"სხვებს ნუ უყურებთ, გამოიყენეთ შანსი" - ევროკომისრის გზავნილები: როგორ ასრულებს საქართველო რეკომენდაციებს, სად ხედავენ პროგრესს და რა მიმართულებაზე ისმის კრიტიკა?

ევროპული სამეზობლო პოლიტიკისა და გაფართოების საკითხებში ევროკომისრის ოლივერ ვარჰეის განცხადებით, საქართველოს, ევროკომისიის მიერ განსაზღვრული 12 პრიორიტეტიდან მხოლოდ სამი აქვს შესრულებული.

ამის შესახებ მან სტოკჰოლმში საქართველოს, უკრაინისა და მოლდოვის მიერ რეფორმების კუთხით მიღწეულ პროგრესთან დაკავშირებით ზეპირი ანგარიშის წარდგენისას განაცხადა.

მისი თქმით, შესრულებულ რეკომენდაციებს შორის არის სახალხო დამცველის არჩევა გამჭვირვალე პროცესის საშუალებით.

„რაც შეეხება საქართველოს, რომლის შემთხვევაშიც 12 პრიორიტეტი განისაზღვრა, ივნისში წარმოდგენილ მოსაზრებაში ჩვენ ვხედავთ, რომ 3 მათგანი არის შესრულებული: პირველი, ეს არის გენდერული თანასწორობა და ქალთა მიმართ ძალადობის წინააღმდეგ ბრძოლა. მეორე არის ევროპის ადამიანის უფლებათა სასამართლოს გადაწყვეტილებების გათვალისწინება. მესამე არის სახალხო დამცველის დანიშნა გამჭვირვალე პროცესით“, - განაცხადა ვარჰეიმ.

ამასთან, ვარჰეის განმარტებით, საქართველომ 12 პრიორიტეტიდან 7 მიმართლებით გარკვეულ პროგრესს მიაღწია.

"7 სხვა მიმართულებით საქართველომ მიაღწია გარკვეულ პროგრესს - მათ შორის, პოლიტიკური პოლარიზაციის მიმართულებით, სახელმწიფო ინსტიტუტების სრული ფუნქციონირების მიმართულებით და საარჩევნო გარემოს შემდგომი გაუმჯობესების მიმართულებით, გამჭვირვალე და ეფექტური სასამართლო რეფორმების სტრატეგიის მიღებისა და განხორციელების თვალსაზრისით, ასევე, ანტიკორუფციული სააგენტოს დამოუკიდებლობის გაძლიერების თვალსაზრისით, ორგანიზებული დანაშაულის წინააღმდეგ ბრძოლის გაძლიერების მიმართულებით, მოწყვლადი ჯგუფების ადამიანის უფლებების დაცვის გაძლიერებისა და სამოქალაქო ორგანიზაციების მონაწილეობის უზრუნველყოფის მიმართულებით გადაწყვეტილების მიღების პროცესში“, - განაცხადა ვარჰეიმ.

მისი თქმით, ევროპული პერსპექტივის მინიჭებით საქართველოს ძლიერი სიგნალი მისცეს, რომელიც ჯერ კიდევ აქტიურია და საქართველომ ის უნდა გამოიყენოს.

„ვფიქრობ, რომ ეს სიგნალი ნათელი და ძლიერია და ჯერ კიდევ აქტიურია, გამოიყენეთ ის, ნუ უყურებთ სხვებს, შეხედეთ რა შეგიძლიათ გააკეთოთ, რისი შესრულება შეგიძლიათ და ქვეყანამ უნდა შეძლოს შემდეგი ნაბიჯის გადადგმა, თუ ყველაფერი შესრულდება“, - აღნიშნა ევროკომისარმა.

• ის ასევე შეეხო საარჩევნო პროცესს და აღნიშნა, რომ საჭიროა საქართველოს პარლამენტის ზედამხედველობა, რათა მოხდეს საარჩევნო დარღვევების ადეკვატური გამოძიება, რომელიც აღნიშნული იყო ოდირის რეკომენდაციებში.

"მოკლედ რომ მოგახსენოთ კონკრეტულ ნაბიჯებთან დაკავშირებით, რაც შეეხება პოლიტიკურ პოლარიზაციას, პარლამენტის წევრების უმეტესობამ დაასრულა თავისი ბოიკოტი და გარკვეული კანონის მიღება მოხდა, ამ 12 პრიორიტეტის სრულად შესასრულებლად, ინტერპარტიული მხარდაჭერით.

საქართველომ უნდა უზრუნველყოს პარლამენტის ეფექტური ზედამხედველობა, დაასრულოს მკაცრი რიტორიკა და პატივი სცეს პოლიტიკურ შეთანხმებებს მათ შორის იმას, რომლის მიღწევა ევროკავშირის უშუალო მონაწილეობით მოხდა, რომელსაც ჰქვია ევროკავშირის მედიაციით მიღწეული 19 აპრილის შეთანხმება.

რაც შეეხება მეორე ნაბიჯს, რომელიც გულისხმობს სახელმწიფო ინსტიტუტების სრულ ფუნქციონირებას და საარჩევნო გარემოს გაუმჯობესებას, მთავრობამ მიიღო საჯარო მმართველობის რეფორმის სტრატეგია და სამოქმედო გეგმა. საარჩევნო კოდექსი და კანონი პოლიტიკური გაერთიანების შესახებ ჩასწორებულ იქნა ვენეციის კომისიისა და ოდირის რეკომენდაციების შესაბამისად. მაგრამ ჩვენ ჯერ ისევ გვჭირდება, რომ საქართველომ გააუმჯობესოს საპარლამენტო ზედამხედველობა, რათა ადეკვატურად მოხდეს საარჩევნო დარღვევების გამოძიება, როგორც ეს აღნიშნული იყო ოდირის ანგარიშში და შეცვალოს ჩასწორება საარჩევნო კოდექსში, რომლის შედეგადაც ცესკოს თავმჯდომარის არჩევის წესი შეიცვალა“,- განაცხადა ვარჰეიმ.

მისივე განცხადებით, საქართველომ დეოლიგარქიზაციის ნაწილში შეზღუდულ პროგრესს მიაღწია, მედია პლურალიზმის მიმართულებით კი საერთოდ ვერ მიაღწია პროგრესს.

"დეოლიგარქიზაციის მიმართულებით საქართველომ მიაღწია შეზღუდულ პროგრესს. ამ მიმართულებით ვენეციის კომისიამ თავის უკანასკნელ რეკომენდაციაში, რომელიც ივნისში გამოქვეყნდა, კიდევ ერთხელ აღნიშნა, რომ კანონპროექტი არ უნდა იქნას მიღებული არსებული ფორმით და აქედან გამომდინარე, მე მივესალმები გუშინ და გუშინწინ მმართველი პარტიის მიერ გაკეთებულ განცხადებას, რომ ეს კანონპროექტი არ იქნება მიღებული. ახლა საქართველო უნდა კონცენტრირდეს კანონის მიღებაზე, რომელიც ჩამოაყალიბებს სისტემურ მიდგომას, ვენეციის კომისიის რეკომენდაციების შესაბამისად, მათ შორის, კონკურენციის პოლიტიკისა და პოლიტიკური პარტიების დაფინანსების წესების გაძლიერების მიმართულებით.

რაც შეეხება მედია პლურალიზმისა და მედია მფლობელების წინააღმდეგ სამართლებრივი პროცედურების სტანდარტებს, საქართველომ ვერ მიაღწია ვერანაირ პროგრეს. იმისთვის, რომ ეს პუნქტი შეასრულოს, საქართველომ მაუწყებლის შესახებ კანონში ცვლილები უნდა შეიტანოს ევროპული საბჭოს მოსაზრების შესაბამისად და უნდა უზრუნველყოს ჟურნალისტების უსაფრთხოება, ამასთან უნდა გაზარდოს როგორც ჟურნალისტების, ასევე, მედია ორგანიზაციების მფლობელების დაცულობა და თავისუფლება“,- განაცხადა ვარჰეიმ.