ისრაელს "ჰამასმა“ 50 წლის თავზე მეორე "განკითხვის დღის“ ომი მოუწყო, მაგრამ დიდი ომი მხოლოდ ახლა იწყება - რა ვითარებაა კონფლიქტის ზონაში და როგორ შეიძლება განვითარდეს მოვლენები

• ირაკლი ალადაშვილის ბლოგი

ღაზის სექტორიდან საერთაშორისო ტერორისტული ორგანიზაციის "ჰამასის“ მიერ 2023 წლის 7 ოქტომბრის დილას დაწყებული კომბინირებული შეტევისგან (ხმელეთიდან, ჰაერიდან და ზღვიდან) ისრაელის სამხრეთ ნაწილის დასახლებულ პუნქტებზე, ერთ დღე-ღამეზე მეტი გავიდა და უკვე შეიძლება ერთგვარი სურათის შექმნა და საწყისი ანალიზის გაკეთება, თუ რა ხდება საერთოდ იმ რთულ რეგიონში...

პირველი: "ჰამასის“ კარგად ორგანიზებული თავდასხმა ზუსტად დაემთხვა ნახევარი საუკუნის წინ, 1973 წლის 6-25 ოქტომბრის "განკითხვის დღის“ ომის დაწყებას, როდესაც ეგვიპტისა და სირიის არმიებმა ერთდროულად შეუტიეს ისრაელის პოზიციებს სუეცის არხზე და ჰოლანის სიმაღლეებზე იმ დღეს, როდესაც მორწმუნე ებრალები-იუდაველები "იომ-კიპურს“ ("განკითხვის დღე“) 25 სთ-იანი ლოცვებში ატარებენ...

მეორე: ისევე, როგორც 50 წლის წინ, ეხლაც ისრაელის სპეცსამსახურები და არმია ფაქტობრივად მოუმზადებელი აღმოჩნდა არაბების მოულოდნელი ფართომასშტაბიანი თავდასხმისთვის, რაც ისრაელის ხელისუფლებისგან დიდ რეფორმებს მოითხოვს ძალოვან სტრუქტურებში გასატარებლად.

მესამე: ღაზას სექტორიდან ისრაელის სამხრეთ ნაწილში გაჭრილმა "ჰამასის“ მობილურმა ჯგუფებმა მოტოციკლეტების, პიკაპების, კატერებისა და თვით პარაპლანების გამოყენებითაც კი სწრაფად შეაღწიეს ისრაელის არანაკლებ შვიდ მსხვილდასახლებულ პუნქტში და უშუალოდ ღაზას სექტორის მიმდებარე ბევრ კიბუცში (სოფლის ტიპის ებრაელთა დასახლებები) და მოახდინეს იქაურობის რამდენიმესაათიანი ოკუპაცია პოლიციის შენობების, სამხედრო ნაწილებისა თუ მშვიდობიანი მოსახლეობის სახლების აფეთქება-გადაწვის ჩათვლით...

მეოთხე: "ჰამასის“ შეიარაღებული წევრები დროებით ოკუპირებულ ისრაელის დასახლებულ პუნქტების მაცხოვრებლების, ასევე გზებზე მიმავალი ტრანსპორტის მგზავრების მიმართ იჩენდნენ განსაკუთრებულ სისასტიკეს მათი ადგილზე დახვრეტის, წამებისა და მძევლებად აყვანის ჩათვლით.

მეხუთე: "ჰამასმა“ ისრაელის სამხრეთი ნაწილის ქალაქებიდან და კიბუცებიდან გაიტაცა რამდენიმე ათეული ისრაელის მოქალაქე, როგორც ტყვედ აყანილი და დაჭრილი "ცახალის“ სამხედრო მოსამსახურეები, ისე სამოქალაქო პირები, მათ შორის ახალგაზრდა ქალები და ისინი ღაზას სექტორში გადაიყვანეს.

მეექვსე: რჩება შთაბეჭდილება, რომ "ჰამასის“ მიერ განხორციელებული ამ კომბინირებული თავდასხმის მთავარი მიზანი ისიც გახლდათ, რომ რაც შეიძლება მეტი სამხედრო ტყვე და სამოქალაქო მძევალი აეყვანათ, რათა შემდგომში დაიწყონ ვაჭრობა ისრაელის ციხეებში მყოფ არანაკლებ შვიდი ათასს პალესტინელზე გასაცვლელად...

მეშვიდე: "ჰამასმა“ თავდსხმისას გამოიყენა რეკორდული რაოდენობის რაკეტა, თითქმის 5 ათასამდე, რომელთა დროის მოკლე პერიოდში გაშვების შედეგად ისრაელის საჰაერო თავდაცვა,მათ შორის "რკინის გუმბათის“ ანტისარაკეტო სისტემები "გადაიტვირთნენ“ და ბევრი რაკეტის ჩამოგდება უბრალოდ ვეღარ მოასწრეს.

მერვე: ისრაელის სამხედრო-პოლიტიკურ ხელმძღვანელობას არცთუ უსაფუძვლოდ ჰქონდა იმის დიდი შიში, რომ სამხრეთიდან, ღაზას სექტორიდან "ჰამასის“ მასიური სარაკეტო დარტყმებისა და სახმელეთო შეჭრის პარალელურ რეჟიმში ჩრდილოეთიდან, ლიბანიდან უკვე პროირანული "ჰესბოლა“ წამოიწყებდა ისრაელზე თავდასხმას. პრინციპში ეს მაინც მოხდა, ოღონდ მხოლოდ 24 სთ-ის შემდეგ და ისიც რამდენიმე ნაღმსატორცნიდან სროლით თუ შემოიფარგლა, რასაც ისრაელის არტილერიამ საპასუხო დარტყმებით უპასუხა ლიბანის ტერიტორიაზე და ეტყობა "ჰესბოლა“ მეტით ვერაფრით დაეხმარება "ჰამასს“.

მეცხრე: თავდასხმიდან 30 სთ-ის გასვლის შემდეგაც ისრაელის არმიასა და საპოლიციო დანაყოფებს ჯერ კიდევ ბოლომდე არ ჰქონდათ "გაწმნდილი“ კიბუცები "ჰამასის“ მებრძოლებისგან, მაგრამ ეს უახლოესს საათებში აუცილებლად მოხდება, რადგან თითოეულ სახლს ამოწმებენ, სადმე ხომ არ იმალებიან პალესტინელები.

მეათე: ერთ დღე-ღამიანი საბრძოლო მოქმედებების შედეგად დაღუპულია არანაკლებ 300 ისრაელის მოქალაქე, ხოლო 1 600-მდე კი დაჭრილი და დაშავებული.

ღაზას სექტორში ისრაელის ავიაციის დაბომბვის შედეგად დაიღუპა 250-მდე პალესტინელი, ხოლო 2 ათასამდე კი დაიჭრა. განაგრძეთ კითხვა

ასევე იხილეთ:

• რატომ ვერ შეძლო ისრაელის დაზვერვამ და თავდაცვამ "ჰამასის" თავდასხმის თავიდან არიდება და რას აცხადებენ ქვეყნის ოფიციალური პირები?