"ვთვლი, რომ ახლა ასეა სწორი... მისურვეთ წარმატება, აუცილებლად დამჭირდება" - ბახვა ბრეგვაძემ ტელევიზია დატოვა

ბახვა ბრეგვაძემ "იმედი“ დატოვა, ამის შესახებ ტელეწამყვანმა "ინსტაგრამზე" დაწერა. ბრეგვაძე წერს, რომ ორივე გადაცემა "მელომანიც“ და "დილის შოუც“ რეიტინგული გადაცემები იყო და მაშინ დასრულდა, როდესაც პიკში იყო.

• ბახვა ბრეგვაძე:

- ტელევიზიაში რომ ვიწყებდი მუშაობას, ყველას ვეუბნებოდი, რომ ერთი ან ორი წელი ვიმუშავებდი იქ და მერე ისევ გავაგრძელებდი საკუთარი თავის ძიებას თუ გამოცდას სხვა პროფესიებში. გამიგრძელდა... გამიგრძელდა, იმიტომ რომ, შემიყვარდა იქაურობა, პირველ რიგში ის ადამიანები და გუნდი, ვისთან ერთადაც ამ გადაცემებს ვაკეთებდი.

შემიყვარდა პროცესი, გამოხმაურება, მაყურებლები, რომლებიც სოც ქსელებში, ქუჩაში თუ ყველგან, უდიდეს სიყვარულს და სითბოს გამოხატავდნენ ჩვენი გადაცემების თუ ჩემს მიმართ. ძალიან მომენატრება და დამაკლდება ეს ყველაფერი, მაგრამ ვთვლი რომ ახლა ასეა სწორი. მოვიდა სიახლეების დრო, ამიტომ ამ სატელევიზიო სეზონის დასაწყისში, გადავწყვიტე რომ ეს ჩემი ბოლო სეზონი იქნებოდა.

ცხადია, წინასწარ შევატყობინე და ყველა გავაფრთხილე. ამიტომ მოულოდნელი არავისთვის არ იქნება. ბევრი ადამიანი იმსახურებს ჩემგან მადლობას, ხოდა უდიდესი მადლობა ყველას, ვინც ხელი შემიწყო და დამეხმარა ამ წლების განმავლობაში მეკეთებინა ის რაც მინდოდა და ისე როგორც მინდოდა. ჩემს განსაკუთრებულად მაგარ გუნდს დიდი მადლობა, უდიდესი მადლობა ძვირფას მაყურებელს. ბუნებრივია, ამ წლების განმავლობაში, კარგიც იყო და ცუდიც, სიხარულიც და ნერვიულობაც , მაგრამ აქცენტს კარგზე ვაკეთე, რადგან, დიდი წილი, დადებითი მოგონება მომაქვს ტელევიზიიდან.

სუბიექტური ვარ, თუმცა მაინც დავწერ რომ ჩემი აზრით, ორ ძალიან კარგ გადაცემას ვაკეთებდით ამ წლების განმავლობაში - “დილის შოუს” და “ მელომანს ” ყველაფერი ჩვენით, ერთად მოვიფიქრეთ, შევკარით, დავალაგეთ. დააგვიმტკიცეს და ჩვენვე განვახოციელეთ. ამიტომ, გასაკვირი არც არის რომ განსაკუთრებული ამაგი გვაქვს ამ პროექტებზე და მართლა შვილივით ვუვლიდით და ვუფრთხილდებოდით ორივე გადაცემას.

ბევრჯერ ვყოფილვართ ამაყები ჩვენი გადაცემებით, სტუმრებით, აღმოჩენებით, რთული ჩანაფიქრების განხორციელებით, რეკორდული და მზარდი რეიტინგით, მუდმივი გამარჯვებებით... მოკლედ, კარგი იყო რაც იყო... რეიტინგის პიკში სანამ არის, მაშინ რომ დასრულდა, ესეც რაღაც მხრივ მაგარია. კიდევ ერთხელ დიდი მადლობა სულ ყველას. მთელი გულით წარმატებას გისურვებთ. მეც მისურვეთ, აუცილებლად დამჭირდება და გამომადგება ახალ თავგადასავლებში. როგორც მიხვდით, ტელევიზიისგან ამ ეტაპზე დასვენებას ვაპირებ. ამიტომ რა იქნება შემდეგი არ ვიცი, ვნახოთ. ისე, მხოლოდ წინ და წინ", - წერს ბახვა ბრეგვაძე.

შეგახსენებთ, რომ წლების მანძილზე "დილის შოუს“ წამყვანები იყვნენ ბახვა ბრეგვაძე, მანიკა ასათიანი, სალომე არჩბა და კახა კინწურაშვილი. რამდენიმე თვის წინ, მარტში კახა კინწურაშვილმა ტელევიზია პროტესტის ნიშნად დატოვა, კინწურაშვილის გადაწყვეტილება ე.წ. აგენტების შესახებ კანონპროექტს უკავშირდებოდა.

"სხვათა შორის, რა თქმა უნდა, ხდება ასეც. მე იმედიდან რეალურად, 1 კვირის წინ წამოვედი, რადგან ეს კანონპროექტი იყო უკანასკნელი წვეთი. ვფიქრობ, ყველა ადამიანს საკუთარი საბრძოლველი აქვს და ამ ბრძოლაში ის ინსტრუმენტები უნდა გამოიყენოს, რაც დააგროვა შეგნებითა და გამოცდილებით. მე ვერ ვისაუბრებ სხვებზე, თუმცა, იმედში არიან ადამიანები, ჩემი მეგობრები და კოლეგები, რომლებიც მთელი ეს წლებია, ჩემს გვერდით ისხდნენ. მათ დიდ პატივს ვცემ, ვიცი მათი განწყობების შესახებ. მათ საკუთარი ბრძოლის მექანიზმები აქვთ და თავისი შეხედულებებიდან გამომდინარე იტყვიან სათქმელს", - ამბობდა მაშინ კინწურაშვილი