"ვიცი ბევრ "კეთილმოსურნეს" გაუხარდება ეს ამბავი..." - "მასტერის" თქმით, ქეთი მელუამ მათი დუეტის ლიცენზიის გაუქმება მოითხოვა: რას წერს რეპერი სოცქსელში?

რეპერი მასტერი, იგივე გიორგი პავლიაშვილი სოციალურ ქსელში წერს, რომ ბრიტანეთში მოღვაწე ქართული წარმოშობის მომღერლის ქეთი მელუას ლეიბლმა და თავად მომღერალმა მიიღეს გადაწყვეტილება, რომ გაუქმდეს მათი დუეტის ლიცენზია - ანუ, წაიშალოს ყველა არხიდან სიმღერა.

• როგორც რეპერი წერს, ქეთი მელუამ სიმღერის წაშლის მოთხოვნის მიზეზად "ქართული LGBT ორგანიზაციებისგან მიღებული საჩივრების სიმრავლე" დაასახელა.

მასტერის თქმით, LGBT ორგანიზაციების მხრიდან გაღიზიანება, ნანი ბრეგვაძის „დრაგ ბოლზე“ მიწვევის შემდეგ, მის მიერ გამოხატულ პროტესტს მოჰყვა.

"ქეთი მელუას ლეიბლმა და თავად მომღერალმა მიიღო გადაწყვეტილება, რომ გააუქმოს ჩვენი დუეტის ლიცენზია, ანუ მოითხოვეს სიმღერის აღება. მიზეზად კი დასახელდა ქართული LGBT ორგანიზაციებისგან მიღებული საჩივრების სიმრავლე. წერილების შინაარსზე დროის დაკარგვა ალბათ, არ ღირს.

ყურადსაღებია, რომ ეს მას შემდეგ მოხდა, რაც პროტესტი გამოვხატე ფაქტზე, რომელიც ეხებოდა ნანი ბრეგვაძის "დრაგ ბოლზე" მიწვევას. ნანიმ ივენთზე აღარ იმღერა და ახლა, ალბათ, მათი მხრიდან "რევანშის" დრო იყო. ვფიქრობ, სრულიად უსამართლოა ეს გადაწყვეტილება, რადგან ამ კონკრეტულ სიმღერას არ ჰქონდა არანაირი შეხება ამ თემასთან და მასზე დაიხარჯა უდიდესი დრო და ენერგია, არ იფიქროთ ვწუწუნებდე ამ თემაზე, უბრალოდ, ყველა ჩემი სიმღერა ჩემთვის ძვირფასია, მითუმეტეს, როცა მსმენელი მას ასე იყვარებს...

ეგ არაფერი, აქამდე არ შევუჩერებივარ არაფერს ამ გზაზე და არც ეს იქნება ბარიერი, რომელიც აზრს შემაცვლევინებს. ყველამ იცით რომ, მე არ ვდგავარ ადამიანების წინააღმდეგ, ვინც სექსუალურ უმცირესობას წარმოადგენს. მე ვარ წინააღმდეგი პროპაგანდისა და იმ ორგანიზების, რომლებიც, არათუ ადამიანების უფლებებზე ფიქრობენ, არამედ ფინანსდებიან მხოლოდ იმ მიზნით რომ მეტ ადამიანში გამოიწვიონ დაპირისპირება, ზიზღი, მოახდინონ ჩვენი ტრადიციებისა და დაუწერელი წესების შეცვლა, ყველაფერი დაიყვანონ პრიმიტიულ დონემდე და ეს ყველაფერი წარმოაჩინონ მათი სტანდარტებით, სადაც ტრადიციულად მოაზროვნე ადამიანი ბნელი და აგრესორია, ხოლო ადამიანი, რომელიც ერთსქესიანთა ქორწინების მომხრეა - თანამედროვე და ნათელ მხარეს მდგომი.

ვიცი, ბევრს "კეთილმოსურნეს" გაუხარდება ეს ამბავი, მაგრამ ეგ არაფერი, კიდევ უფრო ბევრნი არიან ადამიანები, რომლების გვერდში დგომასაც ვგრძნობ და მათ დაღალატებას არ ვაპირებ არც ერთი სიმღერის ფასად!!! მადლობა და მიყვარხართ“ - წერს მასტერი.

"თბილისიდან ლონდონამდე შორია..." - ქეთი მელუას და მასტერის ახალ სიმღერაზე ვიდეოკლიპი 2023 წლის დეკემბერში გამოვიდა. მიუხედავად ბრიტანული მხარის მოთხოვნისა, მასტერისა და ქეთი მელუას დუეტი "თბილისი ლონდონი" YouTube-ზე ამ დრომდე იძებნება.

რაც შეეხება ნანი ბრეგვაძის "დრეგ ბოლზე" გამოსვლას, ამის შესახებ 2023 წლის ბოლოს გახდა ცნობილი.

"The Drag Ball: All Stars ბრუნდება! მას გახსნის ერთადერთი და განუმეორებელი, ქართული ესტრადის კაშკაშა ვარსკვლავი, ლეგენდარული ნანი ბრეგვაძე“... - წერდნენ ღონისძიების ორგანიზატორები. რამდენიმე დღეში ცნობილი გახდა, რომ მომღერალი ჯანმრთელობის მდგომარეობის გამო ვეღარ იმღერებდა ღონისძიებაზე და შეკრებილ საზოგადოებას ვიდეოს საშუალებით მიმართა:

"შობა-ახალ წელს გისურვებთ, პირველ რიგში, ჯანმრთელობას, სიმშვიდეს და ბედნიერებას. ვწუხვარ, რომ მე ვერ ვესწრები ამ საღამოს, მაგრამ დარწმუნებული ვარ, ყველაფერი კარგად ჩაივლის და მე მგონია, სიყვარული მაინც გაიმარჯვებს".