პოლიციამ განაცხადა, რომ მიგრანტებით სავსე ნავი პანამის სანაპიროსთან ახლოს ცუდი ამინდის გამო ჩაიძირა, მაგრამ მსხვერპლის რაოდენობა ან მათი ეროვნება არ დაადასტურა.

ადგილობრივი მედიასაშუალებების ცნობით, ნავზე 25 მიგრანტი იმყოფებოდა, რომელთაგან 4 დაიღუპა და 7 დაკარგულად ითვლება.

„სავარაუდოდ, არალეგალი მიგრანტები, კრიმინალებს კარეტოს რაიონთან ახლოს გადაჰყავთ, რომლებიც მიგრანტების სიცოცხლეს რისკის ქვეშ აყენებენ“, - ნათქვამია პანამის სასაზღვრო პოლიციის განაცხადებაში.

პანამის მთავრობამ ბოლო რამდენიმე თვის განმავლობაში მიგრანტების ნაკადის ზრდის ფონზე დარიენის პროვინციაში, რომელსაც მიგრანტები აშშ-სკენ მიმავალ გზაზე გადიან, უსაფრთხოება გააძლიერა.