"წარმოიდგინეთ, მაქვს საავადმყოფო, სადაც ვცხოვრობ - ექთანთან მქონდეს სექსი და ამ დროს ვიღაცას შემოსვლის უფლება აქვს" - მეგრელიშვილი ჯანდაცვის შესახებ კანონში ცვლილებებზე
წარმოიდგინეთ, მაქვს საავადმყოფო, სადაც ვცხოვრობ - ფაქტობრივად, ის ჩემი სახლია, ექთანთან მქონდეს სექსი და ამ დროს ვიღაცას შემოსვლის უფლება აქვს, რათა დამაჯარიმოს! - ასე განმარტა “გირჩის“ დეპუტატმა ვახტანგ მეგრელიშვილმა „ჯანმრთელობის დაცვის შესახებ“ კანონში დაგეგმილ ცვლილებების არსი.
როგორც მეგრელიშვილმა საფინანსო-საბიუჯეტო კომიტეტის სხდომაზე განაცხადა, დაგეგმილი რეგულაციებით სამედიცინო დაწესებულებებთან მიმართებაში კერძო საკუთრების უფლება იზღუდება.
მეგრელიშვილი დაინტერესდა, რამდენ კლინიკას შეიძლება შეეხოს ახალი რეგულაციები და რამდენ კლინიკას დაემუქრება საყოველთაო ჯანდაცვის პროგრამებიდან “გამოვარდნის“ ან სამედიცინო საქმიანობის დაკარგვის საფრთხე.
“ასეთი რამ სახლზე რომ დავწეროთ, წარმოგიდენიათ?! კლინიკებში განყოფილებები უნდა დაინგრეს, დაიწყოს რემონტები იმისთვის, რომ რეგულაციებში ჩასხდნენ, ხოლო თუ არ ჩასხდებიან - დაიხურებიან“, - აღნიშნა მეგრელიშვილმა.
პარლამენტში, დაჩქარებული წესით მთავრობის საკანონმდებლო პაკეტის განხილვა დაიწყო, რომლის საფუძველზეც სამედიცინო და ფარმაცევტული საქმიანობის რეგულირების სააგენტოს უფლებამოსილებების გაზრდა და ფუნქციების გაძლიერება იგეგმება.
კანონის პროექტს ჯერ პარლამენტის საფინანსო-საბიუჯეტო კომიტეტი, შემდეგ კი ადამიანის უფლებათა დაცვისა და სამოქალაქო ინტეგრაციის კომიტეტი განიხილავს.
"ჯანმრთელობის დაცვის შესახებ“ კანონში დაგეგმილი ცვლილებების მიხედვით, მაკონტროლებელ ორგანოს სახელმწიფო კონტროლს დაქვემდებარებულ ობიექტებზე თავისუფლად, წინასწარი შეტყობინების გარეშე, ნებისმიერ დროს შესვლის, მასალის, ნივთის და ა.შ. გამოთხოვის შესაძლებლობა, ასევე საზედამხედველო ობიექტის (ან მისი ნებისმიერი ნაწილის) დათვალიერების, ხელშეუხებლობის მოთხოვნის, დალუქვის და ამოღების უფლებამოსილებები ენიჭება.
მაკონტროლებელ ორგანოს უფლებამოსილება ეძლევა, ელექტრონული საჯარიმო ქვითარი გამოიყენოს, რომლის ფორმას, შევსებისა და წარდგენის წესს ჯანდაცვის მინისტრი დაამტკიცებს.
სამედიცინო და ფარმაცევტული საქმიანობის რეგულირების სააგენტოს შეეძლება მაღალი რისკის შემცველი სამედიცინო საქმიანობის მიმწოდებელს საქმიანობის უფლება შეუჩეროს.
კანონის პროექტის თანახმად, სამედიცინო და ფარმაცევტული საქმიანობის სფეროში სახელმწიფო კონტროლისა და ზედამხედველობის ეტაპზე სამინისტროს შესაბამისი კომპეტენტური ორგანოს მიერ მიღებული გადაწყვეტილება დაუყოვნებლივ აღსასრულებლად მიექცევა და მათ აღსრულებას გასაჩივრება არ გააჩერებს, თუ სასამართლომ სხვაგვარად არ დაადგინა.
ამავე პროექტით, სამედიცინო და ფარმაცევტულ სფეროში მოქმედი საჯარიმო სანქციები იზრდება.
სანქციების ზრდის გარდა, ცვლილების მიხედვით, სამედიცინო და ფარმაცევტული საქმიანობის რეგულირების სააგენტოს, სასამართლოსთან ერთად, მოცემულ სამართალდარღვევის საქმეებზე როგორც ოქმის შედგენის, ისე საქმის განხილვის შესაძლებლობა ენიჭება.
ასევე, სააგენტოს მიერ ადმინისტრაციულ სამართალდარღვევის საქმეების განხილვისას ელექტრონული დაჯარიმების შესაძლებლობა შემოდის.
კანონის პროექტი ჯანდაცვის სამინისტრომ მოამზადა.